بلوچ یکجہتی کمیٹی نے کہا ہے کہ شیردل ولد قادر بخش، درچکو دشت، تربت کے ایک معمر کسان تھے۔ 21 مئی کو جب وہ اپنے کھیت میں کام کر رہے تھے تو ایف سی اہلکاروں نے فائرنگ شروع کر دی۔ مقامی لوگوں کے مطابق شیردل اس فائرنگ کی زد میں آ گئے اور اپنے ہی کھیت میں جان کی بازی ہار گئے۔
انہوں نے کہاکہ بلوچستان میں خاندان مسلسل اپنے پیاروں کی لاشیں وصول کر رہے ہیں، جبکہ مختلف علاقوں میں خوف اور غم کی فضا پھیلتی جا رہی ہے اور انصاف ناپید ہے۔
بلوچ یکجہتی کمیٹی ایک ایسے بزرگ شخص کے قتل کی شدید مذمت کرتی ہے جس نے اپنی پوری زندگی اپنی زمین پر محنت کرتے ہوئے گزاری۔ ایک غریب کسان، جو اپنے خاندان کے لیے روزی کمانے میں مصروف تھا، اسی زمین پر قتل کر دیا گیا جہاں سے وہ اپنے اہلِ خانہ کا پیٹ پالتا تھا۔ یہ انتہائی افسوسناک اور دل دہلا دینے والی بات ہے کہ اب اپنے کھیتوں میں کام کرنے والے کسان بھی تشدد سے محفوظ نہیں رہے۔
مزید کہاکہ بلوچستان میں صورتحال مسلسل خراب ہوتی جا رہی ہے، جہاں مختلف علاقوں سے قتل اور لاشوں کی برآمدگی کی اطلاعات موصول ہو رہی ہیں۔ خاندان ناقابلِ برداشت درد اور نقصان کا سامنا کر رہے ہیں، خصوصاً ایسے دنوں میں جو امن اور یکجہتی کی علامت ہونے چاہییں، جبکہ عام لوگ تحفظ اور انصاف سے محروم ہیں۔
بلوچ یکجہتی کمیٹی بین الاقوامی انسانی حقوق کی تنظیموں اور عالمی اداروں سے اپیل کرتی ہے کہ وہ بلوچستان میں بگڑتی ہوئی انسانی حقوق کی صورتحال کا فوری نوٹس لیں۔ کمیٹی ذمہ دار عناصر کے احتساب، انصاف کی فراہمی، شہریوں کے تحفظ، اور متاثرہ خاندانوں کے وقار کے احترام کا مطالبہ کرتی ہے۔
