بلوچستان کے مرکزی شہر کوئٹہ میں آج ہفتے کے روز ہونے والے بم حملوں کے بعد شہر بھر میں سیکیورٹی ہائی الرٹ کر دی گئی ہے جبکہ شہر کے داخلی و خارجی راستے بھی بند کر دیے گئے ہیں۔
تفصیلات کے مطابق کوئٹہ کراچی قومی شاہراہ کو سیکیورٹی وجوہات کی بنا پر بند کر دیا گیا ہے، جس کے باعث درجنوں گاڑیاں شاہراہ پر پھنس کر رہ گئی ہیں۔
مسافروں کو راستہ کلیئر ہونے تک وہیں روک لیا گیا ہے۔
واضح رہے کہ آج بلوچستان کے دارالحکومت کوئٹہ میں ریلوے ٹریک، پولیس اور دیگر فورسز اداروں پر متعدد بم حملوں کے واقعات پیش آئے، جن کے بعد شہر کی سیکیورٹی مزید سخت کردی گئی ہے۔
کوئٹہ کے سریاب میں ریلوے ٹریک کو بارودی مواد لگا کر دھماکہ سے تباہ کردیا گیا ہے جس کے بعد ریلوے سروس ایک بار پھر معطل ہوگئے ہیں۔
ذرائع کے مطابق حب اور لسبیلہ کے قریب بھی فورسز نے کوئٹہ کراچی شاہراہ پر سفر کرنے والی تمام مسافر گاڑیوں سمیت ہر طرح کی ٹریفک کو روک رکھا ہے۔
تاحال انتظامیہ کی جانب سے اس صورتحال پر کوئی واضح مؤقف سامنے نہیں آیا، تاہم مقامی حکام کا کہنا ہے کہ کوئٹہ میں بم دھماکوں کے بعد اعلیٰ حکام نے صوبے بھر میں سیکیورٹی ہائی الرٹ کرنے کے احکامات جاری کیے تھے۔
