حق دو تحریک کے سربراہ مولانا ہدایت الرحمان بلوچ نے اپنے ایک بیان میں کہا ہے کہ الیکشن قریب آنے پر چوری چھپے مختلف آسامیوں کے تعیناتی آرڈر اپنے من پسند لوگوں میں تقسیم دراصل گوادر کے ہزاروں تعلیم یافتہ نوجوانوں کے مستقبل پر قدغن ہے۔
انہوں نے کہاکہ گوادر کے نوجوان اس ناانصافی کے خلاف بھرپور آواز اٹھائیں ، مختلف سرکاری آسامیوں کے تعیناتی آرڈر چوری چھپے من پسند افراد کے گھروں میں تقسیم کرنے کے عمل کی شدید مذمت کرتے ہوئے انکا کہنا تھا کہ اسے ضلع گوادر کے تعلیم یافتہ نوجوانوں کے مستقبل پر قدغن قرار دیا۔
مولانا بلوچ نے کہا کہ الیکشن قریب آنے پر من پسند لوگوں کو نوازنا دراصل ضلع گوادر کے ان تمام بے روزگار تعلیم یافتہ نوجوانوں کے ساتھ ناانصافی ہے جن کے والدین نے پیٹ کاٹ کر ان کو پڑھایا۔
مولانا ہدایت الرحمن نے نوجوانوں کو پیغام دیتے ہوئے کہا کہ اس ظلم کے خلاف حق دو تحریک کے ساتھ مل کر بھرپور آواز اٹھائیں اور انصاف ملنے تک خاموش نہ رہیں۔
