عوامی نیشنل پارٹی کے صوبائی بیان میں تربت میں طالبعلم حیات بلوچ کے قتل کے واقعے کی شدید الفاظ میں مذمت کرتے ہوئے کہا گیا ہے کہ اس طرح کے واقعات سے لوگوں میں شدید بے چینی پائی جاتی ہے فوری طور پر اس واقعے میں ملوث افراد کو گرفتار کرکے قرار واقعی سزا دی جائے۔
عوامی نیشنل پارٹی کے صوبائی دفتر باچا خان مرکز سے جاری ہونے والے بیان میں کہا گیا ہے کہ مقتول حیات بلوچ کے قتل سے متعلق جو تفصیلات میڈیا پر آرہی ہیں وہ انتہائی تشویشناک ہیں طلباء سیاسی کارکنوں اور باشعور طبقات حیات بلوچ کے قتل سے شدید تشویش میں مبتلا ہیں اس طرح کے واقعات ناقابل برداشت ہیں۔
بیان میں کہا گیا ہے کہ عوامی نیشنل پارٹی بدامنی اور دہشتگردی کے اندھے واقعات میں اپنے کارکنوں اور پیاروں کو کھو دینے کے دکھ اور غم سے اچھی طرح واقف ہے۔
بیان میں مطالبہ کیا گیا ہے کہ فوری طور پر تربت میں طالبعلم حیات بلوچ کے قتل میں ملوث افراد کو گرفتار کرکے قرار واقعی سزا دی جائے اور سوگوار خاندان کو انصاف فراہم کیا جائے۔
