بلوچستان کے شمالی علاقوں میں برفباری اور بارش کی پیشگوئی

 محکمہ موسمیات کے مطابق اتوار کے روز بلوچستان کے شمالی اضلاع کوئٹہ، مستونگ، زیارت، قلعہ عبداللّٰہ، قلعہ سیف اللّٰہ، ہرنائی اور پشین کے پہاڑی اور نیم پہاڑی علاقوں میں بارش اور برف باری کا امکان ہے۔ محکمہ موسمیات کے مطابق بارش کا یہ سلسلہ پیر تک جاری رہیگا، زیارت، کوئٹہ ، پشین اور قلعہ عبداللّٰہ میں اوسط 02 فٹ تک برفباری کا امکان ہےـ

محکمہ موسمیات نے امکان ظاہر کیا ہے کہ شدید برفباری کے باعث ان علاقوں میں معمولات زندگی اور ذرائع آمدروفت میں خلل کا اندیشہ ہے اور اسی طرح شدید بارش کے باعث کوئٹہ، قلعہ عبداللّٰہ، ہرنائی، چاغی، سبی، مستونگ اور بولان کے اضلاع کے ندی نالوں میں طغیانی کا بھی خدشہ ہے۔

محکمہ موسمیات نے بارش اور برفباری سے متاثرہ لوگوں کو محتاط رہنے کو کہا ہے اور متعلقہ اداروں کو الرٹ رہنے کی ہدایت کی ہے۔

یاد رہے گذشتہ دنوں کوئٹہ اور ملحقہ علاقوں میں برفباری کے بعد سردی کی شدت میں اضافہ اور دوسری طرف گیس کی لوڈشیڈنگ میں بھی اضافہ دیکھنے میں آیا جس کی وجہ سے شہریوں کو شدید مشکلات کا سامنا ہے۔