بلوچستان کی روایات کو ملحوظ خاطر رکھ کر سردار اختر مینگل چیئرمین سینیٹ کی حمایت کریں ۔جان جمالی
میڈیا اطلاعات کے مطابق بلوچستان عوامی پارٹی کے رہنماؤں نے اسلام آباد میں بلوچستان نیشنل پارٹی کے صدر اختر مینگل و دیگر رہنماؤں سے ملاقات کرکے چیئرمین سینیٹ صادق سنجرانی کی حمایت کی درخواست کی ہے ۔
بی اے پی رہنماؤں نے چیئرمین سینیٹ صادق سنجرانی کیخلاف تحریک عدم اعتماد آنے کی صورت میں بلوچستان نیشنل پارٹی مینگل سے صادق سنجرانی کی حمایت کرنے کی خواہش ظاہر کی۔
رکن صوبائی اسمبلی جان جمالی نے کہا کہ ہم بلوچستان کی روایات کو ملحوظ خاطر رکھ کر یہاں آئے ہیں تاکہ آپ ہماری حمایت کریں، جس پر بی این پی رہنماء اختر مینگل کا مؤقف تھا کہ چیئرمین سینیٹ کی تبدیلی سے متعلق پارٹی کی مرکزی کابینہ و مرکزی کمیٹی سے مشاورت کے بعد فیصلہ کیا جائے گا۔
