بولان میں سرچ آپریشن کے دوران فورسز کی گاڑی پر بم حملہ
دی بلوچستان پوسٹ ویب ڈیسک کو موصول ہونے والی اطلاعات کے مطابق بولان کے علاقے مچھ میں فورسز کی گاڑی کو دوران سرچ آپریشن بم حملے کا نشانہ بنایا گیا ہے۔
ذرائع کے مطابق مچھ کے علاقے آب گم میں تیل اور گیس تلاش کرنے والی کمپنی پر گزشتہ شب حملے کے بعد فورسز کی جانب سے آج صبح سرچ آپریشن شروع کیا گیا جس میں کئی افراد کو گرفتار کرکے ایف سی کیمپ منتقل کیا گیا۔
جبکہ شام کے وقت سرچ آپریشن میں مصروف فورسز کے اہلکاروں کی ایک گاڑی بارودی سرنگ کا نشانہ بنا۔
علاقائی ذرائع کے مطابق اس حملے میں فورسز کو جانی و مالی نقصانات کا خدشہ ہے، تاہم نقصانات کی تفصیل تاحال ٹی بی پی کو موصول نہیں ہوئی ہے۔
واضح رہے گزشتہ شب کے حملے سے قبل بھی تیل و گیس تلاش کرنے والی کمپنی پر اس علاقے میں حملہ ہوچکا ہے۔
