“ائید ءُ بندیگیں بلوچستان”
اکیل مراد
دی بلوچستان پوسٹ : بلوچی کالم
دنیاءِکُنڈ کُنڈ ءَ مردمانی چن ءُ لانچ عید ءِ وشیاں گوں سمبھان اَنت ھرکجا مردم گلءُ شات اَنت شات کامی انت سِر ءُ کپ انت لوگ ءَ چہ ڈن کار ءُ روزگار ءَ بیتگیں مردم درست عید ءَ چھٹی کن اَنت ءُ دیم پہ وتی میتگاں رونت ءُ گوں کہولاں وشھال اَنت ۔
مروچی مئے چم بلوچستان ءِ زمین ، بلوچستان ءِ سُتکگیں میتگاں کپ اَنت گڑا تاں سما بیت اے میتگاں نہ بوھوکیں آسراتیانی ھمراھی ءَ یک ابیتگیں زندمان ءِ دنز ءُ مُجاں مانپوشیتگ۔ میتگانی تہءَ یکشلیں ھون ءِبُوئے ھواری ءَ اود ءَ سوتکگیں لوگانی دُوت ءُ بازیں چیز ترءَ گندگ بنت ۔
اِشانی ھمراھی ءَ ھما ماتانی چُک کہ مروچی زوراک ءِ بندیگ جاھاں بندیگاں ھما ماتانی چکاں کہ وتی ھون اے سرڈگار ءَ شلینتگ اَنت ھما مات ھمے عید ءَ کجام بزگی ءُ نہ وشی ءَگوزینگ ءَ اَنت اے ھماھانی اندر ءَ چست بیتگیں ماریشت مار اَنت مروچی بلوچ پدریچ اے جاورانی تہ ءَ اگاں اڑیتگءُ روان اِنت گڑا تاں ھمے سماہ بیت گلامیں راجانی مستریں دادانی بھرھمیش اَنت کہ بلوچ راج چم اش وت گندگ ءَ ایں ھریک میتگے ءَ مات ءِ پرس ءِ پتّرا نیشتگ، ھریک میتگے ءَ مات ءِ چک ءِ ودار ءَ نیشتگ۔
اے گمانی درد اَنت کہ آئی ءِ توکیں زمزیل ءِ گُٹ ءَ لوپ کنگ بیتگ بلوچ ءِ زندمان جھنم ءِ تہءَ مٹ کنگ بیتگ بلوچ چہ زندمان ءِ وشیاں زبھر کنگ بیتگ مات چہ چک ءَ گستہ کنگ بیتگ، پت چہ چک ءَ گستہ کنگ، برات چہ گھار ءَ گستہ کنگ، جَن چہ مرد ءَ گستہ کنگ بیتگ میتگ چہ ھلکاں لَڈینگ بیتگ اَنت مھلوک در پہ در بیتگ انت اے درستیں جاورانی تہءَ بلوچ ءِ پدریچ گوزگ ءَ ایں۔
بلوچ ءِ بدواہ اے چیز ءَ ھچ بر نہ لوٹ اَنت کہ بلوچ وتی زمین ءِ سر ءَ وشھال ءُ نیکپال بہ بیت ھما روچ ءَ کہ بلوچ ءِ زمین ءِ سرءَ زوریں بدواھاں اُرش کرتگ ھما روچ ءَ بدواھاں ھمے جیڑیتگ کہ بلوچ ءِ دراھیں چیزاں چہ بلوچاں پُلاں تاں بلوچ وتی ابدمانیں زندمان ءَ بیھال بہ کنت بلوچ ءِ نسل ھلاس ءُ گار بہ بیت تاں بلوچ ءِ زمین ءَ گڈی ءَ وتی نام ءَ بہ کن آں ۔ بلے! بامردیں بلوچاں ھما روچ ءَ ھم زورگری ءِ ھلاپ ءَ توپنگ چست کرت ھما روچ ءَ ھم کوہ مرد بیت اَنت ءُ وتی زمین ءُ مڈیانی پانک جَنگ ءَ سرین بند بیتاں۔
مروچی چندے زروار ءُ وت نامیں راجدوستاں جاہ جتگ کہ بلوچ ءِ بنکی ھکاں چہ پارلیمنٹ ءَ ما چہ بدواھاں پچ گریں بلے ھمے دو دیمیں آدینکوکانی دست ماں بلوچ ءِ ھوناں مچلیتگ اَنت۔ بلوچ ءِ چکچینی ءَ ھمے پارلیمنٹ پرستانی گام دیم ءَ اَنت ھمے پارلیمنٹ پرستاں مروچی پوج ءِ سرشونی ءَ کنگ ءَ انت ءُ بلوچ ننگ ءُ ناموس ءَ پامال کنگ ءَ اَنت۔
بیلاں بہ ماریت بہ جیڑ اِت وتی گلامی ءِ سنکلاں بہ سندیت وت ءَ آجوئی ءِ زندمان ءَ بھر مند بہ بکن ات۔
راج تپاک بات
راجی جنز سوبین بات
ائید ءِ گمیں درد ھلاس بات
