بلوچستان کے علاقے بولان میں نامعلوم مسلح افراد نے پاکستانی فورسز کے اہلکاروں پر حملہ کیا اور ریلوے ٹریک کو دھماکے میں تباہ کرنے سمیت ٹریک کی نگرانی کرنے والے اہلکاروں کو دھماکہ خیز مواد سے نشانہ بنایا ہے۔
تفصیلات کے مطابق گذشتہ رات بولان میں جمعہ شار کے قریب نامعلوم مسلح افراد نے مختلف ہتھیاروں سے پاکستانی فورسز کے پوسٹ پر حملہ کیا، حملے میں پوسٹ کو نقصان پہنچا تھا تاہم حکام نے تاحال جانی نقصانات کے حوالے کچھ نہیں بتایا ہے۔
دریں اثناء فورسز پر حملے کے بعد ریلوے ٹریک کو بھی نامعلوم افراد کی جانب سے دھماکہ خیز مواد نصب کرکے تباہ کردیا گیا۔
ذرائع نے ٹی بی پی کو بتایا کہ آج صبح جب اہلکار ریلوے ٹریک کا جائزہ لینے کیلئے گشت کررہے تھے تو انہیں بھی دھماکہ خیز مواد سے نشانہ بنایا گیا ہے۔
حکام نے تاحال اس حوالے سے کوئی تفصیلات فراہم نہیں کی ہے۔
مذکورہ علاقوں میں بلوچ مسلح آزادی پسند تنظیمیں متحرک ہیں۔ تاہم ان حملوں کی ذمہ داری آخری اطلاعات تک کسی تنظیم نے قبول نہیں کی ہے۔
