امریکی خبر رساں ایجنسی کے مطابق فائرنگ کا واقعہ تہران کے جنوبی علاقے کھریزک میں واقع ایئربیس میں پیش آیا۔ ہلاک ہونے والوں میں ایک افسر اور دو سپاہی شامل ہیں جبکہ فائرنگ کے تبادلے میں حملہ کرنے والا فوجی اہلکار بھی ہلاک ہو گیا۔ فائرنگ کے واقعے میں زخمی ہونے والے اہلکاروں کو ایئرفورس اسپتال منتقل کردیا گیا۔ حکام کا کہنا ہے کہ حملے کے محرکات سامنے نہیں آ سکے ہیں تاہم تحقیقات کا آغاز کر دیا گیا ہے۔ایرانی فوج نے اس سلسلے میں بیان جاری کیا ہے جس میں کہا گیا ہے کہ واقعہ ملٹری فائرنگ رینج میں پیش آیا۔ فوج کے مطابق ممکن ہے کہ حملہ کرنے والا فوجی نفسیاتی مسائل کا شکار ہو یا پھر یہ بھی ہوسکتا ہے کہ فائرنگ کی پریکٹس کے دوران حادثاتی طور پر بندوق کا رخ فوجیوں کی جانب ہو گیا ہو
