تعلیم، بلوچ و بلوچستان
ریاض مینگل
دی بلوچستان پوسٹ
بندغ اسہ چاگڑدی ساہدار ئسے و بندغ ءِ بندغی نا گواچن ءِ پہہ کروکا تعلیم مریک۔بندغ تینا جوان و بد ءِ پہہ مریک۔کس ءِ اگاں تعلیم متو گڑا او نہ جہان ءِ سرپند مریک، نکن جہان اٹ ساڑی گڑا تا بابت سوچ خلنگ و نکن پٹ پول کننگ کیک۔ اینو جہانی خواستاک تعلیم نابابت بھاز الّمی و بھاز زیات مسونو ہراڑان ننا چاگڑد بھاز مُر سلوک خننگک۔
بلوچستان نا ضلع قلات اٹ تدوکا دے تیٹ 46شش پرائمری اسکول بند مننگ نا حوال اس مونا آن گدرینگا۔ اسکول تا بند مننگ اسہ بد ءُ حوال ئسے انتئے کہ اسہ اسکول اٹ سد آ چُناک خوانرہ و اندا چُنا مستی قوم و راج ءِ روشنائی بشخوکاک مریرہ۔ قلات اٹ اسکول آتا بند مننگ نا مطلب اندادے کہ ہزار آن کم و ود چُنا علم دوئی کننگ آن بے مُراد مسر ، اندن دا چُناتے تون اوار اوفتا خاہوت آک ہم بروکا وخت اٹ گچین و آسرات ءُ زند ئسے آن پد سلیسر۔
گدروکا دے تیٹ اسہ پین حوال ئسے نا رِد اٹ بہاوالدین ذکریا یونیورسٹی ملتان، پنجاب اٹ بلوچستان آن تعلقدار آ خوانوک آ ورناتے پاکستان پیپلز پارٹی نا طلباء ٹولی نا پارہ غان لَٹ تننگانے ہرانا سوب اسہ بلوچ طالب اس بھاز ٹپی مسونے ۔صوبہ پنجاب اٹ دا اولیکو وار اَف کہ بلوچ طالب علم آتیا بے دادی کننگانے بلکن داکان مست قائد اعظم یونیورٹی اسلام آباد و ایلو تعلیمی ادارہ غاتیٹ ہم اندن مریسہ کرینے ہراڑان ظاہر مریک بلوچ آتیکن خواننگ نا دروازہ غاک بند کننگ نا کوشست مریسہ کرینے۔
اسہ پارہ غان بلوچستان اٹ تعلیمی ادارہ اف و ایلو پارہ غان ایلو صوبہ غاتیٹ پارلیمانی پارٹی تاطلباء ونگ آک بلوچ آتے خواننگ کن ہلیپسہ۔
بلوچستان دنکہ ہر گڑا پد تخنگانے اندا ڈَول تعلیمی وڑ اٹ پد تخوکے، تعلیمی ایمر جنسی نا دعویٰ کروکاتا کاریم ہچو جاگہ اس خننگپسہ۔ بھازا علاقہ غاتیٹ اینو ہم اسکول اف، اگاں جاگہ اس اسکول اس ارے گڑا اوڑے استاد آتا کمی ءِ یا ایلو آسراتیک دوئی بفسہ ہراڑان خواننگ و خوانفنگ نا ہمو مسخت پورہ مننگ کپک۔
بلوچ طالب علم آتیٹ لائخی تا کمی اف۔ بلوچستان آن تعلقدار بھازا ورناک اینو پیشن ملک آتیٹ گچین ءُ کڑد اسیتون ساڑی ءُ ہرافک تینا خواری کریسہ تینے جہان تون ہمگرنچ کرینے۔ دُن انگا طالب علم آتے بیرہ دیخہ در کمک خواست مریک ہراڑان اوفک ہم گچین ءُ دروشم اسیتون مونی بننگ کیرہ۔
دا ویل آتا ایسری کن بلوچستان نا مخلوق ءِ توار ارفنگ نا ضرورت ءِ۔ اگاں ایلو جہان تو ہمگام مروئی ءِ گڑا تیناو تینا چُنا تیکن توار ارفوئی مریک۔ مخلوق نا نمائندگی نا دعویٰ کروک آک تینا علاقہ غاتیٹ تعلیمی آسراتی بریبر کننگ کن عملی ءُ کاریم نشان ایتر۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک.
