سرکاری حمایت یافتہ مسلح گروہ کی فائرنگ سے زخمی ہونے والا نوجوان جان کی بازی ہار گیا۔
تفصیلات کے مطابق بلوچستان کے ضلع کیچ کی تحصیل بلیدہ میں پاکستانی فورسز کی سرپرستی میں سرگرم مسلح گروہ، جسے مقامی سطح پر “ڈیتھ اسکواڈ” کہا جاتا ہے، کی فائرنگ سے زخمی نوجوان حاشم ولد عبدالقادر ساکن بلیدہ الندور چار روز زیرِ علاج رہنے کے بعد چل بسا۔
چار روز قبل حاشم کو فائرنگ کا نشانہ بنایا گیا تھا جس کے نتیجے میں وہ شدید زخمی ہوگئے، بعدازاں انہیں علاج کے لیے کراچی منتقل کیا گیا جہاں وہ زخموں کی تاب نہ لاتے ہوئے آج دم توڑ گئے۔
یاد رہے کہ بلوچستان کے مختلف علاقوں میں یہ مسلح گروہ، جنہیں “ڈیتھ اسکواڈ” کہا جاتا ہے، مقامی افراد کے مطابق عام شہریوں، بالخصوص سیاسی و سماجی کارکنوں کو نشانہ بنا رہے ہیں۔
گزشتہ 28 ستمبر کو پنجگور کے علاقے پروم میں بھی ڈیتھ اسکواڈ ارکان کی فائرنگ سے دو افراد زخمی ہوئے تھے، جبکہ رواں ماہ کے دوران کیچ کے علاقے تمپ اور مند میں چار نوجوانوں کو فائرنگ کر کے قتل کیا گیا۔
بلوچستان کی سیاسی، سماجی اور انسانی حقوق کی تنظیموں کا کہنا ہے کہ یہ گروہ ریاستی اداروں کی سرپرستی میں سرگرم ہیں اور انہوں نے حکومت سے ڈیتھ اسکواڈز کے خاتمے کا مطالبہ کیا ہے۔
