سی ٹی ڈی نے کراچی کے علاقے سعید آباد سے بی ایل اے کے رکن کو گرفتار کرنے کا دعویٰ کیا ہے۔
سی ٹی ڈی کے ترجمان کے مطابق مذکورہ شخص کے قبضے سے غیر قانونی اسلحہ برآمد کیا گیا ہے۔ یہ گرفتار شخص پہلے بھی قتل، اقدامِ قتل و پولیس مقابلے کے مقدمات میں گرفتار ہو چکا ہے۔
دعویٰ کیا گیا کہ گرفتار ملزم داہن اور ساتھی شفیع تنظیم کے ارکان کو سہولتیں فراہم کرتے ہیں اور یہ گرفتاری سے بچنے کے لیے حب بلوچستان میں روپوش رہتے ہیں۔
ترجمان سی ٹی ڈی کے مطابق گرفتار ملزم کی نشاندہی پر محمد شفیع کی گرفتاری کے لیے ٹیم حب روانہ کی جا رہی ہے۔ انہوں نے دعویٰ کیا کہ محمد شفیع کا والد پڑوسی ملک سے تنظیم کا سلیپر سیل چلا رہا ہے۔
