بلوچ یکجہتی کمیٹی نے جاری بیان میں کہا ئے کہ بلوچستان نیشنل پارٹی (بی این پی) کی جانب سے بلوچستان بھر میں شاہراہوں کی بندش اور شٹرڈاؤن ہڑتال کے فیصلے کی مکمل حمایت کرتی ہے۔
انہوں نے کہاکہ بلوچ لانگ مارچ پر ریاستی کریک ڈاؤن، سیاسی کارکنوں کی گرفتاریاں اور مظاہرین پر تشدد ریاستی دہشتگردی کی بدترین مثالیں ہیں۔ ریاست پاکستان نے بلوچستان پر عملاً فاشزم مسلط کر رکھا ہے، جہاں نہ صرف سیاسی آوازوں کو دبایا جا رہا ہے بلکہ اظہار رائے کی آزادی کو بھی مکمل طور پر سلب کیا جا چکا ہے۔
مزید کہاکہ بلوچ یکجہتی کمیٹی کی قیادت کو بلوچستان میں انسانی حقوق کی پامالیوں کے خلاف آواز بلند کرنے کی پاداش میں غیر قانونی طور پر جیلوں میں قید کیا گیا ہے۔ بطور تنظیم، BYC ایک شدید ریاستی کریک ڈاؤن کا سامنا کر رہی ہے۔ انہی گرفتاریوں اور مظالم کے خلاف سردار اختر جان مینگل نے لانگ مارچ کا اعلان کیا، جس پر بھی مسلسل ریاستی جبر جاری ہے۔
آخر میں کہاکہ بلوچ یکجہتی کمیٹی، بی این پی کے احتجاجی اقدامات کی مکمل تائید کرتے ہوئے بلوچستان بھر کے کارکنان کو ہدایت دیتی ہے کہ آج سے تمام اہم شاہراہوں کو بند کیا جائے اور کل کی شٹرڈاؤن ہڑتال کو ہر صورت کامیاب بنایا جائے۔
