فیفا ورلڈ کپ 2026 کے پہلے کوارٹر فائنل میں فرانس نے شاندار کھیل کا مظاہرہ کرتے ہوئے مراکش کو 0-2 سے شکست دے کر سیمی فائنل کے لیے کوالیفائی کر لیا۔ اس کامیابی کے ساتھ فرانس مسلسل تیسری مرتبہ ورلڈ کپ کے سیمی فائنل میں پہنچنے والی پہلی ٹیم بن گئی۔
بوسٹن اسٹیڈیم میں کھیلے گئے اس اہم مقابلے میں فرانسیسی ٹیم نے آغاز ہی سے کھیل پر اپنی گرفت مضبوط رکھی اور مراکش کے گول پر مسلسل حملے کیے۔ پہلے ہاف میں اگرچہ دونوں ٹیمیں کوئی گول کرنے میں کامیاب نہ ہو سکیں، تاہم فرانس نے متعدد خطرناک مواقع پیدا کیے۔
پہلے ہاف کے دوران کپتان کیلیان ایمباپے کو پنالٹی ایریا میں فاؤل کیے جانے پر فرانس کو پنالٹی ملی، لیکن مراکش کے گول کیپر نے ایمباپے کی طاقتور شاٹ کو شاندار انداز میں روک کر اپنی ٹیم کو نقصان سے بچا لیا۔ یوں وقفے تک مقابلہ بغیر کسی گول کے برابر رہا۔
دوسرے ہاف میں بھی فرانسیسی ٹیم نے اپنی برتری برقرار رکھی اور مسلسل دباؤ کے بعد 60ویں منٹ میں کیلیان ایمباپے نے خوبصورت گول کر کے ٹیم کو برتری دلا دی۔ صرف چھ منٹ بعد، 66ویں منٹ میں عثمان ڈیمبیلے نے ایک اور عمدہ گول کر کے اس برتری کو دگنا کر دیا۔
مراکش نے بھی واپسی کی بھرپور کوشش کی۔ 82ویں منٹ میں اسے ایک اہم فری کک ملی، تاہم فرانسیسی گول کیپر نے بہترین دفاع کرتے ہوئے اس موقع کو ناکام بنا دیا۔ اس کے بعد بھی مراکش کو گول کرنے کا ایک سنہری موقع ملا، لیکن وہ اسے بھی ضائع کر بیٹھا۔
اختتامی سیٹی تک فرانس نے اپنی دو گول کی برتری برقرار رکھی اور 0-2 سے کامیابی حاصل کرتے ہوئے سیمی فائنل میں جگہ پکی کر لی۔
اس میچ میں گول کرنے کے بعد کیلیان ایمباپے کے رواں ورلڈ کپ میں مجموعی گولوں کی تعداد آٹھ ہو گئی۔ اس کے ساتھ ہی وہ فیفا ورلڈ کپ کی تاریخ کے پہلے کھلاڑی بن گئے ہیں جنہوں نے دو مختلف ایڈیشنز میں آٹھ، آٹھ گول کرنے کا منفرد اعزاز حاصل کیا۔
یاد رہے کہ ایمباپے نے 2022 کے قطر ورلڈ کپ میں بھی آٹھ گول کیے تھے، جبکہ 2026 کے ٹورنامنٹ میں بھی وہ اب تک آٹھ مرتبہ گیند کو جال کی راہ دکھا چکے ہیں۔
