ھما شپ انگت گیر کیت – زوھیب مھر

اے گپ راستے کہ انسان مریت، بَلے آئی ءِ پگر, یات، کندگ ءُ مسکرا دْرست آ را پد ءَ زندگ کن اَنت، آ را ساری ءِ زندگی ءَ چے انگت شرّیں زندگی یے بکش ءَ اِیت، پرچاکہ مئے چاگرد یک مردگ پرستیں  چاگردے.مئے چاگرد ءِ تہ ءَ زندگیں انسان ءَ را ھچ بستار نیست، تو چش ھم گشت کن ئے کہ دست ءِ چیز ءَ را ھچ کدر ءُ ازت نیست، وھدے کہ ھمے چیز ترا چہ گستا کنگ بہ بیت ،گڑا تو آئی ءِ ازت ءُ کدر سرپد بئے·······

وھدے کہ ما چہ وتی دوست ءُ سنگتاں گِسر کنگ بہ اِیں، گڑا مارا آھانی دْرست شرّیں کار دیم ءَ کاینت ءُ یک ھرابی یے اوں مئے دیم ءَ نہ ئیت.

من گش آں مردم ءِ دْرستاں چہ شرتریں دوست تھنائی اِنت، پرچاکہ آ ترا دُرست ءِ نھاد ءُ کدر ءَ  پوہ کنت، تو وھدے کہ تھنا نہ بہ ئے، گڑا منی نِزّ ء َتو سرجمیں انسانے نہ بہ ئے، تھنائی ترا سرجم کنت اگہ تو سرجم بُوَگ بلوٹ ئے.

مرچی پد ءَ من تھنا آں، شپ سک تھار اِنت ءُ اِستالاں آزمان ءِ دیم رژن ءَ کتگ ، بَلے زمین انگت تھار اِنت·گشت کن ئے کہ انگت گلام اِنت.نزاناں کدی ماہ درکیت ءُ زمین ءَ اوں رژن ءَ کنت·

من ءَ ھما شپ سک گیر پیداک اِنت، گند ئے ما چوں سک کند اِت ،ھما شپ کہ من ءَ ءُ ترا  دگہ اوں یک سنگتے گوں اَت، ما کراچی ءَ رکشایے ءِ پشتء َسوار اِت اِیں، ھما ٹھکانی توار انگت منی باتن ءَ چہ دور نہ بوتگ اَنت،  کدی کدی انچو گُماں بیت کہ من ءُ تو لیمارکیٹ ء َ55 بس ءِ اسٹاپ ءَ ھما بیکری والا ءِ دکان ءِ کَش ءَ اوشتاتگ اِیں. تراگولڈیف سگریٹے دپ ءَ اِنت ءُ کسانکیں دستی رومالے اوں دست ءَ اِنت ءُ من ءَ میر اُمر میر ءِ کتابے دست ءَ  اِنت، ما 55 بس ءَ سوار بُوَگ ءَ اِیں. گند ئے بَس ءِ سوار بُوَگ ءَ گوں  من ترا گُشت یار بچار چونیں وشرنگیں جَنکے.

کجام ھماکہ گٹکا ورگ ءَ اِنت؟

 ھاھاھاھاھاھا تو کندگے جَت.

تئی ھمے گوں گٹکا ءِ گپّ ءَ منی ءُ تئی باوست[بحث] بندات بوت.

من گُشت کہ ایشی باریں سور کرتگ کہ نہ اگہ سور ئِے کرتگ، گُڑا ایشی ءِ مرد چوں گوں ایشی ءَ لَوو کنت؟

تو گُشت سنگت گپّے  زان ئے مئے چاگرد گلام اِنت گلامیں چاگرد ءِ تہ ءَ زالبول تھنا پہ سیکس ءِ واست ءَ جوڑ بوتگ اَنت ءُ گلامیں چاگرد ءِ  تہ ءَ مھر ءُ مھبت ءَ،  زالبولانی ھک ءُ لوٹانی ھچ بستار ءُ کدر نیست کہ یک زالبولے ءِ ھک ءُ آئی ءِ لوٹ چے اَنت، بس گلامیں چاگرد ءِ تہ ءَ زالبول پہ سکس ءَ جوڑ بوتگ اَنت ءُ دگہ اوں گپّے  زان ئے گلامیں چاگرد ءِ  تہ ءَ ھر چیز ءِ مانا چَپی بیت،۔ تو سرپد بوت ئے کہ گلامی چی یے ءُ کجام بوت؟

اے جَنِک ءِ شیپگیں پونز کُنڈیں بروان ءُ سبزرنگیں بادامیءِچم  اے دْرست تو گار ءُ بیگواہ کت اَنت ءُ ھچ تئی چماں نہ اتک بَس گٹکا اَتک…..؟ مزنیں گلامی ھمیش اِنت منی ساہ·······

اے گپ راستے کہ گلامیءَمارا چہ زانت آں زہبر کتءَ…..

پدا من تو میر اُمر میر ءِ شَیرانی دپتر بندات کت من تو انچو جُھلیءَ شُت اِیں کہ ھچ سما نہ بوت کہ من ءُ تو وتی منزل ءَ رَس اِت اِیں،

میر اُمر میر ءِ ھر یک لبزے ءِ پُشت ءَ یک دنیایے گندگ بیت.

اِد ءَ بچار میر چے گُشگ ء َاَنت.

میر تئی نیاد ءَ چے بِزاں دنیا

تو چو انسان ءِ مھر ءَ ارزانئے

گپّے زان ئے پد ءَ من میر اُمر میر سک ونت

بَلے من ءَ انچو گمان بوت میر درد ءِ امبارے········

بَلے من ءَ کدی انچو گُمان بیت کہ ما یکبرے پد ءَ مرچی گلامی ءِ پُچکاں کپتگ اِیں··········

من گُشاں گلامی سکّ ءَ سلیں بدیں زاھے  پہ گیرت مندیں مردماں، بچار گلامی ءِ ھلاپ ءَ مردماں چون چونیں گوں زوراکاں جنگ اِش کُتگ· اگہ ما الجزائر درور ءَ[مثال]َبزور اِیں کہ الجزائر جَنِکیں زھگاں ھم پہ وتی آجوئی ءِ واست ءَ دْرستیں بے سریں دود ءُ ربیدگاں پْروش دے اَنت ءُ وتی آجوئی لوٹُکیں گلانی ھمراھداری ءَ کن اَنت······

من الجزائر سر ءَ یک کتابے ونتگ کہ یک سمیرا نامیں جَنِکے کماندرے بیت، آ سک باز رَند ءَ فرانسیسی لشکر ءِ لگوریں سپاھیگاں دست گیر کنت، بَلے سیمرا یک رندے دزگیر کنگ بیت ءُ مزنیں مُدّتے ءَ  زندان ءَ بندیگ بیت، آئی ءَ گوں فرانسیسی لشکر وڑ پہ وڑیں زُلم کن اَنت.

ما کجام ھم راج دپتراں بچار اِیں کہ آود ءَ گلامی ءِ ھلاپ ءَ مردماں وتی دْرست یلہ کُتگ اَنت، اگاں ویتنام ءِ جُنز ءَ بچار اِیں  ویتنام ءِ مھلوک ءَ امریکہ ءُ فرانس ءِ وڑیں زوراکانی دیم ءَ چوں کوھانی دْروشم ءَ مک بوتگ اَنت·

من گشاں دنیا ءِ  تہ ءَ سیلیں زاہ گلامی اِنت دومی نیمگ ءَ بلوچ ء ُکُرد زندگیں درور[مثال] اَنت···········!!

کدی کدی گُمان بیت کہ من ءُ تو لیمارکیٹ ءَ سھادت ھوٹل ءَ بریانی لوٹائینتگ ورگ ءَ اِیں········

سنگت بَلے گپّے زان ئے کْور ءِ  آپ ءَ مئے بازیں سنگتے برتگ········ھما سنگت کہ ما گوں آیاں چاگرد ءُ راجی جُنز ءِ سر ءَ گپ ءُ باوست کرتگ اِیں ءُ مزاک ءُ مسکرا کرتگ اِیں بَلے مرچی ………؟

من ء َتئی ھما گپ سک دوست بوت کہ تو گُشت  مارا وتی زالبولانی ھک دیگی اِنت ءُ آیاناں چاگرد ءِ گلامی ءَ چہ آجو کنگی اِنت، بَلے آجو کنگ ءَ پیسر آھاناں اے سرپد کنگی اِنت کہ آجوئی چے یے؟

بَلے گپے زان ئے زالبولاں چہ گیش مردین سرپد کنگی اَنت ،پرچاکہ من سک باز  اسکریں شاٹ دیستگ آں کہ  بچک ننگ ءَ اَنت ءُ دومی پَد ءَ چون چونیں بدیں زاہ·······ترا باور کنت من ءَ پہ وانگ ء َلج بوتگ ءُ انچو گُمان بوتگ کہ انگلش سیزن  چلگ ءَ اِنت····اسپارٹکس·····پد ءَ مردم ءَ را ھمے درد بیت کہ اے اسکرین شاٹ  مزن شھدربرجاہ ءِ[یونیورسٹی] بچک ء ُجَنِکانی اَنت·

اے ورنا مئے راج ء ِباندات اَنت····ایشاناں وتی سُد ءُ سما نیست اَنت، ما انگت  گُش اِیں راج بَزگ اِنت. من گُشاں  اے ورنا چہ راج ءَ گیش بَزگ ءُ وار اَنت. انچو گُش ئے زاناں ورناھانی سینگءَ چاگی ءِ دلبند ءِ وڑ ءَ پاکستان ءِ ایٹم بمب ءِ چکاسے کپتگ یاکہ گُشت کن ئے افغانستان ءِ سرزمین اِنت آود ءَ امریکہ بمب اُرش کتگ···یاکہ طالبان ھمروچ وتکُش کنگ ءَ اَنت!

سنگت منی دیم ءَ یک نبشتانکے کپت آئی ءِ تہ ءَ من ءَ یک سک وشیں گپے دست کپت کہ بلوچ ورناھاناں وتی مات ءُ پتانی سُد نیست ما گُش اِیں زمین ئے! چونیں دردیگیں گپے گُششگ ئِے …

سنگت کدی کدی من ءَ ھمے گمان بیت کہ کْور ءِ آپ من ءَ بارت پرچاکہ موسم ھمے داب ءَ انت، نزاناں کدی بشام ءِ جمبر گوار اَنت کور آپ کار انت توپان بیت۔۔۔

 توپان من ء َبارت کُش اِیت ءُ پد ءَ دگہ زندگی یے  بکش ءَ ایت…..