ھچ وڑیں بیھار ءَ آئی ءِ بالاد نہ جَکسینت
نبشتہ کار: شیردل بلوچ
دی بلوچستان پوسٹ
زندگ بوتاں گندگ باں، راست گوش اَنت مردم ءِ یک مرومے نادراہ اِنت یکروچے جاندراہ بیت، اگاں بیگواہ ءُ زندان اِنت، پُشتپد دلمانگ اَنت یکروچے آجو بیت. بَلے ! مرگ ءِ بدیں ھالے مئیت، مرگ انچیں گرانیں ھبرے دراھیں واھگ ءُ مراداں ایرموش کنت
مُرتگ اَنت ھما کس کہ بے کرد بوتگ اَنت نام ءُ نشان اِش گار اَنت، بنی آدم ءِ سر ءَ مرگ ھست یکروچے اَلم مر ایت ، پہ گلامیں راج ءَ لِھپ ءِ تل ءِ مرگ پژن ءِ گپّے اگاں سیر واب بوت گڑا مُرتگ، وتی راجی گلامی ءِ مارشتاں سرپد بوت ءُ آجوئی ءِ زرمبش ءَ گوں اِنت ھمے جُنز ءِ تہ ءَ شھید بوتگ گڑا ھما وش بھت ءُ نمیران اِنت چہ مرگ رند آئی زند بندات بیت جھان ئِے زانت ءُ نام ئِے گِرگ بیت، مرچی بلوچ راج ءِ ھزاراں پُسگاں پہ وتی سرڈگار ءَ ندر بوتگ ءُ انگت بوگ ءَ اَنت پہ راج ءِ آجوئی ءَ گڑا ھما پُسگ راجدپتر ءِ تاکانی تہ ءَ ھست اَنت،چہ ھمے نمیرانیں پُسگاں یکے شھید اکیل جان اُرپ آزاد بلوچ اِنت واجہ دلمراد بلوچ ءِ گس ءَ ھژدہ اُستپان نوزدہ سد ءُ نود ءَ آواران ءِ دَمگ گیشکور سُنڈم ءَ ودی بوتگ ـ
آزاد جان یک وش تب ءُ مھروانیں سنگتے اَت مُدام دیوان ءَ ئِے بہ نشتیں ءِ دل ءَ چہ دیوان ءَ پاد آیگ ءَ نہ گوشت، مزاک ءُ ھندگ دیوان ءِ بھَر اَت اَنت، ساپدلیں ءُ بے دروریں سنگتے اَت مدام بہ دیستیں گوِں راجی جُنزھے کاراں دست گلائیش اَت، تمرد ءُ مُھکمیں سنگتے اَت.
زمین چنڈ ءَ رند کمک ءِ ھاتر ءَ اتکگیں پوج آجوئی لوٹوکیں گلانی باسکانی پُشت ءَ کپتگ ءُ کھولاں لاچار کُتگ اَنت مردم گپتگ ءُ زندان کرتگ اَنت لوگ ءُ جاہ مانداشتگ اَنت، ھمے وھد ءَ واجہ دلمراد ءُ گوں دگہ کھولاں وتی پت ءُ پیروکی ھنکیں ءِ یل کنگ ءَ لاچار بیت ءُ لڈّیتگ،
بَلے لھتیں سال ءَ رند ماں کراچی ءَ رئیس گوٹھ ءَ ھنکیں بوتگ ـ
لگور بوتگیں مردم پوج ءَ ھوار بنت آزاد بلوچ ءِ کھول بیھار ءَ دے اَنت گوشاں آزاد بیت ءُ سرنڈر بہ کن نیایگ ءِ شرت ءَ شمار ءَ تاوان دے ایں ، آئی ھمے گوشت “ لگوریں بوتگیں مردم منی کھولاں بیھار دیگ ءَ اَنت من آوان زانت منی زِد ءَ کنگ ءَ اَنت من ھمے درگت ءَ وتی گل ءِ زمہ داراں گوں ھال کتگ لگور بوتگیں بدواھانی نام دیم ءَ پدر کرتگ اَنتـ
وھدیکہ دوھزار نوزدہ ءَ راجی ھواریں گل براس ءِ جنگولاں بُزی ءِ کنڈگ ءَ دّگ ءَ بند کنت ءُ چہ مساپر کَشیں بساں دار اَنت ءُ پوج ءِ چاردہ کارمند دزگیر ءُ پجار کنگ ءَ رند کُشتگ اَنت گڑا ھمے اُرش ءَ رند لشکر ءُ چیریں کارمنداں “ آزادجان ءِ ھشت مردم چست کت، سے برات ئِے بنت ھپیزجان، ھنیپ جان ءُ ھمیدجان ، چار دگہ تروزتک بنت “ زاکرجان، پرویزجان، بھار ءُ نجیب جان ھشتمی کھول مردمے امداد جان بوتگ ، یکرندے پد ءَ پوج ءُ دلاریں میر ھمے لوٹ ءَ کن اَنت شمئے چست کتگیں زھگ انچو یل دیگ بنت،
آزاد“ بیت سلاہ دَور بہ دنت آئی ءِ پت ءُ ایدگہ کھول ءِ مردم ھمے گوش اَنت آ مئے گپّ ءَ نئیت ، پوج ءِ آپیسرے ھمے گوشتگ ،
آگاں آزاد نیاتکیں شمئے چست کتگیں چُک یل کنگ نہ بنت شما وتی زھگاں لوٹ ات آزاد ءَ بہ گوش اِت بیا، ھمے میانجی ءَ سرکار ءِ داشتگیں میرے گوانگو شمار ءَ جاھے ءَ پچ گپتگ ءُ گپّ ئِے کرتگ ءُ گوشتگ بیا
سلاہ دَور بہ دے تئی برات یل کنگ بنت، آئی ھمے گوشتگ من وتی گس ءَ بابت جیڑگ ءَ نہ آں کومے بابت ءَ جیڑگ ءَ آں، پت، برات ءُ کھول ءِ مردم من دیریں دَر اتگاں، دل ءَ ایکیم کن اَنت ءُ ایدگہ کھول مردماں گڑا یل کن اَنت دو برات ئِے زنداں بوتگ وھدیکہ آزاد“ شھید کنگ بیت یک ماھے تہ ءَ بندیگیں دوئیں برات ئِے آجو کنگ بنت ـ
آزاد یک انچیں آشوبی سنگتے اَت مدام راجی ءُ سِیت ءُ تاوان ھیال داشتگ ھچ وڑیں بیھار ءَ آئی مُھکمیں بالاد نہ جَکسینتگ اَت، استان زّر زُرتیں دلاراں ماں ایران سراوان ءَ اتک اَنت ءُ شھید اِش کت، نُہ کرا دوھزار بیست ءَ مھروانیں سنگت دائمی جتا کنگ بوت اِنت، سھریں سلام پیش کناں شھید اکیل جان اُرپ آزاد بلوچ ءَ ھور دراھیں بلوچ سرڈگار ءِ شھیداناں ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
