شھید ستار جان
نبشتہ : واجُل دشتی
دی بلوچستان پوسٹ
بلوچ راجی جُنز ءِ توک ءَ ھزارانی کَچ ءَ بلوچ مھلوک ءَ دیمونی داتگ ءُ اے دِرچ انگت بَرجاہ اِنت بلے لھتے انچیں نام ءُ انچیں کارست اھست کہ آھاں پہ راج ءُ سرڈگار ءَ وتی تَنگھیں ارواہ نَدر کتگ اَنت ءُ آھانی درگت ءَ کَس نہ زانت یاکہ سک باز کم مردم زانت دومی لَبزاں گوں آ (گمنام) شھید اَنت، شھید ستار جان ھم چراھاں چہ یکّے کہ آئی ءِ درگت ءَ سک باز کم مردم سرپد اِنت کہ راجی بامَرد ءُ جُھدکارے بوتگ-
تربت شھر ءَ بی ایل ایپ ءِ 2009 ءَ بگر داں 2011 ءِ گُڈی روچانی کارانی زکر بہ بیت گڑا منی ھیال ءَ آ گیشتریں کار بید ء ستار جان ءَ ناسرجم اَنت اگاں آ مہ بوتیں بوت کنت کار آ وڑ مہ بوتین اَنت-
من ءُ ستار یکیں لوگ ءَ بوتگ اِیں بلے من ھم اے راستی ءَ سرپد نہ بوتگ آں کہ آ یک جُھدکارے، گڑا دوھزار دہ ءَ ماہ من ءَ یات نہ اِنت شھید باھڑ ءَ من ءَ پون کُت ءُ کارے ءَ گُشت من پسّہ دات کہ من ءَ اولاک گون نیست گڑا پہ من ابکّھی گپ ھما وھد ءَ بوت کہ آئی ءَ گشت برو ستار ترا پرپٹ ءَ دنت تو ھمود ءَ برو ستار ءَ پون ءَ بدئے من آئی ءَ وت گُش آں گڑا من ھمے وڑ کُت، اے اوّلی رند ءَ کہ من سرپد بوگ ءَ اِتاں کہ ستار گوں جُھد ءَ بندوک اِنت پرچا کہ باھڑ اے وھد ءَ یاگی اَت ءُ آئی ءِ سرجمیں کھول ءَ آئی ءِ گوما وتی ھال ءُ اھوال ھلاس کتگ اَت، ستار ءِ ھال کہ گوں آئی ءَ ھست اَت تا من زانت کہ ستار انچنائیں مردمے نہ اِنت-
بلوچستان لبریشن پرنٹ ءِ سرمچار شھید ھلیم جان پنام ء باھڑ بلوچ ھما نام اِنت کہ ھچ توسیپ ءِ مھتاج نہ اِنت ،ستار جان شھید ھلیم ءِ مستریں برات اَت ءُ تربت ءِ مین بازار ءَ الیکٹرک ءِ مستریں دوکان ھمائی ءِ دوکان اَت ءُ لوگ ءِ زمہ واری ءُ کاروبار ھمائی ءِ کوپگان اَت اے درستاں چہ ابید آ یک جھدکارے اَت (گمنام) جھدکار-
ستار ءَ پہ سنگتانی نِندگ ءُ جاگہ کنگ ءِ ھاتر ءَ تربت شھر ءَ دو کوٹی ءِ لوگے باڑہ زُرتگ اَت، باڑہ ءُ سنگتانی کُلیں ھرچ ءُ درچ ھمائی ءِ سر ءَ اِت اَنت، سنگت چہ دوریں جاگھاں اتک اَنت ھمے لوگاں آھاں داشت ءُ شھر ءَ کار کنگ ءَ پد واتر شت اَنت سنگتاں کہ شھر ءَ پُترگ ءُ کار کنگی بوتگ گڑا آھاں شھر ءِ نزیک ءَ داشتگ ءُ ستار ءَ وتی بولان گاڑی ءِ سر ءَ آ شھر ءَ بُرتگ ءُ سر کتگ اَنت ءُ کار ءَ چہ پد ستار ءَ سنگت گاڑی ءَ کتگ اَنت ءُ شھر ءَ ڈن سر کتگ اَنت، سنگتانی واتر برگ ءِ وھد ءَ بولان گاڑی چہ مڈی ءُ وَردنی شے ءَ پُر بوتگ کہ آئی ءَ پہ سنگتاں زُرتگ اَنت، باھڑ ءَ کہ ھروھدے کارے بوتگ زَرّے یا سامانے زلورت بوتگ گڑا آئی ءِ پون پہ ستّار ءَ شُتگ سک باز سنگت ءِ کسان کسانیں مڈی ءِ زمہ ستار ءَ وتی کُوپگاں زرتگ اَت-
ستار ءَ پہ راجی جُنز ءَ بے بھائیں کار کتگ بلے داں گُڈی روچ ءَ آ زانگ نہ بوتگ، ھژدہ نومبر 2011 ءَ پاکستان ءِ چیریں ادارہ آئی ءِ کستریں برات مُکتار ءَ آوار جَنت بلے ستار ءِ جزبگ پروش نہ ورت ءُ آ تمرد ءُ مھکم بیت گُڈسر ءَ ھشت دسمبر 2011 ءَ پاکستانی لشکر ءِ کُشندہ ٹولی ءِ کارمند آئی ءِ سر ءَ ھما وھد ءَ تیرگواری کن اَنت ءُ شھید کن اَنت کہ آ سُھب ءِ سر ءَ وتی دوکان ءَ پچ کنگ ءَ بیت ءُ تیرگواری ءِ آسر ءَ ستار جان جاہ پہ جاہ شھید بیت، من ءَ ستار ءِ شھادت ءِ ھال شھید دادجان شیھو ءَ داتگ اَت من ءَ پون ئِے کتگ اَت کہ باھڑ ءِ براتے کُشندہ ٹولی ءَ جتگ بلے آ وت پکّا نہ اَت کہ کجام برات اِنت مُکتار ھم انگت بیگواہ اَت من گشت بوت کنت مُکتار اِنت بلے رَند ءَ ما سرپد بوت ایں کہ ستار شھید کنگ بوتگ-
2012 ءَ شھید باھڑ جان تربت ءَ گَل ءِ کارے ءَ اتکگ اَت بلے اے رَند ءَ انچو گمان بوگ ءَ اَت کہ آئی ءَ چیزے گار کتگ آئی ءَ گشت کہ بید ء ستار ءَ مئے سک باز کار اوشتاتگ ءُ ناسرجم اِنت ءُ نو من ھم ستار ءِ ارزشت ءَ سرپد بوان اِتاں، باھڑ ءَ گشت کہ من کوہ ءَ بوتگاں اوتاگ ءِ سربوگ ءَ گوں گنداں دراھیں سنگت یکجاگہ نِشتگ اَنت ءُ اوتاگ ءِ زمہ وار تران کنگ ءَ اِنت من مارِتگ کہ مروچی الّم چیزے بوتگ ءُ منی سربوگ ءَ گوں سنگتاں من ءَ ھال دات کہ ستار شھید کنگ بوتگ بلے من ءَ آئی ءِ شھادت ءَ چہ گیش ھمے درد بوت کہ تربت چورہ بوتگ ءُ مئے تربت ءِ سک باز کار لھتے وھد ءِ واستا اوشت ایت ءُ تربت ءِ توک ءَ مارا ستار ءِ مَٹ دست نہ کپ ایت-
باھڑ ءَ گشت کہ مُکتار ءِ آوار جنگ ءَ کمو پیش ستار ءِ گوما ھال بوتگ آئی ءَ گشتگ کہ من لوگ ءُ کاروبار ءِ دراھیں زمہ واریاں مُکتار ءَ دیاں ءُ من ھمانگر کوہ ءَ کایاں وھدیکہ مُکتار آوار جنگ بیت گڑا آ اے گرانیں ساھت ءَ وتی لوگ ءِ مردماں یلہ دات نہ کنت ءُ شھر ءِ توک ءَ گُل ءِ کاراں دیم ءَ بران کنت داں گُڈی ساھت ءَ گوں راجی جُنز ءَ مُکلس ءُ ایماندار بیت-
شھید ستار جان ءِ وڑ ءَ دگہ سک باز راجی بامرد ھست کہ گمنام اَنت بلے آھاں اے مِسکیں ھاک شر پجّاہ کاریت ءُ زانت-
تربت مروچی چورہ اِنت تربت ءَ یکرندے پد ءَ ھلیم جان ءُ ستار جان ءِ وڑیں بامرد پکار اِنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
