چیف سیکریٹری بلوچستان شکیل قادر خان اور آئی جی پولیس محمد طاہر نے چیف الیکشن کمشنر کو آگاہ کیا کہ این اے 256 میں سیکیورٹی کی صورتحال بدستور غیر مستحکم ہے اور انتخابی عملے اور ووٹرز کی مکمل سیکیورٹی کو یقینی نہیں بنایا جاسکتا۔ اس لیے اس حلقے میں ضمنی انتخاب کا انعقاد فی الحال ممکن نہیں۔
الیکشن کمیشن آف پاکستان (ای سی پی) کا اجلاس چیف الیکشن کمشنر سکندر سلطان راجہ کی زیر صدارت الیکشن کمیشن سیکرٹریٹ میں ہوا۔
اجلاس میں ای سی پی کے ارکان، چیف سیکرٹری اور انسپکٹر جنرل پولیس بلوچستان، سیکرٹری الیکشن کمیشن اور دیگر اعلیٰ حکام نے شرکت کی۔
الیکشن کمیشن کو بتایا گیا کہ این اے 256 خضدار کی نشست سردار اختر مینگل کے استعفیٰ کے بعد خالی ہوئی تھی جس کے بعد ای سی پی نے 13 فروری 2026 کو انتخابی پروگرام جاری کیا تاہم پولنگ سے قبل ضمنی انتخاب کا شیڈول 27 مارچ 2026 کو بلوچستان حکومت کی جانب سے قانون سازی اور حالات کی خرابی کی وجہ سے ملتوی کر دیا گیا تھا، ۔
ای سی پی نے کہا کہ وہ اب ضمنی الیکشن کرانے کے لیے تیار ہے اور چیف سیکریٹری اور آئی جی بلوچستان سے کہا کہ وہ کمیشن کو حلقے میں امن و امان کی موجودہ صورتحال پر بریفنگ دیں تاکہ انتخابی عمل کو مکمل کیا جاسکے۔
بریفنگ کے دوران چیف سیکرٹری اور آئی جی نے کمیشن کو بتایا کہ دہشت گردوں کی موجودگی، قبائلی تنازعات اور دیگر اضلاع سے پولیس اور دیگر قانون نافذ کرنے والے اداروں کو تعینات کرنے کی ضرورت بڑے چیلنجز ہیں۔ انہوں نے مزید کہا کہ یہ حلقہ پہاڑی علاقوں پر مشتمل ہے اور مجموعی طور پر سیکورٹی کی صورتحال غیر مستحکم ہے۔ اس لیے فی الحال ضمنی الیکشن کا انعقاد ممکن نہیں اور نہ ہی انتخابی عملے اور ووٹرز کی مکمل سیکیورٹی کو یقینی بنایا جا سکتا ہے۔
چیف الیکشن کمشنر سکندر سلطان راجہ نے کہا کہ آئین اور قانون کے تحت الیکشن کمیشن این اے 256 خضدار میں ضمنی انتخاب کرانے کا پابند ہے، کمیشن بریفنگ کی روشنی میں مناسب فیصلہ کرے گا۔
اجلاس کو کوئٹہ کے بلدیاتی انتخابات پر بھی بریفنگ دی گئی۔ بتایا گیا کہ کوئٹہ میں مقامی حکومتوں کی مدت 27 جنوری 2019 کو ختم ہوئی، ای سی پی نے دو بار حد بندی کی اور تین بار انتخابی پروگرام جاری کیا، لیکن انتخابات نہیں ہوسکے۔
الیکشن کمیشن نے اب کوئٹہ میں حد بندی کا عمل مکمل کر لیا ہے اور بلدیاتی انتخابات کرانے کے لیے تیار ہے۔ کوئٹہ کے بلدیاتی انتخابات کا شیڈول جون 2026 کے دوسرے ہفتے میں جاری کیا جا سکتا ہے۔
مزید کہا گیا کہ الیکشنز ایکٹ کے سیکشن 219(3) اور بلوچستان لوکل گورنمنٹ ایکٹ کے سیکشن 16(2) کے تحت کوئٹہ میں بلدیاتی انتخابات کے انعقاد کے لیے صوبائی حکومت سے مشاورت لازمی ہے۔ اس لیے اجلاس کے دوران مشاورت کی گئی۔
چیف سیکرٹری نے کہا کہ یہ معاملہ آئندہ صوبائی کابینہ کے اجلاس کے ایجنڈے پر رکھا گیا ہے تاکہ امن و امان کی صورتحال اور دیگر متعلقہ امور کے پیش نظر فیصلہ کیا جا سکے۔
الیکشن کمیشن نے صوبائی حکومت کو ہدایت کی کہ وہ مشاورت اور فراہم کردہ انتخابی شیڈول کے حوالے سے جلد از جلد ای سی پی کو اپنے موقف سے آگاہ کرے، تاکہ کوئٹہ میں بلدیاتی انتخابات آئین اور قانون کے مطابق کرائے جا سکیں۔
