عبداللہ عبداللہ تین روزہ دورے پر پاکستان پہنچ گئے

252

افغان مفاہمتی کونسل کے چیئرمین تین روزہ دورے پر پاکستان پہنچ گئے، پاکستان کے  مشیر تجارت عبدالرزاق داؤد نے ڈاکٹر عبداللہ عبداللہ کا استقبال کیا۔

 پاکستان کے ترجمان دفتر خارجہ کے مطابق دورے کے دوران ڈاکٹر عبدﷲ عبدﷲ وزیراعظم، صدر، چیئرمین سینیٹ، سپیکر قومی اسمبلی، وزیر خارجہ اور دیگر اہم شخصیات سے ملاقات کریں گے۔

ڈاکٹر عبدﷲ عبدﷲ انسٹی ٹیوٹ آف سٹرٹیجک سٹڈیز اسلام آباد میں اہم خطاب اور صحافیوں سے بات چیت کریں گے۔ قومی مفاہمت کی ہائی کونسل کے چیئرمین کی حیثیت سے ڈاکٹر عبداﷲ کا یہ پہلا دورہ پاکستان ہے۔

دورے سے افغان امن عمل کے تناظر میں بات چیت، پاکستان اور افغانستان کے درمیان دو طرفہ تعلقات اور عوامی سطح پر روابط مستحکم بنانے کا موقع ملے گا۔ ڈاکٹر عبدﷲ عبدﷲ کا یہ دورہ دونوں ملکوں کے درمیان باہمی ہم آہنگی، بھائی چارے اور قریبی روابط کے فروغ میں مددگار ہوگا۔