نیاڑی و توفک | ارٹمیکو بشخ – برتولت بریخت | محبوب شاہ

74

نیاڑی و توفک
ارٹمیکو بشخ


نوشت: برتولت بریخت، جرمنی | مَٹ: محبوب شاہ

دی بلوچستان پوسٹ

اولیکو بشخ

لمہ: (تینا مار آن ارّفک) راست پاس، او نے انت پارے کہ او دانگ انت اکن بسنے؟
مار: آخا، آئی! ہچ پاتو۔

(مزور بالٹین اس پر دیر انا ہرفک، تولیہ ءِ بج آ شاغک۔ تہٹی بریک و مون دُو کیک۔)

لمہ: مگہ پیر انگا لوپ اَرغ زئیفہ حیات ءُ؟
مزور: جی آؤ، خالی زندہ ءُ۔ (مارکو آن سوج کرے) انت نما خلق انا بھاز آ ورناک جنگ اکن پڑ آ ہنانو؟
مار: جی آؤ، بھاز آک ہنانو۔ بھاز آک سنبرینگوک ءُ۔
مزور: ننا پارہ غان ہم یتھولک آتا اسہ بھلو کچ اس ہنانے۔
مار: داکان ہم ہنانو۔
مزور: گڑا کل اتون توفک ارے؟
مار: کل اتو اف۔
مزور: داتو جوان ءُ ہیت اس اف۔ توفک جنگ اکن المی ءِ مگہ خلق اٹ مخلوق تون توفک ارے؟
لمہ: (مار آن مست زُو زُو پارے) آخا اف۔
مار: منہ بندغ ہندن ءُ چاہندار اریر، ہراکہ ڈغارنا تل اٹ کھڈ کرینوتا دنکہ پٹاٹہ ءِ کھڈ کیس۔
مزور: جوان جوان۔

(مارکو دریچہ غان ایپار ہننگ آ خننگک)

لمہ: ہرانگ ہننگ اُس؟
مار: بس ہنداڑکنٹ۔
لمہ: نی پدی دریچہ نا پارہ غا ہن۔

(مارکو چپ کیک)

مزور: انت مس؟
لمہ گڈیکو دریچہ غان مُر انتئے ہننگ خواسہ؟
مزور: انتئے پیشن کس اس ارے؟
مار: آخا کس اف۔

(مُر آن توپ آتا توار بریک)

چناتا توارک: یان سپاہی اس اف۔ انتئے کہ اوٹی جنگ انا جیرت ہم اف۔ یان لغور اسے۔ او تینا کاٹم ءِ خیری ٹی ڈکک۔

(مسہ چنا نا کاتم دریچہ غان خننگرہ)

اولیکو چنا: داکان نرہ۔
لمہ: (دریچہ نا پارہ غا کاہک، چنا ءِ پائک) اگہ نی کنا دوٹی بسس، ای نے ہندن خلیو کہ جوان سما تمے نے۔ بدمعاش کہ نی اُس۔ دافک پیریز نا خاہوت آن ءُ۔

(چُپی)

مزور: مگہ نی داسکان جنگ کیسہ؟
مار: (مخسا) مگہ نی چنکی ٹی جنگ کریسہ؟
مزور: کن تون ہندا وَڑ مسنے، مڑوئی جنگ اٹ ہر گڑا روا ءِ۔

(لمہ اودے مچٹ شک بر اُرک)

مار: ولے دا بھاز گندہ ءُ گڑاسے۔
مزور: جوان نی جوان کریس کنے پاریس، داسہ کنا ءِ بن، کنا مار۔ نر زوری جوان ءُ گڑاسے، نی نرزور تو اریس ولے ہشار افیس۔
مار: ہمو وخت اسکان بندغ سرسہب مننگ کپک تاکنہ اوٹی جیرت مف۔
لمہ: داوڑ انا کسہ غاتے او تینا باوہ غان ہیل کرینے۔ اسہ جوان ءُ بندغ اسے خطرہ غا تتون مون تروئی تمک۔
مزور: جی آؤ نی راست پاسہ۔ ڈون مسی کون اسہ وار اس ہفتاد بزگر تون شڑت خلک، باتس۔ ایلو زند ءِ تینا دوانزدہ مے انا سواب اٹ گدریفے۔
مار: ای ہم اندا وَڑ انا شڑت خلنگ خواوہ۔ کنا دا گڈیکو وار ءِ۔
لمہ: کنا مار! نا باوہ ہمو وخت آغوٹ آن درکا کہ ہرا وخت کہ جار اڑینگاکہ۔
مزور: مننگ کیک ہمو وخت اوڑتون پین جار اَلو۔
لمہ: اوڑتون پین زند ہم اَلو۔

(درگہ غا اسہ ورناس بریک، اونا مون ٹھپی ٹوری ءِ۔ اونا دُو اسے آ ریڑھ اس لڑونج ءِ)

لمہ: پاؤلو تہٹی بر
ٹھپی: نم است اٹ پارورے کہ ای ریڑھ اسے کن ولدا بسٹ۔
لمہ: ہچ ءُ ہیت اس اف کنا چنانے ولدا ہم دو بریک۔
(او تہٹی بریک)
مزور: اڑے نا ٹھپ آک ہرادو؟
ٹھپی: چپیکو دُو آٹو۔

(لمہ اسہ رینگڑءُ کوس اس اتیک۔ اودے ٹکر ٹکر کیک۔ اوڑان چندی ریڑھ جوڑ کیک)

لمہ: کنا مار! چاوہ کہ نی اینو ولدا کاریم کرینس۔
ٹھپی: جی آؤ، خالی راست دُو اٹ کرینٹ۔
لمہ: ولے نے پاننگاسس کہ نے کاریم کننگ نا موکل اَف۔
ٹھپی: نن تو ہچ اف۔ مخلوق پاننگ ءِ کہ اینو نوا گڑاس کن خور کن برے۔
مزور: ای تو پاوہ دن اف۔ توپ آتا درامب دریپ اینو کل گڑاتے بدل کیک۔
ٹھپی: آھو، دا تو راست ءِ۔
لمہ: انت نے تکلیف ارے، اگہ دڑد ئس تو پاس ای اسہ بے مَٹ ءُ نرس اس افٹ ولے اخس کہ مس ای کیوہ۔
مار: مگہ مخلوق میڈرڈ آن بننگ کیک؟
ٹھپی: ہچ پاننگ کپرہ۔
مار: نہ گڑا نہ گڑاس تو پاننگ مریک۔
ٹھپی: (پام کرسا) آؤ نی تو کل کوس ءِ ارّاس، نے دن کروئی اَلو۔
لمہ: نی انت پاسہ، گڑا ای ٹھپ آتے کن خازگی ءُ ریڑ اتوسٹ۔
ٹھپی: ولے نے تون پین تخوک ءُ کوس ہم اف؟
لمہ: ہراکہ کن تون ارے، او تخوک ءُ ولے دانا ایلو دُوا کن بس اف۔
ٹھپی: ایلو وار دانا پام ءِ کروٹ۔ (جک سلک)
مزور: دا کچک آتے سرسہبی کن اِلوئی اف۔ (راہی مریک)
لمہ: ابو ءِ توپ آتا توار ءِ۔
مار: ونن مچھی ہلنگ اٹ گٹ اُن۔
لمہ: نی شکر کشہ داسکان نی ٹکر ٹکر متنس۔

(پیشن غوغا و توار توار زیات مریک۔ گاڈی تا توار توار، شیئر و دمبورہ غاتا توارک۔ مزور و مارکو دریچہ غا خڑک آ جک سلرہ، و پیشن ہُررہ۔)

مزور: دا انٹرنیشنل بریگیڈ ءِ۔ دا موٹیریل نا باتننگ آن پد پڑ آ ہننگ ءُ۔

(ہنداڑتون توار بریک۔ داسکان اُرا بھاز مُر ءِ)
مزور: دا جرمنی ءِ۔
(مار سیلز نا شئیر نا توار)
مزور: دا فرانسیسی مس۔
(پولش ءُ نظم اس)
مزور: دا پولینڈ ءِ۔
(اطالوی ءُ شئیر اس)
مزور: دا اطالوی ءِ۔
(قلعہ نا رکھ ءِ کبو)
مزور: دا امریکی سے۔
(اسپنی ءُ شئیر اس)
مزور: دا ننا بندغ آک ءُ۔

(گاڈی تا توار شئیر تیٹی پنک۔ مزور مارکو پدی بریرہ۔)

مزور: اینو نا نن گڑاس مریک۔ کنے داسا داکان ہنوئی ءِ۔ ہوزے! دا گڈیکو دستہ ءِ۔
لمہ: (میز آ بریک) اخر دیر کٹا؟
مار: اوفک۔
لمہ: گڑا ای نا جاگہ ءِ شاو۔
مزور: کنے ہنوئی ءِ۔ (ولے تولوک ءِ)
لمہ: روزا ءِ کنا پارہ غان مہر ایتس۔ اودے فریشان مننگ نا گرج اف۔ مون نا ننے ہچ سما اف۔ کہ انت مریک؟
مار: ای نے کن اِرغ نا کپ اس اتیوہ۔
مزور: دانا گرج اف۔

(لمہ دریچہ غان پیشن ہُرک)

لمہ: امر جوان ئس کہ نی یان ءِ خنوسس۔
مزور: کنا ہم ہندا است خواہسکہ ولے او ہُرے کیک۔
لمہ: او بھاز مُر ہنانے، ولے نن اودے خواہفنگ کینہ۔

(درگہ غان اسہ تولوک ءُ مسڑ اس بریک۔)

مار: بخیر اٹ، مینو بیلا (مسڑ نا خف اٹ کرار آ پائک) دا مسڑ یان انا سنگت ءِ۔ (مسڑ ءِ پائک) دا پیڈرو ماما ءِ۔
مسڑ: یان ہرادے؟
لمہ: یان کاریم آ ہنانے۔
مسڑ: ننا وا خیال ئس کہ نم اودے کندرگارڈن آ پومپ گوازی کننگ کن راہی کرینرے۔
لمہ: نہ او مچھی ہلنگ کن ہنانے۔ یان اسہ ماہی گیر اسے۔
مسڑ: او اسکول اٹ مروک آ میٹنگ اٹ انتئے بشخ ہلتو۔ اخر اسکول اٹ ایلوفک ہم تو مچھی ہلوکءُ۔
لمہ: اونگ ہننگ آن اونا ہچ اس گوہنگتو۔
مار: انت ئسے نا میٹنگ ئسکہ؟
مسڑ: داٹی فیصلہ مس کہ ہنوک آک اینو نانن پڑ آ کار۔ یان بننگ کن کن تون سوغند کریسس۔
مار: دن مننگ کپک۔ نہ تو یان ہچ گہس مچھی ہلنگ کن ہنتوکہ۔ لمہ! مگہ نی اودے بے وس کریسس۔

(لمہ چپ تولک، او کرار آ تندور نا خڑک آ زمبرینگک تینے جوکہ کیک)

مار: داسہ کنے سما تما کہ نی اودے مچھی ہلنگ کن انتئے راہی کریس؟
لمہ: خدا بندغ کن کسب جوڑ کرینے۔ کنا مار اسہ مچھی ہلوک اسے۔
مسڑ: نا دو آن مچ آ خلق انا مونا آ مخوئی مسن۔ ہرانگ کہ کاوہ مخلوق کنے آ اوڑو کیک۔ داسہ ای یان انا پن ءِ بنوہ کاٹم کنا خل کیک۔ ابوئے اخر نم ہرا وڑ ءُ بندغ اُرے۔
لمہ: نن غریب و بے وس اُن۔
مسڑ: کل جنگ کروک آ ورناتے پرمان کننگانے کہ اوفک توفک ہرفر، گڑا نی دافتے خوانتنس؟
لمہ: ای خواناسٹ تے۔ دا حکومت مرے یا اوفک، اخیر اٹ ننے دُپ اسے نا زی آ بٹرہ۔ ہندا سوب آن ای خواپرہ کنا چناک تینے تینا دو اٹ دُون اسے نا کھڈ اٹ بٹر۔
مسڑ: نی دا خواسہ پین اس اوفتے دیوال نا زی آن چغل ایتے۔ دن ءُ بے چیتائی ای تینا مچ زند اٹ خنتنٹ۔ دانے کون انگا بندغ آتا قصور ءِ کہ ہیت بھاز مون آ ہنا۔ و دا ہوکم لاناؤ نا داخہ جیرت مسنے کہ او داسہ ریڈیو آ تران کیک۔
لمہ: ای سگنگ کپرہ۔ کس اس کنا اُراٹی دا وَڑ انا ہیت کے۔
مسڑ: مگہ نی جنرل آتیان خوش اُس۔
مار: (ترند آن پارے) آخا دا خوش اف ولے او خواہک کہ نن جنگ اکن ہنپن۔
مزور: مطلب نم کس انا کنڈ آن افّیرے۔
لمہ: کنے سما ءِ کہ نی کنا اُراٹی سازش کننگ خواسہ۔ ای خواپرہ کہ یان ءِ اسہ کنڈ کیو۔ اے کنا خدا! وخت اس نن ہم آسودہ مرون؟
مسڑ: و نا بارو اٹ تو دا پاننگک کہ نی تینا اَرغ ءِ اوویڈو نا پڑ آ راہی کننگ آن مست کمک تسوسس۔
لمہ: (کرار آ) تینا با ءِ تور، ای ہچ کمک کتنٹ۔ دا کل دروغ ءُ۔
مسڑ: خلق انا کل بندغ آک دا ہیت ءِ منرہ کہ کارلوکارار اسہ نرزور ءُ بندغ اس ئسکہ۔ ولے او نن تیٹی چپ چپانی ٹی ہناکہ دا ہم ننے سما ءِ۔
مار: ننا باوہ وخت اس ہم ڈکوئی اٹ ہنتنے، مینو بیلا۔
لمہ: ہوزے نی چُپ کر۔
مسڑ: تینا مار ءِ پاس، نے تون داسہ کنا ہچ ءُ تعلقداری اس اف۔ و داسہ ہچ ضرورت اف کہ او کنا مون آ برے۔ ای اوڑان ارّفنگ کیوہ کہ او ہمینگ انتئے ہنتو۔ ہراڑے کہ اونا ہننگ نا گرج ئسکہ۔

(مسڑ پیش تمک)

مزور: ٹریسا! نے دا مسڑ ءِ دا وڑ ہننگ کن اِلوئی اَلو۔
لمہ: ای تو پاوہ کہ شڑت خلکنے کہ او ہر وَڑ اٹ دافتے پڑ آ راہی کیک۔ ای یان ءِ توار کیوہ، یا ہوزے نی توارکرتے۔ آخا اِلے تے۔ ای تینٹ توار کیوہ تے۔

(کاہک)

مزور: ہوزے! ای تو پاوہ کہ نی دا آمخی تیٹی بٹپیس تینے۔ او دانا ہچ ءُ گرج اس ہم اف۔ نے کل ءِ پہہ کروئی ءِ۔ ہندا سوب آن دا پا کہ او ہراڑکنے۔
مار: دیر؟
مزور: توف؟
مار: ابا والا؟
مزور: جی آؤ۔ دادے ہنداڑے مروئی ءِ، داڑان بیدس ہنپروٹ۔
مار: گڑا نی دادے دننگ کن بسنس؟
مزور: ہلہ پین انت اسے کن بسنٹ۔
مار: او نے اسُل تفک تے۔ او اودے ڈکانے۔
مزور: ہراڑے؟

(مارکو کنج انا پارہ غا اشارہ کیک۔ مزور زُو بش مریک۔ ہمو پارہ غا ہننگ خواہک کہ گام تا بننگ نا توار بریک)

مزور: (زُو زُو ولدا تولک) امر ءُ چُپی اسے؟
(لمہ خلق انا پادری تون اوار بریک۔ او اسہ بڑزو لواڑ ءُ بندغ اسے۔ کلف خلوک ءُ کاٹن پچ بینانے۔ ہوزے آ سلام بٹک۔ ولدا مزور نا پارہ غا سلام بٹک۔)
لمہ: پادری! دا کنا ایلم ءِ۔ ہراکہ موٹیرل آن بسنے۔
پادری: نے خناٹ خوش مسٹ (لمہ تون) کنے اسہ ضروری ءُ کاریم اسے ٹی ہنوئی ءِ۔ گڑا دُن مننگ کیک کہ پگہ نیمروچ تون ریلو خاہوت تون مِلس۔ چناک تے اسُل تنیا ءُ۔ توری لو نا اَرغ تو پڑ آ ہناسس۔
لمہ: جی آؤ۔ ای ضرور بریوہ۔
پادری: (مزور آن ارّفک) نما علاقہ ٹی حالیت آک امر ءُ؟ بنگنن کہ دا جاگہ موٹیرل نا نیامٹ رابطہ بھاز سخت ءِ۔
مزور: جی آؤ۔ داڑے تو بھلو آسراتی اسے۔ انت پاسہ ارے یا آخا؟
پادری: انت پاننگ اُس؟
لمہ: پیڈرو ای تو پاوہ کہ پادری نے آن گڑاس سوج کرے، نی داڑے انتئے بسنس؟
مزور: ای تو پاوہ کہ ای تینا ایڑھ ءِ خننگ کن بسنٹ۔
پادری: (لمہ نا پارہ غا خوش مرسا ہُرک) بھاز جوان نی تینا ایڑھ ءِ خننگ کن بسنس۔ نی داڑے گڑاس محسوس تو کروس کہ او داسہ زیات خوش اَف۔

برجا ءِ


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔