اے ھما مھرنگ اِنت – گنی ھیات

اے ھما مھرنگ اِنت

گنی ھیات

دی بلوچستان پوسٹ

بلوچ دودمان ءُ واک پیداور اِنت ۔ راجدپتر ءَ پدر کُتگ کہ وھدیکہ زمین ءِ سر ءَ زور آور زورگر بہ بنت گُڑا زورگِر ءِ ھلاپ ءَ جنگ کنگی اِنت –

شمئے بلوچ گْھار ءُ چُکانی ڈن ءِ درایگ بیگیرتی نہ اِنت بلکیں بلوچ دودمان ءَ گیرت ءِ یک بلاھیں اھمیتے ھست ھمے وڑ بی بی ھاتون ءُ بانڑی ءَ دستاں وتی چوڑیک در کتگ ءُ جنگ ءِ پڑ ءَ در کپتگ اَنت آ مروچی بلوچ دومان ءَ آ شیر زال ، بلوچ گیرت ، ننگ ءُ ناموس ءِ چیدگ جوڑ بوتگ اَنت۔

گوستگیں روچاں من مھرنگ بلوچ ءِ یک لائیو انٹریوے دیست مھرنگ گْوشگ اَت کہ مئے وزیر تئلیم ءَ اے سرپدی ھم نیست کہ مئے جیڑہ چے اَنت – یکے اے جاھل ءُ بے زانتیں مردم بلوچستان ءِ وزیر تئلیم جوڑ کنگ یک دلپدریں گپے بلے ما اے ریاست ءَ چی اُمیت لوٹ ایں پرچاکہ اے ریاست ءَ چہ بندات ءَ ھمے جُھد ءَ کنگ ءَ اِنت کہ کجام وڑ ءَ بلوچ راج ءَ اِلم ءَ چہ گستا بہ کن ایں –
مروچی مھرنگ بلوچ یک جُھدے ءِ چیدگ جوڑ بوتگ ، مھرنگ بلوچ شھید گپار لانگو چُک اِنت کہ آ ریاست ءَ وتی ھکّ ء لوٹگ ءِ سر ءَ شھید کُتگ ءُ مروچی مھرنگ ءِ گندگ ءَ وشی بوَگ ءَ اِنت کہ شھید گپار لانگو ءَ مھرنگ وتی وڑ جوڑ کتگ ءُ وتی ھکّ ءِ ھاتر ءَ جنگ بہ کن-

مھرنگ بلوچ میڈیکل ءِ یک نودبرے آ یک ڈاکٹرے جوڑ بیت آ وتی راج ءِ ھاتر ءَ انسانی ھاتر ءَ یک پرشتھے بیت – بلے مئے گلامیں چاگرد ءَ بندات ءَ مھرنگ ءَ وانگ ءُ کلاس ءِ نندگ کم دگانی ، پریس کلب ءُ زھرشانی ءَ گیش وھد داتگ – مھرنگ بلوچ جنگ ءِ ھکانی پڑ ءَ در کپتگ تھنا وتی زاتی لوٹانی ھاتر ءَ ناں بلکیں سرجمیں نودربرانی ھکّیگیں ھکّانی گپ ءَ اِنت ، آ ھم یک بے رھبند ءُ بے کانونیں ملکے ءِ تہ ءَ ھما کہ راست ءُ تچکیں لوٹانی درگت ءَ گپ ءَ اِنت باید ایشی ءَ دلبڈی دیَگ بوتیں کہ مئے راج ءِ جِنک آئی ءِ تہ ءَ شئور ءُ جزبگ ھست کہ آ وتی بد ءُ نیک ءِ ھکّاں زانت ءُ آ ھکّ ءِ گپ ءَ کُت کنت – بلے بے سر ءُ پادگیں واجکار یار مھمد رند ءَ آ اے گوشتگ چُپت کنگ ءِ جُھد ءَ کنت کہ اگاں تو ازت داریں مردمے بوتین ءِ تو دگانی سر ءَ نہ اِت ئے-

ھمے وڑ ملا، پنڈ اَنت یا کہ دگہ مزھبانی ھما سروک وتی مزھب ءُ درھم ءَ پُشت ءَ دور دنت ءُ وت میان ءَ اوشت اِیت مزھب ءَ تھنا کمائینگ ءِ ھاتر ءَ جوڑ کنت – ھمے وڑ ءَ واجہ ءُ نواب سردار سر زاھر ءَ وت ءَ ازت ءُ گیرت ءِ گپ ءَ جن اَنت بلے تھنا آیانی سربُر ءِ گپ اَنت وت ءَ راج ءِ دیم ءَ پیشدارگ لوٹ اَنت مارا گوں شمارا چینچُک مھر ھست بلے بدبھتی ھمش اِنت مئے تہ ءَ بازیں نزور ھیالیں واجہ اَنت بے زانتیں مردم کجام ھد ءَ اِشانی دروگیں توسیپ ءُ ستا ءَ منّگ ءَ اَنت