نمدی یے پہ مڑاداریں بلوچ ڈیھ ءِ رکینوکاں
نبشتہ کار: مراد بلوچ
دی بلوچستان پوسٹ
نمیران انت ھما واجہ کہ بلوچ ءِ گلزمین ءِ رکینگ ءَ وتی سر اِش ندر کتگ اَنت، زندگ بات اَنت ھما جُھدکار کہ انگت ءَ پہ بلوچستان ءِ آجوئی ءَ جنگ ءُ جدلاں گوں ھوار اَنت۔
مڑاداریں واجھاں شمے جُھد ءَ را سد ھزار سال سلام اِنت ۔
بلے!
تنے واھدی منی ھیال ءَ بید چہ چیرجنگی(گوریلا )جنگ ءَ بلوچاں ابید ایدگہ مھلونک سرپد نہ انت کہ بلوچ جُھد کارانی راستیں پگر (نظریہ) آیا راجدوستی( قوم پرسی) اِنت ” کمیون ازم” اِنت یا کہ ” “سوشل ازم” اِنت ۔من شش ءُ پنچ ءِ تہ ءَ کپتگ آں کہ مئے چیرجنگی جنگولاں بازار ءِ تہ ءِ پوریاگر اوں چہ زند ءَ زبھر کُرت اَنت کہ آ “فاش ازم”ءِ کرد ءِ چے بلوچ چیرجنگی جنگول ” فاش ازم” ءِمنوگر اَنت؟
اے ھبر ءَ ھم رد نہ انت کہ سِلاہ بندیں جد ءُ جھد ءِ سپائیانی توک ءَ سوشلسٹ ھم ھست، کمیونسٹ ھم ھست، مارکسسٹ ءُ لیننسٹ اوں ھست ءُ پد ءَ گوں ھمیشاں ھور وت ءَ را راجدوست(” قوم پرست) ” ھم لیکگ ءَ اَنت؟
من ھمے مارتگ کہ مئے جُھدکار گیشتر چہ ساوُت یونین ءَ چہ سان (مُتاثر) بیتگ اَنت،بیشک ھودا اسٹالین ءُ ایندگہ واجھاں پہ زوراک ءِ ھلاپ ءَ جنگ کُتگ بلے آیانی گلامی دگہ رنگیں گلامی یے بیتگ ءُ مئے گلامی دگہ رنگیں گُلامی یے ءُ پد ءَ واجھاں شما گھتر زان اِنت.
آواں گوں لھتیں ورنا کہ چہ بلوچ سِلاہ بندیں گلاں سیادی دار انت ءُ وت ءَ کمیونسٹ لیک انت ءُ اے ھبر رد نہ انت کہ کامریڈ اسٹالیں ءِ دور ءَ ھردیں کسے ءَ چرچ یا مسیت ءِ پُتِرگ ءِ بارو ءَ ھیال ھم کُرتگ گڑا کُشگ بیتگ ءُ پدا ما بلوچ جُھدکار واجہ مولوی اپزل ءَ ھم بے ھیال کُت نکن ایں،چائی ءَ چہ ابید نوری نسیر ھان ءِ “مزھب پرستی ” اوں شموشگ نہ بیت؟
بلوچستان ءِ سیمسرانی رکینوکیں واجھاں شُما اے نظریاتانی بارو ءَ شرتر زان اِت ءُ بلوچ جُھد ءِ آجوئی ءِ نظریہ شما اِبز کُتگ ءُ من گُشاں شما وتی نظریہ “قوم پرستی” ایر کُتگ گُڑا دُرساں ھمے یکیں “ازم” ءِ بابت ءَ دَرس بدے اِت چیاکہ بازیں “ازم” آنی ھوری ءَ یک چیدگے ءِ پَٹ ءُ پول بلکیں تارونکی ءَ سر بکنت۔
مڑاداریں واجھاں شُمے لکَ منت وار۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
