مردُم چے گْوش اَنت
نبشتکار ۔ داد بلوچ شاشانی
دی بلوچستان پوسٹ
مَردُم اے کدی مہ جیڑ اِیت کہ من اے کار ءَ بکن آں مَردُم من ءَ باریں چے گْوش اَنت۔۔ ؟ مَردُم اے گْوش اَنت مَردُم آ گْوش اَنت مَردُم من ءَ ھراب گْوش اَنت ۔۔!
بلئے اے گپ ءِ بزانت اے نہ اِنت کہ تئی دل ھرچی لوٹی تو بکن ۔۔ یا ھرچی تو زان ئِے دگہ کس سرپد نہ بیت دگہ کس نہ زانت ۔۔!
نوں اِد ءَ دو جیڑہ دیم ءَ کیت۔۔۔ ۔
اولی گپ ،،، مردُم چے گْوش اَنت۔۔؟
تئی جُھد ھمے بہ بیت کہ من ھما کار ءَ بکن آں آئی نَپ ءُ سیت تھنا منی مہ بیت آئی سیت من ءَ گوں منی راج ءَ منی زمین ءَ منی دوست ءُ سنگتاں ھر مزھب ءُ ھر کوم ءُ ھر راج ءَ را منی کار ءَ یا من ءَ چے سیت ءُ نپ بہ رسیت ۔۔۔
بلئے اے سک بلائیں کارے اے کارے کنگ چَہ مردُمے وس ءُ واک ءَ ڈن اِنت ۔۔۔ !
وں اد ءَ دگہ جُست کیت کہ پرچ ءَ چَہ مَردُمے وس ءُ واک ءَ ڈن اِنت ۔۔۔؟
من انچوش سرپد باں کہ انسان ءَ۔۔۔بزان مَردُماں وت ءَ را وت انچوش بھر ءُ بانگ کُتگ کہ نوں ھر مَردُم دوھمی مَردُم ءَ وتی بد ءُ دژمن سرپد بیت ۔۔۔ ھو بلئے ھمے وڈ اِنت کہ ھر مَردُم دوھمی مَردُمے بد اِنت اد ءَ مَردُماں وتی تھا باز رد بدلی آرتگ۔۔
درور۔۔۔۔ رنگ ۔۔ نسل۔۔کوم ۔۔۔مُلک۔۔۔جاھیداد ۔۔مزھب دود ءُ ربیدگ زُبان ۔دگہ دگہ بازیں ھمے رنگے کار بوتگ۔۔۔
نوں ایشانی گیش ءُ گیوار کنگ ارزانیں کارے نہ اِنت ۔۔۔بلئے مَردُم ھمے جُھد ءَ بکن آ سوبمند بیت نہ بیت اے چارگ مہ لوٹیت ۔۔۔
پد ءَ مَردُم سرجمیں دنیا ءُ ساہدار ءُ مرگ ءُ مالان پائدگ ءُ سیت ءُ نپ دات نہ کنت تھنا وتی ھیال ءَ مہ بیت وتی ھمساھگ ءَ پد وتی میتگ ءَ پد وتی مُلک ءُ راج ءَ پد انچوش تبک تبک ءَ بُرزاں رواں بکن وتی جُھد ءَ ھمے رنگ ءَ بکنت ءُ وتی دوست ءُ سنگت ءُ کوم ءُ راج ءَ ھمے راہ ءَ پیش داراں بکنت۔۔۔
دوھمی گپ ۔۔۔۔ کہ من ھرچی زان آں ھرچی من سرپد آں ۔۔۔
چون ءَ ما بچار اِیں مَردُم ھچ نہ زانت ۔۔ ھما کہ گیشیں پَٹ ءُ پولکار اَنت ما آیاں سائنس دان گْوش ایں یا زانِشت ءُ تَب زانتی ۔۔
آیانی گْوشگ ءَ چے ھمے گپ دیم ءَ اتکگ کہ مَردُمانی دماگ بزان مجگ انگت دہ درسد کار مرز نہ بوتگ نوں اے گپ ءَ چَہ پدر بیت کہ سد ءِ تھا دہ درسد ھچے نہ اِنت گُڑاں بزاں ما سرجم ءَ نازانتیں ھر وھد نوک دربرگ ءَ اِنت گُڑاں من چون اے داوایا کُت کن آں کہ من زان آں ۔
پدا نوکیں دربروکیں مَردُم المی ردی ءَ چَہ چکار بیت
پمشک ءَ مَردُم ردی کنت پرچ ءَ کہ مَردُم ھر وھد نوک دربرگ ءَ اِنت نوکیں کہ چیزے یا کار ے تئی دیم ءَ کیت گُڑاں تو الم ردی کن ئے بلئے وتی ردی ءَ منّ ھر وھد ءَ او پدا وتی ھمے جُھد ءَ بکن کہ دوھمی بَر ءَ ردی مہ بیت تو کہ ھمے ردی ءَ داھم کن ئے گُڑاں آرا ردی گْوشگ نہ بیت ردی تھنا یک برے بیت پدا کہ ھما کار تئی دست ءَ بیت گُڑاں آرا ما بے پرواھی گْوش اِیں بے تبی بے سماھی گْوشت کن اِیں دگہ دگہ۔۔۔
بزان مَردُم ھراب گْوش اَنت ۔۔۔
نوں اد ءَ باز جُست سر زُور اِیت کہ شَر ءُ ھراب وت چے اَنت۔۔۔؟
ما کہ بُگْوش ایں ھچ ھراب نہ اِنت ھچ شَر نہ اِنت بلکیں یک ھَدے ءَ مئے گپ راست اِنت۔
شَر ءُ ھراب ما دست ءِ وت آڑ کُتگ۔
بلکیں ھمے چیز کہ من ءُ تو ھراب گْوش اَنت ھمے چیز ءَ یا ھمے کار ءَ دگہ میتگے ءَ شھرے ءَ مُلکے ءَ یا کوم ءُ راجے شَر گْوش اَنت من ءُ تو ھما کار ءَ یا ھما چیز ءَ شَر گْوش اَنت آ بازیں جاگ ءَ ھراب گْوشگ بیت۔
گُڑاں بزان شَر ءُ ھراب ءِ جند نیست اِمبُروز ءِ تَہ ءَ یک دود ءُ ربیدگے یک مزھب ءِ یک راہ رھبندے منّگ نہ بیت۔
ھر راج ءَ ھر میتگ ءَ مُلک ءَ پہ وت رھبند ءِ آڑ کُتگ آئی رھبند ءَ بازیں رد ءُ بدلی آرگ بوتگ۔
یک دگہ گپ ءَ مُدام مئے دیم ءَ گْوز اِیت کہ مئے پیر ءُ کماشاں ساری چون کُتگ مارا انچوش کنگ لوٹی من سرپد باں اے مئے ناسرپدی اِنت ۔
پرچ ءَ کہ مئے پیر ءُ کماشاں وت وتی زند ءَ ھم بدلی آرتگ گوں آیاں چَہ ساری انگت دگہ وڈیں راہ ءُ رھبند بوتگ اَنت پدا آیاں کمو وتی زند ءَ بدلی آرتگ گُڑاں مارا پرچ ءَ اے ھک نیست کہ ما وتی تَہ ءَ بدلی مہ یار اِیں دنیا انچوش دیم ءَ روت بدلی انچوش آیاں بیت وھد گوں مَردُماں مردُم گوں وھد ءَ بدل بیاں بیت تئی ھر چیز بدل بیت مزھب بہ بیت یا تئی دود ءُ ربیدگ اے گپ ءَ کسے تپاک کنت یا نہ کنت اے آئی وتی زانتیں بلئے بدلی کیت ھمے رنگ ءَ کیت بلکیں جاہے ءَ نزور بہ بیت جاہے ءَ گوں تیزی ءَ کیت بلئے کیت۔
دی بلوچستان پوسٹ: اس مضمون میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔
