”ھیدر وؤٹ نہ دنت”
نبشتہ:- ھیبتان بلوچ
دی بلوچستان پوسٹ
پُرمڈائیں میتگ ءِ زید ءُ کہچر شات ءُ شاتکامے ءِ پُرلِزتیں سرشپ مُجاں اَندیم کُت۔
ھیدرمیتگ ءِ بزگیں دھکاں لِچکاری ءُ دیگہ پوریاتیاں مہلوک ءِ آروساں دستکمک اَت یکی ءَ چَنکے شکر دات ءُ یکی ءَ چَنکے دان واجھانی کوْھنیں پوشاکاں ھیدر گَلا بال اَت ھمک رنگیں آپتاں نہ آژنائیں ھیدر ءِ مال ءُ مڈی دو کرگین ءُ پیشگاہ ءَ جوانیں کاپری ءَ ھواری یک زالے گوں یک بچکیں زھگے اَت کہ زندگی ءِ سرجمیں وشیاں زِبہر اَت شپ ءُ روچانی گوازینگ ءَ ھیدر ءِ زال ءَ گُد دوچی کُت وت ءَ گوں زھگ ءَ والینت۔
بلے ھیدر ءِ میتگ ءَ میر ءُ سرکماش است اَت سعودی والا مُلا کہ سالے چُنت کلدار کہ پہ زکات ءِ نام ءَ کاینت بہر ءُ بانگ بنت ھیدر اِشاں چی بےبہر اَت میتگ ءِ میر چہ ھیدر آژناہ اَت بلے وؤٹ ءِ درگت ءَ۔چونائ ءَ ھیدر ءَ کس نہ زانت۔
بلوچ سیاسی جھدکار کہ بلوچ مہلوک ءَ پہ آجوی ءِ نیمگ ءَ سکیں دیئنت ءُ مہلوک ءِ تہا نشتگ ھمک واجہ، میر ءُملاہانی بابت ءَ شر سرپد اَنت ءُ چہ وتی نیزگاریں مہلوک ءَ شپانک ءُ دھکان ءِ ارزشت ءَ ماراَنت ءُ یکجاہ بوھئگ لوٹ اَنت ھمے مارشت جھدکار ءَ گوں نیزگاریں مہلوک ءَ نزدیک کن اَنت۔
ھیدرے میتگ ءُ ھنکین ءِ سیاسی جھدکار ھمے میتگ ءِ جاہ منندے۔ شپے یک لوگی ء ءِ سرا وتی بے کسیں سرا کشیت مہلوک ءِ مارشت آں وتی کوپگاں سماریت دلبند ءَ زھرگیں لبزاں زبان ءِ الہانیں گُنگی ءَ پروشیت ارسان ھوادگ کنت ءُایرتِنگیت۔
وؤٹانی آھگ ءَ کمے پیش ھیدری زال بیمار بوت ھیدر ءَ وتی کودکیں ارسں میر ءِ پتر ءَ ایرموش کُت اَنت بلے میر ءِ سِنگیں دل پہ ھیدر موم نہ بوت کماشیں ھیدرمیر ءِ بچک ءَ پہ تیلانک چہ وتی گِس ءَ در کش کُت ۔ھیدر وتی بے اُرزی زُرت ءُ زکاتی مُلا ءِ کِرا زھر جَت مُلائے دست ھشک بوت اَنت کہ پیریں مردک ءَ دہ ھزار کلدار بہ دییاں.
ھیدر پہ وام ءُ شام ءَ سرجمیں دکاندار ءُ سیٹ آنی دروازگاں سلوات کُت بلے گُنگیں زمانگ ءَ وت ءَ پہ کری ءَ جتگ ءُ بےسماہ اِنت۔
ھیدرھُشکیں دستاں پہ گِس ءَ واتر کنان اَت راہ ءَ ھیدری گوم ءَ ھمے راجی جہدکار ھوارکپیت ءُ ھیدر وتی نیستی ءِ داستان ءَ بوجیت راجی جنز ءِ مڈاہداریں سنگت گوں ھیدر ھیدری گِس ءَ کاینت گپ ءُ گالاں آسر کنگ ءَ پد ھیدری زھگاں پہ اولاکے کاریت دیم پہ شہرے ٹوھیں نادراہ جاہ ءَ رھادگ بنت۔
سے ءُ چار روچ ھیدری ھمراہ بیت بیمار کہ دراہ ءُ سلامت بیت ھیدر ءَ گوں زھگاں تاں میتگ ءَ رسینیت ھیدر سرجمیں ھکیکت آں ماریت ءُ ھبکہ بیت وتی گُمان ءَ جیڈیت سرجمیں میتگ ءَ یک اِنسانی کہ پِریشتگے بلے یکین اِنت.ھیدر گڈا چہ ھمے مردک ءَ پُرسیت ھرچ باز بوت باریں من پدا اِشاں دات کناں کہ نہ؟
ھمے جہدکار وتی جاگہ چہ پاد کئیت ھیدری دستاں وتی چمان داریت ءُ گُشیت من شمے نوکراں تو منی وامدار بوت نکنے البتہ من شمے وامداراں من ءَ پہل کن اِت دل باز کشیت بلے دزرس نیست پُشت ءَ مان دنت ءُ روت۔
آ جھدکار نوں میتگ ءَ ساڈی نہ اِنت بلے ھیدری دل ءِ ھنکین ءَ بادشاہ اِنت ھیدر نوں واجہ ءِ داوتاں پس کوش نہ اِنت ملا ءِ پِنڈتگیں زکاتاں دلمانگ نہ بیت۔ ھیدرلچکاری کنت زال گُدوچی کنت بلے کسی اوستاں ھوبینگیں واب نہ گنداَنت۔ وؤٹانی درگت پدا اتکگ بلے ھیدر وؤٹ نہ دنت۔
