بلوچستان کے مختلف علاقوں سے تین افراد کی لاشیں برآمد ہوئی ہیں۔
تفصیلات کے مطابق، تربت کے نواحی علاقے ہوشاپ سے ایک نوجوان کی گولیوں سے چھلنی لاش ملی ہے۔
پولیس ذرائع کے مطابق مقتول کی شناخت نسیم ولد قادر بخش ساکن ہوشاپ کے نام سے ہوئی ہے۔ پولیس نے لاش کو تحویل میں لے کر اسپتال منتقل کیا، جہاں ضروری کارروائی کے بعد لاش ورثاء کے حوالے کر دی گئی۔ پولیس کا کہنا ہے کہ واقعے کی وجوہات تاحال معلوم نہیں ہوسکی ہیں تاہم تحقیقات جاری ہیں۔
اسی طرح ضلع قلات کے علاقے محمد تاوہ سے سمیع اللّٰہ نیچاری نامی شخص کی نعش ایک ویران مقام سے برآمد ہوئی۔ مقامی ذرائع کے مطابق لاش کو فوری طور پر ضابطے کی کارروائی کے لیے اسپتال منتقل کر دیا گیا۔ پولیس نے موقع پر پہنچ کر شواہد اکٹھے کیے اور واقعے کی تحقیقات شروع کر دی۔
ابتدائی معلومات کے مطابق سمیع اللّٰہ نیچاری کو گولی مار کر قتل کیا گیا۔ پولیس مختلف پہلوؤں سے واقعے کی تفتیش کر رہی ہے۔
ادھر خضدار کے علاقے فیروز آباد سے بھی ایک شخص کی لاش ملی ہے۔ ریسکیو حکام کے مطابق لاش کے جسم پر گولیوں کے نشانات پائے گئے ہیں، جسے اسپتال منتقل کر دیا گیا ہے۔ حکام کے مطابق مقتول کی شناخت کے عمل کا سلسلہ جاری ہے۔
بلوچستان کے مختلف علاقوں میں حالیہ ہفتوں کے دوران لاشوں کی برآمدگی کے بڑھتے واقعات نے شہریوں میں خوف و ہراس پیدا کر دیا ہے۔
