شہید سنگت نثار جان
نوشت: زوہیب بلوچ
دی بلوچستان پوسٹ : براہوئی کالم
دروشم آ ہر وخت بشخندہ اس تالان، تول بش اٹ مہر بشخنگ، شعور و سرپندی آن پُر، بے کار تولنگ آ بے جارات مروکا، ہر کاریم آن گڈ ایلو کاریم ءِ کننگ کن تیار آ سنگت نثار جان ئس. وختس قومی تحریک نا کاریم تیٹ خاران ئٹی تو وختس نوشکے، قلات، مستونگ و مکران نا علاقہ اسیٹی… نن و دے، توڷ و بش بیرہ تنظیم و قومی تحریک ءِ سوگوی بشخنگ اٹ اختہ. دُنو ورنا بھاز کم خنورے کہ ہرا ہچبر دم درینگ نا پِن ءِ ہلپک!
ہرا اسہ دے اس ہم کاریم اس ایسری تننگ آن پد دا ظاہر کپک کہ ای بھاز بھلو کاریم اس کریٹ۔
شہید نثار جان تون اولیکو اوڑدئی 2015 ٹی اسہ دیوان ئسے ٹی مس ولے او دیوان قومی تحریک ٹی تنظیم آتا چِک و تاڑ آتا بابت بحث آتیٹی ایسری آ سر مس، اوڑے ہم منہ کاریم تا سَوب آن کنے سنگت تون ایشکامی تون تولنگ و گپ کننگ نا و سنگت ءِ خوڑتی تون پہہ مننگ نا وخت نصیب متو. دوارہ شہید تون ارٹمیکو اوڑدئی 2016 ٹی مس گڑا ہموکان کنے سنگت تون خوڑتی اٹ گپ و تولنگ نا شرف رسینگا…. اوکان گڈ بھلو وخت اس شہید نا ہمرئی تون قومی تحریک نا بابت کاریم تے مُستی دننگ نا کوشست آتیٹ اواری مس. حالانکہ نثار جان و ننا تنظیم آک جتا ئسر ولے کنے دُنو دے یا ساعت اس یات بفک کہ سنگت کنے دیخس ہم محسوس کریفے کہ نن جتاؤ تنظیم تیان تعلقداری تخنگہ…. دا اونا شعور نا شاہدی ءِ کہ او اسہ بڑز بالاد ءُ فرق و شعور اس تخیسہ ننے اندنو ہمرئی اس بشخا کہ دا چِک تاڑ، دا پروشت و پروش، اسٹ ایلو نا نَت چکنگ نا حالیت آتیٹ ہم اوار مننگ نا اہمیت، اواری اٹ قومی تحریک نا کاریم تے مونی دننگ نا فائدہ غاتے پہہ مننگ نا سرپدی اس بشخا و بلوچ قومی تحریک کن کاریم کروک ہر تنظیم و ہر باسک ءِ نشان تس کہ اوار مننگ و اواری اٹ نن بلوچ قومی تحریک ءِ امر مُستی سوگوی بشخنگ کینہ.
شہید نثار جان کہی سال آتیان بلوچ قومی تحریک ٹی تینا ونڈ ءِ شاغنگ اس چائے او خاران شار اٹ بی ایس او آزاد نا پِڑ مرے یا بی این ایم ءِ خاران و بلوچستان نا کُنڈ کُنڈ آ فحال تخنگ مرے.
بی ایس او آزاد نا وختا تنظیم کاری، سرکل خلیسہ ایلو باسک آتے شعور بشخنگ، وال چاکنگ و مُچی اڈ تننگ اٹ اونا خواری کشنگ نا شاہدی ءِ اینو ہم اونا ہمرہ مروکا سنگتاک ایترہ، بی ایس او آزاد نا وختا ریاستی کارندہ غاتے نثار جان آن خُلیس ارفے گڑا اودے دزگیر کریسہ اوڑا دہشت گردی نا دُوبہ خلنگا ولے دُوبہ غاک اوڑا ثابت مننگ کتور و ریاستی کارندہ غاک بے وس مریسہ اودے یلہ کریر، شہید قومی تحریک آتیٹ دُن انگا سختی تیکن شعوری حوالہ غا وختی آن تیار ئس، یلہ مننگ تون او تینا کاریم تیٹ اسیکہ لگّا…. اوکان گڈ بی این ایم ءِ فحال کننگٹ و تنظیم نا کاریم تے مُستی دننگ اٹ او شہادت نا وخت اسکان تفوک مس، بی این ایم نا وختی ریاستی زوراکیک زیات مسُر و سیاسی ورکر آتیکن پاش ڈول اٹ کاریم کننگ بھاز سخت مس، ہراڑے سیاسی ورکر اس دوٹی تما اودے ریاستہ ادارہ غاک بے گواہ کریسہ اونا چشوکا لاش ءِ خسار، گڑا نثار جان ہم ایلو باسک آتیان بار تنظینی پالیسی نا رِد اٹ ڈھکوک وڑ اٹ تینا کاریم تے برجا تخا. تنظیمی لٹریچر مرے یا تنظیمی دورہ غاک او دا سخت آ حالیت آتیٹی ہم تینے دا کاریم تیان پد توتویکہ انتئے کہ تینے پد توننگ نا مطلب اس کہ قومی آزاتی نا خواست آن دُو ارفنگ و شہید نثار نا نظریہ نا سوگوی اودے ہچبر دُو ارفنگ کن موکّل تتوکہ.
کس اس قومی تحریک نا کاریم تے اسہ عبادت ئسے نا درجہ ایتے گڑا بلکن نثار جان نا ڈول کاریم کننگ کے. ہراتم نثار جان تون اوڑدئی مروس، کاریم تا بابت سوج کننگ آن اندا ورندی رسینگاکہ: سنگت فلاء شار آن بننگٹ منہ تنظیمی کاریم ئسرہ، منہ دے اٹ فلاء شار آ ہنوئی ءِ منہ سنگتت ءِ خنوئی ءِ یا فلاء شار آ تنظیمی لٹریچر آتے سر کروئی یا تنظیمی دورہ اس کروئی. جہان نا تیوی آ جنجال آتے یلہ کریسہ، اسہ لَس وڑ اٹ آسراتی نا زند اس گدریفنگ نا جاگہ غا ہر سختی ءِ سگوکا نثار ئس. نن کُونا نزور آ بندغ آتے تینا کاریم تیٹ حوصلہ بشخوکا نثار ئس.
اینو سنگت نثار جان ننے آن جتا مسونے ولے اونا فکر، اونا کاریمک، اونا سنگت آتے قومی تحریک کن شعوری وڑ اٹ تیار کننگ اینو ہم اودے زندہ تخانو.
……………★……….
