ڈاکٹر سعید بلوچ نا دڑد!
نوشت: کامران بلوچ
دی بلوچستان پوسٹ
“بلوچستان ہمو اسٹ انگا ڈغار ءِ ہرانا لمہ غاک تینا مسن تا جاگہ غا تینا مار تا بھلن مننگ آ مونجا مریرہ.” دا لوز آک بے گواہ مروکا بولان میڈیکل کالج نا گڈیکو سال نا خوانندہ سعید بلوچ نا ءُ، ہرادے تینا لمہ ڈغار تون اوار تینا جیجا نا دڑد ئنا جوانیکا درک ئس. اودے جوان سما ئس کہ بلوچستان ئٹی اسہ ورنا ئسے نا بھلن مننگ آ اونا لمہ جیجا اخہ در بے جارات مریک.
سعید بلوچ ءِ دا ہیت آتا درک الّمی دا سوب آن ئس کہ او بلوچستان نا شار و خلق آتیان بے گواہ مروکا بلوچ ورنا تا مخلوق ءِ ہڑدے تینا مُون آ خناسُس، او تینا بے گواہ مروکا سنگت آتا سیال آتے خنیسہ اوفتا دڑد ءِ محسوس کریسُس کہ دُنو لوز نوشتہ کننگ آ بے وس مس.
بلوچستان اٹ بے گواہی تا دا لَڑ پوسکن اَف بلکن دانا روتہ غاک بھاز شیف ءُ ولے دا بے گواہی تیٹی تدوکا دئے سال آن ترندی بسونے ءِ و بھاز آ حساب آتا رِد اٹ بے گواہ مخلوق نا کچ بیست ہزار آن ہم زیات ءِ و دا بے گواہ مخلوق اٹ بلوچ ورنا تے تیتون اوار زالبول، چُناء و کماش آک ہم اوار ءُ. دافتیتون اوار ہزار آتا کچ اٹ بھاز آ بے گواہ مروکا مخلوق نا چُشوک آ جُون آک ہم بیابان و شار آتیان خننگسہ مسونو.
ریاست نا پارہ غان دا بے گواہی تا گواچی اسہ پارہ غا پاوال نا بلوچ مخلوق مریسہ کرینے گڑا ایلو پارہ غا خوانندہ غا تپہ غان تعلقدار آ ورناک برجاء ڈول اٹ دا بے دادی نا گواچی مسونو، ڈاکٹر سعید بلوچ ہم بلوچ خلقت نا خوانندہ غا تپہ غاک تعلقدار ءِ.
سعید بلوچ خاران کُون آن پد ماندہ غا علاقہ آن بش مریسہ تینا بزگ آ مخلوق نا خذمت کن ڈاکٹری نا شعبہ ٹی تینا خواری تیان ہند اس جوڑ کننگ ئس و اندن جہان نا ایلو ورنا تیتون اوڑدئی کریسہ بلوچ ورنا تیکن کسر ملنگ نا کوشست آتیٹ ئس، اونا خواری کشی و اونا کاریمک الّمی شعوری وڑاٹ ارفوکو گام ءُ ولے دُنکہ صاف وڑ اٹ ہمیش خننگ اٹ بسونے کہ بلوچ ورنا تیان کس اس قوم نا دیم روی کن گام خلکنے گڑا ریاست نا پارہ غان اندن انگا بے دادی تا گواچی مسونے، داڑان اندا ظاہر مریک کہ اسٹبلشمنٹ ہچو وڑ اسیٹ خواپک کہ بلوچ قوم دیمروی نا پارہ غا سوگوی اٹ گام ارفے.
بلوچستان اٹ برجاء ڈَول اٹ مروکا دا بے گواہی تا خلاف بلوچستان اٹ و بلوچستان آن پیشن نا ملک آتیٹ برانز آک ارفنگسہ مسونو. دا برانز آتیٹ کوئٹہ آن اسلام آباد اسکان مروکا لانگ مارچ تون اوار سال آتیان کوئٹہ پریس کلب و کراچی پریس کلب نا مونا خلوکا ہڑتالی کیمپ آک اوار ءُ، و پیشن نا مُلک آتیٹ بندغی حق آتا ادارہ غاتا مُونا ہم ہیت ارفنگسہ مسونے. دا برانز آتیٹ وختس ترندی و وختس شیفی بریسہ کرینے.
ڈاکٹر سعید بلوچ نا بے گواہی نا خلاف اسیکہ وا دا برانز آتیٹ ترندی اس خننگک، سوشل میڈیا آن بناء مروکا دا برانز ارفنگ کوئٹہ پریس کلب نا مونا مُچی و شار اٹ کشوکا ریلی تیتون اوار سرکاری دفتر و وزیر اعلیٰ ہاؤس نا مُونا ہڑتال کننگ کوشست آتیا سرمسونے (یاتی برانزی مُچی تے وزیر اعلیٰ ہاؤس نا مُونا ہننگ آن توننگا، دُنکہ دا مُلک اٹ ہر وخت کننگک.) ولے گُرچ دا ہیت نا ءِ کہ دا برانز آک مُستی سوگوی تون اوار برجاء مریر، دا برانز آک کوئٹہ تون اوار بلوچستان نا ہر شار اٹ ارفنگر و داڑتون اوار بلوچستان آن پیشن نا علاقہ غاتیٹ ہم سوگوی تون ہر پڑ آ ڈاکٹر سعید بلوچ و ایلو بے گواہ مروکا مخلوق کن توار ارفنگہ و خوانندہ غا تپّہ تون اوار زند ئنا ایلو بشخ آتیان تعلقدار آ لَس آ خلقت ءِ ہم برانز آتیتون اوار خننگہ.
اینو گواچنی دروشم اٹ بلوچستان نا حالیت اندن ءِ کہ داڑے لمہ غاک تینا مار تا بھلن مننگ آ مونجا مریرہ (ای تو پاوہ نہ بیرہ مار بھلکن بلوچستان اٹ لمہ غاک تینا مسن تا بھلن مننگ آ ہم بے جارتی نا گواچی مریرہ.) ولے لمہ غاتا دا دڑد ءِ مُر کننگ کن تیوی غا خلقت ءِ بش مروئی تمک، دا بے دادی تا خلاف توار ارفوئی تمک. ہرا وخت اسکان سعید بلوچ نا ڈول ورنا تا بے گواہی تا خلاف ترندو توار ارفنگپرو ہمو وخت اسکان لمہ غاتا دا دڑد ایسر مننگ کپرو، اوفتا تینا چُنا تیکن مونجا مننگ ایسر مفرو، اوفک اندن بے جارات مریسہ کرور، خواست آک سوگوی تون برجاء جہد کننگ نا ءِ.
