اسرائیلی فضائیہ کی جانب سے یمن کے شہر حدیدہ پر حملے کیے گئے ہیں۔
اسرائیلی فوج کی جانب سے جاری بیان میں بتایا گیا ہے کہ اسرائیلی فضائیہ نے حدیدہ اور راس عیسیٰ میں بندرگاہ اور بجلی گھروں کو نشانہ بنایا ہے۔
اسرائیلی فوج کے مطابق حملے میں فضائیہ کی درجنوں طیاروں نے حصہ لیا۔
غیر ملکی خبررساں ایجنسی کے مطابق حملے کے بعد حدیدہ شہر کے اکثر علاقوں میں بجلی منقطع ہوگئی۔
عرب میڈیا کے مطابق اسرائیلی طیاروں نے تیل ذخیرہ کرنے والی تنصیبات پر حملے کیے تاہم حوثیوں نے اسرائیلی حملے کے پیش نظر پہلے ہی انہیں خالی کرلیا تھا۔
خیال رہے کہ اس سے قبل جولائی میں بھی اسرائیلی فضائیہ نے حوثی باغیوں کے اسرائیلی دارالحکومت تل ابیب پر ڈرون حملے کے جواب میں یمن کے شہر حدیدہ پر فضائی حملے کیے تھے۔
یمنی میڈیا کے مطابق اسرائیلی حملوں میں یمن کے شہر حدیدہ بندرگاہ پر آئل تنصیبات کو نشانہ بنایا گیا تھا جس میں 3 افراد ہلاک اور 87 افراد زخمی ہوئے تھے۔
