شہید شاشان: وفا، قربانی اور عظمت کی علامت
تحریر: زِرنود بلوچ
دی بلوچستان پوسٹ
شہید سفیان جان کی شہادت کو ایک سال سے زیادہ کا عرصہ ہو گیا، مگر ان کی یاد کا چراغ پہلے سے بھی زیادہ روشن ہے۔ وقت نے کیلنڈر کے صفحے تو بدل دیے، مگر ان کی قربانی کی عظمت نہ کم ہوئی ہے، نہ کبھی کم ہوگی۔
سفیان جان، تم نے اپنی جان اپنی مادرِ وطن پر قربان کر دی۔ کچھ لوگ لمبی زندگی جیتے ہیں، مگر تاریخ میں ان کا کوئی نام و نشان نہیں رہتا؛ اور کچھ لوگ اپنی ایک قربانی سے ہمیشہ کے لیے امر ہو جاتے ہیں۔ تم انہی لوگوں میں سے ہو۔
تمہارا خون صرف زمین پر نہیں گرا، بلکہ اس نے وفا، حوصلے اور قربانی کی ایک ایسی داستان رقم کی جسے وقت کبھی مٹا نہیں سکتا۔ تمہاری غیر موجودگی آج بھی دلوں کو رلاتی ہے، مگر تمہاری بہادری ہمارے سر ہمیشہ فخر سے بلند کر دیتی ہے۔
ہم آج بھی تمہیں اسی عزت، اسی محبت اور اسی فخر سے یاد کرتے ہیں۔ تم ہمارے لیے صرف ایک عزیز نہیں تھے، بلکہ قربانی، غیرت اور وفا کی زندہ مثال تھے۔ شہید جسمانی طور پر رخصت ہو سکتے ہیں، مگر ان کی یاد، ان کا کردار اور ان کی قربانی کبھی دفن نہیں ہوتی۔ وہ نسلوں کے دلوں میں زندہ رہتے ہیں۔
اللہ تعالیٰ تمہیں اپنی رحمت کے سائے میں بلند ترین مقام عطا فرمائے، تمہاری قربانی کو قبول فرمائے، اور ہمیں تمہاری یاد کے ساتھ سچائی، ہمت اور وفا پر قائم رہنے کی توفیق عطا فرمائے۔
شاشان، تمہیں بھلانا ممکن نہیں، کیونکہ جو اپنی مادرِ وطن کے لیے جان دیتے ہیں، وہ وقت کے نہیں، تاریخ کے سپرد ہوتے ہیں۔
آج بھی تمہارا نام آتا ہے تو آنکھیں نم ہو جاتی ہیں۔ تمہاری یاد آتی ہے تو دل خاموش ہو جاتا ہے اور پھر یہی احساس دل کو سنبھالتا ہے کہ تم نے اپنی جان ایک ایسے مقصد کے لیے دی جسے تم نے اپنی زندگی سے زیادہ عزیز جانا۔
شہید صرف اپنے گھر والوں کی یاد نہیں بنتے، وہ اپنے پیچھے ایک ایسا درد اور ایسا فخر چھوڑ جاتے ہیں جو نسلوں تک زندہ رہتا ہے۔
شاشان، تمہارا نام لیتے ہی دل بھر آتا ہے۔ تم نے اپنی زندگی سے بڑھ کر اپنی مادرِ وطن کو چُنا، اور یہی فیصلہ تمہیں ہمیشہ کے لیے امر کر گیا۔ تمہاری جدائی ایک زخم ہے، مگر تمہاری قربانی ہمارا فخر ہے اور ہمارا قومی غرور ہے۔
دی بلوچستان پوسٹ: اس تحریر میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔
