فیفا فٹبال ورلڈ کپ 2026ء کے راؤنڈ آف 16 میں ناروے نے شاندار کھیل کا مظاہرہ کرتے ہوئے پانچ مرتبہ کی عالمی چیمپیئن برازیل کو 1-2 سے شکست دے کر ٹورنامنٹ سے باہر کر دیا، جبکہ اپنی تاریخ میں پہلی بار کوارٹر فائنل کے لیے کوالیفائی کر لیا۔
میچ میں ناروے کے اسٹار فارورڈ ارلنگ ہالینڈ ہیرو ثابت ہوئے، جنہوں نے آخری لمحات میں دو گول کر کے ٹیم کو تاریخی کامیابی دلائی۔ ہالینڈ نے پہلا گول 79ویں منٹ میں کیا، جبکہ دوسرا گول مقررہ وقت کے اختتام پر اسکور کیا۔
برازیل کو انجری ٹائم میں پنالٹی ملی، جس پر ایک گول کرنے میں کامیابی حاصل ہوئی، تاہم وہ شکست سے نہ بچ سکا اور میچ 1-2 سے ناروے کے نام رہا۔
میچ کے دوران ایک اہم موقع اس وقت آیا جب برازیل کے میتھیوس کونیا کو ناروے کے کرسٹوفر آجر نے باکس میں گرایا، تاہم ریفری نے ابتدا میں پنالٹی نہ دی۔ بعد ازاں وی اے آر کی مدد سے فیصلہ تبدیل کرتے ہوئے برازیل کو پنالٹی دی گئی، لیکن برونو گیمارائش اپنی کک کو گول میں تبدیل نہ کر سکے۔
پہلا ہاف بغیر کسی گول کے ختم ہوا، جبکہ دوسرے ہاف میں برازیل نے کئی مواقع پیدا کیے۔ 60ویں منٹ میں 19 سالہ اینڈرک کو گول کرنے کا بہترین موقع ملا، مگر ان کی شاٹ ہدف سے باہر چلی گئی۔ اس کے بعد ناروے کے تجربہ کار گول کیپر اوریان نیلینڈ نے کئی اہم بچاؤ کر کے برازیل کو گول کرنے سے روکے رکھا۔
دوسری جانب راؤنڈ آف 16 کے ایک اور دلچسپ مقابلے میں انگلینڈ نے میکسیکو کو 2 کے مقابلے میں 3 گول سے شکست دے کر کوارٹر فائنل میں جگہ بنا لی۔
میکسیکو سٹی میں کھیلے گئے میچ میں انگلینڈ کی جانب سے جوڈ بیلنگھم نے دو جبکہ کپتان ہیری کین نے ایک گول اسکور کیا۔ میکسیکو کے لیے کوئنونیس اور خیمنیز نے ایک، ایک گول کیا۔
انگلینڈ کو میچ کے 54ویں منٹ میں اس وقت بڑا دھچکا لگا جب ریفری نے انگلش کھلاڑی کونر گالاگر کو ریڈ کارڈ دکھا کر میدان سے باہر بھیج دیا، جس کے بعد انگلش ٹیم نے تقریباً پورا دوسرا ہاف 10 کھلاڑیوں کے ساتھ کھیلا، تاہم اس کے باوجود فتح اپنے نام کرنے میں کامیاب رہی۔
کوارٹر فائنل میں اب انگلینڈ کا مقابلہ ناروے سے ہوگا، جس نے برازیل کو شکست دے کر پہلی بار ورلڈ کپ کے کوارٹر فائنل میں جگہ بنائی ہے۔
