ڈیرہ بگٹی سے مزید دو افراد کو پاکستانی فورسز نے حراست میں لے کر لاپتہ کردیا ہے جبکہ تربت سے اطلاعات ہیں کہ گاڑی سوار مسلح افراد نوجوان کو اغواء کرکے اپنے ساتھ لے گئے۔
ڈیرہ بگٹی سے لاپتہ ہونے والوں میں باپ بیٹا شامل ہیں، جنکی شناخت امام بخش ولد پیر بخش بگٹی اور ان کے بیٹے امام دین بگٹی کے ناموں سے ہوئی ہے۔
ذرائع کے مطابق مذکورہ افراد کو تحصیل سوئی کے طوطا کالونی سے فورسز نے حراست میں لیا ہے۔
خیال رہے کہ ڈیرہ بگٹی میں آپریشن پچھلے تیرہ دنوں سے بدستور جاری ہے، دوران آپریشن ابتک فورسز نے 26 سے زائد افراد کو جبری طور پر لاپتہ کر دیا ہے۔
ضلع کیچ کے مرکزی شہر تربت سے جمعرات کے روز آسکانی بازار آبسر سے میٹرک کے طالب علم رزاق بلوچ ولد خالد بلوچ کو سرف گاڑی میں سوار مسلح نامعلوم افراد اغوا کرکے اپنے ساتھ لے گئے۔
