مُنجار – آپتاب

167

مُنجار

آپتاب

دی بلوچستان پوسٹ

سلیمان جان تو پہ راستی ءَ مُنجارے اِت ئے، تئی مُنجارئی پہ ھما سر زمین ءُ بلوچ راج ءَ اَت کہ ھپتاد سال ءَ چہ گیش اِنت گُلام اِنت، اے مئے سرکل گْوش ئے۔۔۔۔۔۔۔۔۔۔۔یا انچیں ماھُول ءُ چاگِردے  جوڑ بوتگ اَت کہ ھمُک کارِست ءَ پہ دوستی وت ءَ یک نامے بستگ اَت، مُنجار ءَ ، سیّد ، بُزرگ ، گُلّو ، ناتو ، پیشُکوک ، تیرے نام ، ولی ءُ پیگمبر۔۔۔۔۔۔۔۔۔

اگاں من  بِہ گْوش آں چے پیم ترا اے مُنجار ءَ ئے  نام بندگ بوت ، اے  چہ تئی سادگیں تب ءُ آشوبی کِردار ءَ ، مُدام گُوں گَل سازی ءَ مُشکول بوتگ ئے۔۔۔۔۔۔۔۔۔۔، کُجا کہ موہ رستگ تو ھرجاہ پہ راجی جُنز ءُ گَل ءِ کارانی دیمروی ءَ نا سرد زانتگ نیکہ گرم۔۔۔۔۔۔۔۔۔، زیارت ءُ پیرے ءِ سر بیتگ یا دُکّان ءُ ھُوٹلے ءِ دیم بہ بیت۔۔۔۔۔۔۔۔۔۔تو گوں بزّگیں راج ءَ ھم دیوان اَت ئے ۔

ھمے داب ءَ وھدے یک تامُرے ٹاھینگ بِہ بیت ءُ ھما درچِتگیں کارِستاں چہ یکّے نیمراہ ءَ گِسر بہ بیت۔۔۔۔۔۔۔گُڑا ھما کارِست ءِ کمّی پہ مُدامی مارگ بیت ءُ آئی ءِ جاگہ ھُورک ءُ ھالیگ بیت۔ مُنجار۔۔۔۔۔۔!  ھمے رنگ ءَ تئی شھیدی ءَ رند ھما سرکل ءَ تئی کمّی ءُ رھشُونی مُدام گیر آرگ بیت۔۔۔۔۔۔۔بلے تو یک انچیں کارِستے ئے کہ آ  کارِست مھکمیں لیکہ ءُ توکلے ءِ نام اِنت،ھما سرکل ءَ کہ ترا مُنجار توار کنگ بیت ءَ ھما کارِست انوں یکّے چہ دومی ءَ دُور اَنت ، بلے پہ بِچکند ءُ تئی کاروان ءِ ھمراہ اَنت، پیگمبر انگت گوں وتی مزن توکلی ءَ گل ءِ پیگام ءَ دیم ءَ برگ ءِ جُھد ءَ اِنت، سیّد ھم تئی اِیمانداری ءُ تمردی ، گل سازی ءِ توسیپ ءَ کنت ءُ کیڈرزاں  تئی رندپدانی رندگیری ءِ درس ءَ دنت،گُلّو ءُ بُزرگ تئی رَھبری ءَ چہ ھما کار کُتگ اَنت نوں گْوشت کن ئے کہ پہ وت تئی وڑیں رھبرے نہ گِندگ ءَ اَنت۔
تیرے نام ءِ جُست ءَ مہ کن گوں وتی ھما گلی کاراں گُلائیش اِنت ءُ  کدی کدی تئی ءُ آجزو ءِ ترانگاں گیج اِیت ءُ دِگہ نوکیں جزبگے شکسائیت۔

پیشُکوک ترا چہ رند تئی ھَند ءَ دمگ ءَ چہ دیر اِنت ، اِیشی ءَ وتی وش بھتی سرپد بیت کہ انگت تئی کاروان ءِ مُساپِر  اِنت ءُ دیم  پہ مِنزل ءَ جُنزان اِنت، گوں نوکیں نوکیں کارِستاں ڈیک دیان اِنت۔۔۔۔نام مٹّ اَنت بلے لیکہ ءُ مِنزل یکین اِنت۔۔۔۔

مُنجار۔۔۔۔۔! تئی شھیدی ءَ رند مجید جان ءُ دِگہ بازیں سنگت شھید کنگ بوتگ اَنت ، لھتیں روچ ءَ پیسر رھمدل جان ھم شھید کنگ بوت،لکّی جان انگت زندانی اِنت ، ڈاکٹر دین جان ، زاھد جان ، زاکر جان انگت بندیگجاھاں بندیگ اَنت ، بلے تئی آجوئی ءِ کاروان دیم پہ مِنزل ءَ جُنزان اِنت ۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔