بیا اِت ما ردی یے کن ایں
نبشتہ کار: گُلزادی بلوچ
دی بلوچستان پوسٹ
اگاں ما چہ دامگ ءَ ردی ءِ بابت ءَ پٹ ءُ پول ءَ بِہ کن ایں گُڑا مارا چہ دامگ ءَ، بزاں چہ گُوگل ءَ بے کساس تندجاہ رس ایت کہ اود ءَ پہ ردی ءِ بارو ءَ سرپدی دیگ ءَ بے شمار دْراجیں نبشتانک ءُ گُشتین رس انت کہ ردی چون گوں بنی آدم ءَ ھمگرنچ انت۔ چہ بازیں تندجاھاں ھمے یکیں سرپدی رس ایت کہ بنی آدم ءَ مُدام چہ ردیِاں دربُرتگ ءُ پد ءَ ھم مُدام چہ رَدیِاں دربارت پمیشکا رَدی انسان ءِ سوبمندی ءِ یک بلاھیں کِردے دار ایت۔ انچوشکہ من گْوشتگ کہ ردی ءِ بارو ءَ چہ دامگ ءَ بے شمار گیدی ءِ گُشتین رس ایت ءُ اِے ھما گُشتین انت کہ گیدی ءِ بلاھیں ھستیِاں گْوشتگ انت کہ آ وتی اِمرُوز ءَ باز سوبمند بیتگ انت پمیشکا آیانی گُشتیناں تیوگیں دگنیا منّ ایت ءُ ایشانی ھمے وڑیں گُشتین ماں بازیں کارجاہ، شھدربرجاہ ءُ کارگِساں جارتاک رنگ نبشتہ ءَ انت کہ مردم چہ ردیاں دلاپ مہ بیت بلکیں ایشاں وان انت چہ ایشاں سکین بزیر انت۔ چوناھا من چُشیں گُشتین باز ونتگ ءُ بلے چہ ھمے سدیں گُشتیناں من ءَ سَے کسانیں گُشتین باز وش بیتگ، البت نی من لوٹ آں کہ یک یکی ءَ ھمے سَے ئیں گُشتیناں گوں جْوانیں گیشواری ءَ وتی راج ءِ دیم ءَ بیار آں داں راج پوہ بیت کہ ردی چے ءَ را گْوش انت۔ نی اولی گُشتین ءَ ما دلگوش بہ ایں
1- واجہ کیولن ونگ چہ وتی یک گُشتینے ءَ گْوش ایت ” ھما مردم کہ ردی نہ کنگ ءَ انت بزاں ھما ھچ نہ کنگ ءَ انت”
اگاں تو اے گُشتین ءَ شَر سرپد بَہ ئے گُڑا چہ اے گُشتین ءَ اے پدر بیگ ءَ انت ھر کار ءَ را رَدی مان انت ما ھرکسے چہ وانگجاھاں یکشل ءَ رَدی کنان ءُ دربرگ ءَ ایں ءُ گیدی ءِ ھر باج بُرتگین ءَ ردی کتگ۔ ایوک ءَ ھما مردم کہ رَدی نہ کنگ ءَ انت آ نابود ءُ اوشت ءِ آماچ انت یا آیانی دست ءَ ھچ کار نہ بیگ ءَ انت پمیشکا باید انت ما بلوچ بِہ زان ایں کہ اِمرُوز ءَ رَدی ءِ ٹوھیں ارزِشتے ھست بلے لھتیں مردم ناسرپد انت ءُ اے نہ زان انت کہ منی مرچیگیں سوبمندی ءِ بُنھِشت چہ ھمے رَدیاں ایر بیتگ چی ءَ کہ بنی آدم چہ مات ءِ لاپ ءَ بَلد نہ انت بلکیں مُدام چہ وتی واھشت ءُ زھمت کشی ءَ دربُرتگ ئِے، چہ وتی رَدیاں باج بُرتگ ئِے۔ نی من دومی گُشتین ءِ سر ءَ درنگازی کن آں
2- ھمے وڑ ءَ ڈاکٹر پی. ایس. جگدیش کُمار گْوش ایت ” داں وھدے کہ تو وتی ردی ءَ مہ منّ ئے بزاں تو ھچ نہ کنگ ءَ ئے”
چہ اے گُشتین ءَ ھُدامُرزی واجہ جگدیش کُمار ءِ مول ءُ مراد ایش انت کہ تو ردی کن بلے رَدی ءَ رند وتی رَدی ءَ منّ ءُ شون بِہ دے ئِے کہ چد ءُ پد ھما یکیں ردی ءِ پیشامَد مہ بیت، اگاں ترا تئی دوزواھیں سنگت ءُ استادے ترا دلبڈی دیگ ءَ انت کہ جُنزان کن تئی کار باز جْوانین وڑے ءَ دیم ءَ روگ ءَ انت بلے وتی اے کسانیں ردی ءَ شون بِہ دے گُڑا باید انت مردم وتی ھما رَدی ءَ راست کنان ءُ جُنزان کنت ناں کہ ھما رَدی ءَ کور مہ کنت ءُ یکشل ءَ گوں ھما ردی ءَ جُنزان کنت گُڑا ایشی ءَ سومندی نہ گْوش انت بلکیں اے ردی دیمتِر ءَ باز زیانی دنت
3- چہ گڈسری گُشتین ءَ واجہ ھنری پورڈ گْوش ایت” یکجاھی ءَ آیگ سوبمندی ءِ بُنھِشت انت، ھمکوپگ بیگ شُمئے دیمروی ءِ گواھی انت ءُ یکجاہ کار کنگ شُمے باج انت”
بزاں ھنری پورڈ ءِ اے گُشتین ٹیم ورک ءِ بابت ءَ انت کہ اگاں یک مردمے ماں یک گلے ءَ باسکی دار ایت گُڑا ھمے مردم ءِ زمہ واری انت کہ اول گل ءِ مول ءُ مُراد ءَ بزان ایت کہ اے گل ءِ شست چے انت ءُ دومی چہ ھمے گل ءَ چیزے دربارت، ھمے داب ءَ گل ءِ ھر باسک ءِ زمہ واری انت کہ پہ گل ءِ دیمروی ءِ واست ءَ وتی وس ءُ واک ءَ وتی جُھد ءَ برجاہ دار ایت ءُ زیت چہ گل ءِ باسکاں چیزے دربارت۔ بِہ گند ئے چہ اے سَے ئیں گیدی ءِ گُشتیناں یک چیزے پدر انت کہ بنی آدم چہ ردیِاں مہ تُرس ایت بلکیں چہ ردیاں دربرگ ءِ جُھد ءَ کنت۔
نی من وتی نبشتانک ءِ راستیں مول ءُ مُراد ءِ سر ءَ کایان ءُ راج ءَ یک سرپدی یے دے آں کہ بلوچ راج یک زیردستیں راجے پمیشکا آئی ءِ پدریچ ءَ را آئی جند ءِ راجی پجّار، آئی ءِ ماتی زبان بلوچی ءُ براھوی ماں وانگجاھاں وانینگ نہ بنت بلکیں زوراک بلوچ ءِ پدریچ ءَ زورانسری ءَ پارسی، ھندی ءُ سندھی ءَ وانینگ انت۔ نی بلوچ ءِ زمہ وار ایت کہ وتی ماتی زبان ءَ بہ وان ایت ءُ وتی ماتی زبان ءِ زگریں گالاں ماں وتی گُپتاری ءَ بیار ایت۔ چیزے روچ بیتگ کہ بلوچ راج ءِ تہ ءَ ماتی زبان ءِ وانگ ءُ زانگ ءِ یک روژنائیں آشوبے ودی بوتگ کہ چاگِردی رسانکدر ءِ ھر پِڑ ءَ بلوچ وتی ماتی زبان ءَ وانگ ءُ نبیسّگ ءَ انت، بلوچی تندجاھاں ھمروچ بے کساس بلوچی نبشتانک، آزمانک ءُ سرگْوست شِنگ ءُ شانگ بنت کہ بلوچ راج چہ آیانی وانگ ءَ ماتی زبان ءِ نبشتہ کاری ءَ زان ایت۔
چوناھیگا اے آشوب ءِ بُنھِشت لھتیں زبان دوستاں بلوچی وٹس ایپی وانگجاھانی ٹھینگ ءِ سوب ءَ آؤرتگ کہ بلوچ راج ءِ باھندیں ورنا وتی ماتی زبان ءِ نبشتہ ءِ سْیاھگ ءَ بِہ زان انت۔ نی ئیں وھد ءَ کساس دو سد بلوچی وٹس ایپی وانگجاہ ھست انت کہ اود ءَ شپ داں روچ بلوچ راج ءِ مھلوک وتی دزھُورکی ءَ ماتی زبان ءَ وانگ ءَ انت ءُ ھر وانگجاھی گل چہ باسکاں سر ریچ انت۔ اے پہ ماتی زبان ءِ لبزانکی ءِ دیمروی ءَ یک بلاھیں کارے کہ یک زیردستیں راجے وتی راجی زبان ءَ زندگ دارگ ءَ انت۔
بلے بژن انت کہ ھمے وٹس ایپی گلانی بلوچ باسک وتی ماتی زبان ءِ نبیسّگ ءَ سک دلاپ انت بزاں چہ نبشتہ ءِ ردیاں ترس انت۔ البت ایشاں نی کَے سرپد کنت کہ بنی آدم ءَ مُدام چہ رَدیاں دربُرتگ، اگاں ما ردی یے چیزے کن ایں گُڑا ماماتی زبان ءِ نبشتہ دربر ایں بزاں بے نبیسّگ ءُ بے ردی ءَ ھم ھچبر ماتی زبان ءِ ھزمت کنگ ءَ نہ ایں بلکیں وتی ماتی زبان ءِ نبیسّگ ءِ ھیل گِر ایں اگاں گروپ ءِ تہ ءَ سْیاھگ ءِ ردی یے بیتگ گُڑا گل ءِ یک باسکے مارا ھمے ردی ءِ شون دنت ءُ چہ ھمے یکیں ردی ءَ گل ءِ تیوگیں باسک دربر انت ءُ چوناھیگا ءَ راستی وَ ایش انت کہ ما پارسی ءُ ھندی ھم چہ ردیاں بُرتگ، کلاس ءِ چکاس ءُ ماشٹر لٹاں باید انت ما بے ھال مہ بَہ ایں۔
البت بلوچ وتی ماتی زبان ءِ گُپتاری ءَ ابرمی بَلد انت پمیشکا ماتی زبان ءِ وانگ ءَ ھچ وڑیں تکانسری یے مہ بیت ئِے بلے شَر نبیسّگ یک ماہ لوٹ ایت۔ بلوچ ءَ دزبندی انت کہ اگاں شُما ھپت ھشت سال ھندی ءُ پارسی ءِ دربرگ دے اِت گُڑا پہ وتی ماتی زبان ءِ وانگ ءَ ھم ماہ بہ دے اِت گوں۔ بلوچی درونت پیسبُک ءُ وٹس ایپی وانگجاھاں رس انت بس شُما وتی گوانکو ءِ تہ ءَ بلوچی کلیتاک ءُ بزانت بلد ءَ ایرگیج کن اِت، وتی ماتی زبان ءَ وان اِت ءُ وتی سْیاد ءُ وارساں بلوچی وٹس ایپی گلاں بلوچی ءَ بِہ وانین اِت۔ راج ءِ رھشوناں ھم دزبندی انت کہ وتی کلوہ ءُ پیگاماں بلوچی ءَ نبیس انت ءُ وتی گُلیں راج ءِ مھلوک ءَ ھم گْوش انت کہ ماتی زبان ءَ وان اِت انچوشکہ ماتی زبان ءِ وانگ ءَ گوں راج زبان دوست بیتگ، وھدیکہ راج زبان دوست بیت گُڑا ھما راج ءِ مھلوک راج دوست بنت وھدیکہ راج ءِ مھلوک راج دوست بیتگ انت گُڑا ڈیھ دوست بنت ءُ راجی ءِ گلامی آسر بیت۔
بلوچ ھست ءُ میزران بات انت۔ بلوچی زندگ بات، پارسی ءُ ھندی مرگ بات
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
