بلوچ اسٹوڈنٹس آرگنائزیشن آزاد کے مرکزی چئیرمین نے تنظیم کے سابق لاپتہ چئیرمین زاہد بلوچ کے والد الہی بخش بلوچ کی وفات پہ خاندان سے اظہار تعزیت کرتے ہوئے کہا کہ انتہائی دکھ اور افسوس کی بات ہے کہ بلوچستان میں بیشتر والدین اپنے بیٹوں کا انتظار کرتے کرتے اس دار فانی سے کوچ کرجاتے ہیں۔
چئیرمین زاہد بلوچ جنہیں اٹھارہ مارچ 2014 کو کوئٹہ کے علاقے سیٹیلائٹ ٹاؤن سے ماورائے عدالت گرفتار کرکے لاپتہ کیا گیا جن کی گمشدگی کے خلاف بلوچستان اور کراچی میں بڑے پیمانے پہ پر امن احتجاج بھی کیئے گئے لیکن آج چھ سال گزرنے کے باوجود زاہد بلوچ تا حال لاپتہ ہے۔
سہراب بلوچ نے مزید کہا کہ چئیرمین زاہد بلوچ کے والد الہی بخش بلوچ طویل عرصے سے بیماری کی حالت میں اپنے لخت جگر کو یاد کرتے ہوئے اس دنیا سے رخصت ہوگئے۔ اس سے قبل لاپتہ غلام فاروق کی والدہ بھی اپنے بیٹے کے انتظار میں وفات پاگئی تھی۔ نجانے ایسے کئی خاندان ہے جن کے لخت جگر لاپتہ کیئے گئے ہیں اور ان کے بوڑھے والدین اپنے پیاروں کی بازیابی کے لئے پر امن احتجاج کرتے کرتے دنیا سے رخصت ہوجاتے ہیں۔
الہی بخش بلوچ نے بلوچ قومی تحریک آزادی کے لئے زاہد جیسے رہنماؤں کو جنم دیا جن کی قول و فعل میں بلوچ سر زمین کی محبت رچی بسی ہوئی تھی۔
سہرب بلوچ نے کہا کہ بلوچستان میں میڈیا کی جانبداری اور اداروں کی خاموشی کی وجہ سے لاپتہ افراد کا مسئلہ گھمبیر شکل اختیار کرتا جارہا تھا اور کئی خاندان اپنے پیاروں کی بازیابی کے لئے ایک کرب سے گذر رہے ہیں اور اپنے پیاروں کو یاد کرتے کرتے اس دار فانی سے کوچ کرجاتے ہیں۔
انہوں نے کہا کہ عالمی ادارے بلوچستان کی گھمبیر صورتحال کا نوٹس لیتے ہوئے تمام لاپتہ افراد کی بازیابی کے لئے اقدامات اٹھا کر لاپتہ افراد کے لواحقین کو ان کربناک لمحات سے چھٹکارہ دلانے میں اپنا کردار ادا کریں۔
دریں اثنا بی ایس او کے سابق چئیرمین اور بلوچ نیشنل موؤمنٹ کے سابق سیکریٹری جنرل رحیم بلوچ ایڈووکیٹ نے
لاپتہ رہنما زاہد بلوچ کے والد محترم کے وفات پر تعزیت کی ہے۔
I am saddened by the demise of Meer Haji Ellahi Bakhsh Kurd who was father of Zahid Baloch, former chairman of @BSO__AZAD. Zahid Jan was abducted by #PakistanArmy from #Quetta on March 18, 2014 and he is still missing. I pray that Allah may give patience to the grieved family. pic.twitter.com/hvm3oiL5BZ
— Rahim Baloch (@RahimBalochh) April 20, 2020
رحیم بلوچ نے سماجی رابطوں کی ویب سائیٹ ٹوئٹر پر کہا کہ میر حاجی الہٰی بخش کرد کی وفات نے مجھے غمزدہ کیا، وہ بی ایس او آزاد کے سابق چیئرمین زاہد بلوچ کے والد تھے۔ زاہد بلوچ کو پاکستان آرمی نے 18 مارچ 2014 کو کوئٹہ سے اغوا کیا جوکہ ہنوز لاپتہ ہے۔ میری دعا ہے کہ اللہ تعالیٰ غمزدہ خاندان کو صبر عطاء فرمائے۔
