مجید بریگیڈ! راج ءِ ھَستی ءِ نشانی
نبشتہ: ھلیل بلوچ
دی بلوچستان پوسٹ
بَرے بَرے زِند ءِ تہا انچُشیں ساھت کَئیت کہ مجگ کار ءِ کنگ یل دَنت، مردُم ھِچ نزانت کہ چے بکنت۔ بازین مردُمے ھمے گْوشیت کہ چہ پَھر ءَ مردُم بے سُد ءُ سما بیت۔ وَڑ وڑیں ھیال چمّانی دیم ءَ جمباز کن اَنت ءُ اندیم بَنت۔ گُڑا من وتا شوھاز کنگ ءَ در کَپاں کہ منی کِرد چے اِنت؟
مرچی پَدا ھمے وڑیں ساھتے اَتک کہ ھمروچی کار ھم چہ منا بوھگ ءَ نہ اِت اَنت۔
دمانے پیسر سنگتے اَتک ھال ئِے دات کہ مجید بریگیڈ ءِ سنگتاں گْوادر پی سی ہوٹل ءِ سَرا اُرش کُتگ۔
مجید بریگیڈ ءِ نام ءِ اِشکُنگ ءَ مردُم سَرپد بیت کہ سنگتاں پِدائی یے کُتگ۔
باز بَراں من ھمے جیڑاں کہ زِند پرچا انسان ءَ را چو دوست بیت ءُ گْواچن ءَ ھم ھمے وڑ اِنت کہ مَرگ ءِ دیم سکّ تامور ءُ مُج اِنت۔
بَلے باز بَراں وتی راجی جُنز ءِ تَہا من دیستگ کہ منی راج ءِ کُنگریں بچّاں کَپن سرا بَستگ ءُ در اَتکگ اَنت ءُ دُژمن ءِ ھلاپ ءَ جَنگ اِش کُتگ۔
پدا چُشیں کسّہ انّی راج دَپتر ءِ توکا سکّ باز رسیت کہ دُژمن ءِ دیم ءَ سر جَھل کنگ ءِ بدل ءَ سنگتاں گُڈّی تیر وتی سینگ ءَ سُمبھتگ ءُ ھاک ءِ وَپا ءَ نْدر بوتگ اَنت۔
انّی وَ بلوچ راجی جُنز ءِ دَپتر یکبرے پدا نوک بوھاں اِنت کہ ایشی تَہا مجید بریگیڈ ءِ سنگتانی کِرد چو کوہ البُرز ئیگ ءَ مِک اِنت۔ پرچا کہ کسّے پہ مَرگ ءَ انچو جاڑی ءُ ساڑی بہ بیت کہ آئرا مالُوم بہ بیت اے سَپر منی گُڈّی سَپر اِنت بَلے انگت ءَ دیم ءَ جُنزان بکنت اے وڑیں پگر ءُ ھیال چہ مئے وڑیں ناسرپدانی وس ءُ واک ءَ چہ ڈنّ اِنت۔
جَنگ ءِ دیم چوناھا تَہار اِنت چوکہ شاعر گْوشیت:
وش نہ اِنت جنگانی بدیں بولی
کئے وتی دوستیں مردماں رولی
بَلے یک انچیں وھدے انسان ءِ سَرا کئیت کہ آ وھد ءَ جنگ کنگ انسان ءِ سرا الّمی بیت۔ پرچاکہ آ وھد ءَ اگاں انسان ءَ جنگ نہ کُت گُڑا بزاں ھما انسان ءِ راج ءَ کسّے چہ گاروٹی ءَ رَکّ اِت نہ کنت۔
گُڑا بلوچ ءِ سرا ھم ھمے وھد اَتکگ کہ بلوچ وتی راج ءِ رکھینگ ءِ ھاترا جنگ بکنت۔ بلوچ اے وھد ءَ جنگ ءِ توکا اِنت چو زانگ نہ بیت کہ ما وتی راج ءَ چہ بیگوائی ءَ رکھینت کنیں یا اناں۔ بَلے یک نیمگ ءَ ما دِلجمیں کہ بلوچ وتی راج ءِ پہازگ ءِ ھاترا دْرستیں سیمسراں چہ گْوزیت۔
کیگَدیں گْوادر! تَرا کسّے پہ بدیں چمے بہ چاریت گُڑا آئی ءِ چمّانی کَشّگ منی سَرا الّمی اِنت۔
زیکّیں گْوادر پی سی ہوٹل ءِ سَرا اُرش ھم ھمے جنگ ءِ بھر اِنت۔ کہ ایشی تَہا ھما سرمچنڈ ءُ سرمچاریں بلوچ پُسّگ ھَوار اَنت کہ آھاں راجدپتر گوں ھوناں نوک نبشتہ کُت کہ بلوچ وتی راج ءِ پہازگ ءِ ھاترا وَتی سَراں نْدر کنت بَلے ھِچبر پُشت ءَ نہ کِنزیت۔
اے جزبگ ءَ نزاناں دری دُنیا کُجام نام ءَ دَنت بَلے من ھمے سرپد باں کہ گوں راج ءَ مھر ءِ گُڈّی سیمسر ھمیش اِنت کہ مردُم وتی زِند ءِ دْرستیں واھِشت ءُ ارماناں چہ گِستا بیت ءُ وتی جِند ءَ کُربان کنگ ءِ ھاترا مجید بریگیڈ ءِ سرمچنڈانی رِدا ھَوار بیت۔
اے جَزبگ روچ پہ روچ گیش بوھان اِنت کہ بلوچ ءِ وَرنا مجید بریگیڈ ءِ تَہا گیش ءَ چہ گیش ھَوار بوھان اَنت پرچا کہ بلوچ ءِ وَرنا انّی سرپد اَنت کہ وتی ڈیھہ ءُ راج ءِ پہازگ ءِ ھاترا چُشیں کَدم زورگ الّمی اِنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
