“پابندی (گلامی) آزاتی ءِ چپ اِنت”
فراز بلوچ
دی بلوچستان پوسٹ
پابندی آزاتی ءِ چپ اِنت، ھما مردمءِ سرا ھچ وڑیں پابندی نیست انت، آ آزات اِنت۔ اگاں پگر ءُ عمل ءَ ھچ وڑیں پابندی نیست، آ آزات اَنت۔ اے ھم راست انت عمل پگر ءِ گُلامَ انت۔ بزان انسان اولی سرا جیڑ یت گوں وتی جیڑگاں ھما کہ گار اِنت، نیست انت آئی ءَ چہ وتی عمل ءَ ہستی ءُ وجود دنت، ھما کہ زاہر نہ بیت آ نیستی (عدم) لیکگ بیت۔
ماچو گُشت کنیں جیڑگ نیستی (عدم) اِنت عمل آئی ءِ ہستی (وجود) اِنت ،آزاتی عدم انت ءُ وتی عمل ءِ سفرءَ وجود ءَ سر بوھگ لوٹیت، پرچا کہ جیڑگ ءِ سیادی گوں غیب ءَ اِنت، تئی جیڑگ ءَ دگہ ہچ بنیادم ءِ دزرس نیست، ہمے ھاتر ا جیڑگءِ سرا پابندی بیت ھم نہ کنت، انسان جیڑگ ءَ آزات اِنت ءُ اے یک دروگیں اصطلاح اِنت پرچا کہ جیڑگ ءَ کس پابند نہ انت ۔
اسل ءَ انسان عمل ءِ آزاتی ءِ واھگ داراِنت، پرچہ کہ عمل ءِ پڑءَ (میدان ) انفرادی نہ اجتماعی کار بنت یک مردمے ناں بلکیں چاگرد ءِ لس مہلوک ھوار بنت یاَ عمل ءَ گوں ھمگْرنچ بنت، راج دپتر شاہد انت گلامیں چاگرد ءَ ہُژار ءُ عیاریں ھاکم طبقہ سادگ ءُ ایمنی ءِ منوکیں مہلوکءَ لٹ ءُ پُل کن انت، ھر وھد ءَ وڑ وڑیں پندل سازانت، ءُ لس مہلوک ءَ رَد دئینت ءُ مہلوک ءِ مال ءُ مڈی ءِ سرا قبضہ کن انت ۔
دومی نیمگا ھاکم طبقہ لُٹ ءُ پُل ءِ پالیسی ءَ برجاہ دارگ ءِ ھاترا ءُ مہلوک ءِ سرکشّگ ءِ دیما دارگ ءَ پندل ساز اَنت۔ مذہبی رہشونانی کمک ءَ زیر اَنت ءُ مہلوک ءِ مال ءُ مڈّی پُلگ ءَ وتی حصہ دار ھم کن انت۔ اے ملا ملٹری وتی مدرسہ ءُ مسیت ءَ ھم کارمرز کن اَنت ءُ لس مہلوک ءَ مرگ ءَ پد جنت ءِ وش ءِ واب پیش دار انت ءُ مہلوک ءَ نیک راہی (مذہب)ءِ نامءَ رد دئینت۔
اے ملا ملٹری سرمایہ دار ءُ جاگیر دارانی مال ءُ مڈّی ءَ ھدا ءِ داتگیں سوگات ءِ نام دئینت ءُ لس مہلوک ہمے سرپد بیت کہ درست ھدا ءِ کار انت۔ ایشانی ھلاپ ءَ جیڑگ ءُ سرکشّگ ءَ لس مہلوک ءِ دیما دوزہ ئے بورڈ ءَ جَن اَنت ءُ آہاں دیما رؤگ نئیل ات ۔
ھمے جاہ اِنت لس مہلوک وتی آزاتی ءِ بابت ءَ جیڑ اِیت وتی پگر ءَ عمل کنگ ءُ وجود دئیگ ءِکوشش ھم کنت، ھمے لکیر انت کہ اشی ءِ یک نیمگے ءَ آزاتی انت دومی نیمگا گلامی (پابندی) اِنت ۔
اے لکیر ءِ ھلاس بوگ ءَ پد انسان آزات بیت ۔اے لکیر شعور انت لکیر ئے یک نیمگےءَ جّنت اِنت ءُ دومی نیمگا دوزہ اِنت۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
