راجانی پھریزگ ءِ ھاترا راجی دود ءُ ربیدگانی پھریزگ ھژدری اِنت ءُ دود ءُ ربیدگانی پھریزگ ءِ ھاترا زبان ءِ پھریزگ ھژدری اِنت زبان ءَ پھریزگ ءِ ھاترا ھما زبان ءَ کارمرز کنگ ھژدری اِنت، پرچا کہ زُبان راجانی زندمان اِنت ءُ بے زبان ئیگ ءَ نہ راج سرجم بِیت نہ راجی دود ءُ ربیدگ….. بلکیں ما گُشت کناں ھما راجے کہ چہ وتی زبان ءَ سست گڑا ھما راج پھک ءَ گار ءُ بیگواہ بِیت.
انچو یونیسکو ءِ رِد ءَ ماتی زبانانی مرگ ءِ سوب ایش اَنت کہ ھما زبان ءِ مھلوک وتی زبان ءَ یلا بدینت ءُ دگہ زوراکیں زبانے بزیر اَنت یا زبان ءَ چہ دیمروی ءَ رکّھگ ءِ ھاترا زوراکی ببیت، کہ وانگ ءُ زانگ ءِ سرا پابندی ببیت،
21 فروری ءِ روچ دُگنیا ءِ تہا ماتی زبانانی درگت ءَ دارگ بیت، ایشی ءِ موْل ءُ مُراد ھمیش اِنت کہ مھلوک ءَ ماتی زبانانی ارزشت ءِ باروا سوجْ دیگ ببیت. مئے ماتی زُبان بلوچی اِنت کہ پہ بلوچ راج ءَ بلاھیں ارزشت یے داریت، بلئے بلوچ سرڈگار ءِ بھر ءُ بانگ بگُشئے یاں کہ گُلامی ءِ آسر…. بلوچی زُبان مزنیں کچّے ءَ تاوان بار کنگ بیتگ.
دُگنیا ءِ ھمُک زوراک ءِ وڑا پاکستان ءَ ھم بلوچ سرڈگار ءِ سرا وتی زوراکی برجم دارگ ءِ ھاترا بلوچی زبان ءِ ھلاپ ءَ ھر پیم ءِ پندل سازتگ داں کہ بلوچی زبان گار ءُ بیگواہ ببیت.
لہتیں وھد پیسر UNESCO ءِ رپورٹ ئےِ چمّانی دیم ءَ اتک کہ دُگنیا ءِ تہا اے وھد ءَ ہپت ہزار ءُ چیزّے زبان پشت کپتگ کہ ایشانی تہا مزنیں بھرے نزوریں زبانانی اِنت، ھمے کَرن ءِ ھتمی ءَ گوں ھْور سد ءَ چہ گیش زبان ھم گار ءُ بیگواہ بنت، کہ ایشانی تہا “براہوئی” ھم گوں ات کہ بلوچستان ءِ دومی مزنیں زبان اِنت، اے رپورٹ من ونت تہ من جیڑگ ءَ لگ اتاں کہ چو مہ بِیت ھمے زبانانی تہا ماتی زبان بلوچی ھم ھوْر ببیت. چیا کہ ماسٹر کنگ ءَ پد ھم من نہ بلوچی وانگ ءُ نہ نبشتہ کنگ زانگ اتاں. من پٹ ءُ پول کُت تہ منا بلوچی لبزانک ءِ مزنیں مواد یے دست کپت، تہ من پہم اِت کہ بلوچی وانگ ءُ نبشتہ کنگ نہ زانگ ءِ مزنین سَوَب پاکستان ءِ وانگ ءُ زانگ ءِ ادارہ اَنت کہ پہ بلوچی ءِ گار کنگ ءَ یک شل ءَ پندل سازگ ءَ اَنت.
زورگیریں پاکستان چہ اولی روچ ءَ بلوچی ءُ براہوئی زبان ءِ ھلاپ ءَ پندل سازگ ءَ اِنت، داں کہ بلوچ چہ وتی ماتی زباناں زبھر ببنت ءُ بلوچ وانندہ چہ بلوچی ءُ براہوئی لبزانک ءَ دیر ببنت ایشی ءِ درور ھمیش انت کہ اولی روچ ءَ بلوچ ءِ چُکّ وانگجاہ ءَ رَوْت گُڑا آئی دیم ءَ یک انچیں درآمدیں زبان یے آرگ بیت ءُ وانینگ بِیت کہ آ پھک ءَ چہ ایشی ناسرپد اِنت، ءُ داں میٹرک ءَ ھمے زُبان ءِ جند ءِ سرپد بیگ ءِ جُہد ءَ کنت، ءُ اِچ پیم ءَ زانت ءِ دربرگ ءِ جُہد ءَ نہ کنت، ایشی آسر ءَ ھما چُکّ ءِ پگر ءُ زانت کُنٹ ءَ بیت.
ھالانکہ “یونیسکو” کہ ماتی زبانانی ھوالہ ءَ میاں اُستمانی گَل یے گُشیت:….
“چُکّ ءِ پگر ءُ زانت ءِ رُدوم ءِ ھاترا دربرجاہانی تہا ماتی زبان وانینگ الّمی اِنت.”
انچو شہ دربرجاہ ءِ ھال اِنت کہ بلوچی ءُ براہوئی آپشنل انت ءُ لبزانک ءِ جوانیں وانَگی یے ھم نیست ایوکا چَکّاس ءَ رٹّا ءُ نقل کنگ ءِ ھاترا چَکّاس بلدے رسیت کہ اِچ پیم ءَ سرجم نہ اِنت کہ یک لبزانک یے ءِ تام ءَ بدنت.
اے ھما اولی پندل انت کہ بلوچی ءُ براہوئی زُبان ءِ دیم ءَ چو کوہ ئیگ ءَ مِکّ انت.
دُگنیا ءِ تہا بازیں زبان نزور بیتگ اَنت آھانی نزوری ءِ سَوَب سیاسی ءُ چاگردی جیڑہ بیتگ اَنت، اگاں ھما نزوریں زبان ءِ پھریزگ ءِ ھاترا جوانیں گامگیج زیرگ نہ بیتگ گُڑا ھما زبان پھک ءَ بیگواہ بیتگ اَنت ءُ زبان ءِ بیگواہی ءَ گوں ھوْر ھما راج ءُ آئی دود ءُ ربیدگ ھم گار بیتگ اَنت انچو واجہ ہاشمی ءَ گُشتگ….
راجے کہ ببیت گُنگ نہ مانیت نہ مانیت
مانیت پہ ادارُکّے بزاں زندگ ءُ مُردار
اے وھد ءَ بلوچ راج آجوئی ءِ جہد کنگ ءَ انت بلئے بلوچستان ءِ زبان بلوچی ءُ براہوئی ءِ باروا اِچ پیم ءِ گامگیج زورگ بیگ ءَ نہ اِنت، منی ھیال ءَ ابیدے زُبان ئیگ ءَ راجی آجوئی ءِ جہد بے منزلیں، ءُ داں کہ ماتی زبان بلوچی ءُ براہوئی ءِ ارزِشت ما وتی قوم ءِ دیم ءَ نیارتگ انت تاں مئے جہد اِچ پیم ءَ سرجم نہ اِنت. چیا کہ مئے دژمن پاکستان اِچ رنگ ءَ بلوچی ءُ براہوئی ءَ دیمروی ءَ نیلیت، پاکستان شرّی سرپد اِنت کہ داں بلوچ ءِ ماتی زبان چہ بلوچ ءَ گِستا کنگ نہ بیتگ انت تاں اے آجوئی ءِ جُنز کاؤنٹر نہ بیت. پمشکا اے جُنز ءِ تہا پاکستان ءَ ھر وھد ءَ بلوچ ادیب، شاعر، گُشندہ ءُ بلوچی ءِ اُستاد تاوان بار کُتگ انت. ایشی یک بلاھیں مثال یے بلوچی زبان ءِ دیمروی ءِ ھاترا کار کنوکیں استاد زاہد آسکانی ءُ پروفیسر سباہ دشتیاری ءِ شہید کنگ اِنت.
بلوچ راج دوستیں بی این ایم، بی ایس او آزاد، ءُ بی آر پی ءَ چہ دستبندی کناں کہ 21 فروری ءَ ماتی زبانانی درگت ءَ اے روچ ءَ سرکل بجن انت ءُ ماتی زبانانی دیمروی ءِ ھاترا باکائدہ کمیٹی بہ ٹہین انت کہ کار اش مھلوک ءَ ماتی زبانانی ارزشت ءِ باروا سرپدی دیگ ببیت.
گُڈ سرا چہ بلوچ راج ءِ کُلّیں ورنا ءُ کماش اں دستبندی کنیں کہ 21 فروری ءَ ماتی زبانانی درگت ءَ بدار انت ءُ مھلوک ءَ ماتی زبانانی وانگ ءُ نبیسگ ءِ سکین ءَ بدئے انت داں کہ مئے ماتی زبان بلوچی ءُ براہوئی تاں ابَد بہ مان انت.
بلوچی ءُ براہوئی مئے شھدیں زبان انت..!!
