ریال میڈرڈ نے اسٹار فرانسیسی فارورڈ کائلین مباپے کے دو گولوں کی بدولت روایتی حریف بارسلونا کو اسپینش فٹ بال لیگ لا لیگا کے اہم مقابلے میں 2-1 سے شکست دے دی۔
اتوار کو بارسلونا کے ہوم گراؤنڈ کیمپ نو میں کھیلے گئے ایل کلاسیکو میں مباپے نے پہلے ہاف میں ریال میڈرڈ کو برتری دلائی، تاہم دوسرے ہاف میں رافینیا نے گول کرکے مقابلہ برابر کردیا۔ میچ کے آخری لمحات میں مباپے نے اپنا دوسرا گول کرکے ریال میڈرڈ کی فتح یقینی بنا دی۔
اس کامیابی کے بعد ریال میڈرڈ نے لا لیگا کی سرفہرست ٹیم بارسلونا سے پوائنٹس کا فرق کم کرکے تین کردیا۔ پوائنٹس ٹیبل پر بارسلونا پہلے جبکہ ریال میڈرڈ تیسرے نمبر پر موجود ہے، جس کے درمیان اٹلیٹکو میڈرڈ کی ٹیم دوسرے نمبر پر ہے۔
بارسلونا کو رواں سیزن میں پہلی مرتبہ ملکی مقابلوں میں شکست کا سامنا کرنا پڑا۔ اس سے قبل ٹیم چیمپئنز لیگ میں پیرس سینٹ جرمین کے ہاتھوں بھی شکست کھا چکی تھی۔ یوں کاتالان کلب کو ایک ہفتے کے دوران مسلسل دوسری ناکامی کا سامنا کرنا پڑا۔
