انڈین وزیراعظم نریندر مودی کی حکمران جماعت نے طویل عرصے سے اپوزیشن کا گڑھ سمجھی جانے والی ریاست مغربی بنگال کے الیکشن میں پہلی مرتبہ فتح حاصل کر لی۔
انڈیا کے الیکشن کمیشن نے پیر کو جاری کردہ جزوی نتائج میں بتایا کہ بھارتیہ جنتا پارٹی (بی جے پی) نے 294 رکنی مغربی بنگال اسمبلی میں کم از کم 124 نشستیں جیت لی ہیں اور 83 پر اس کی برتری قائم ہے۔
مودی کی جماعت نے پہلے کبھی مغربی بنگال میں حکومت نہیں بنائی تھی اور وہ کئی سالوں سے ریاست کی وزیراعلیٰ ممتا بینرجی کی آل انڈیا ترنمول کانگریس حکومت کو ہٹانے کی کوشش کرتی رہی ہے۔
مودی کی نمایاں ناقدین میں سے ایک ممتا بینرجی 2011 سے اس سیاسی طور پر بااثر ریاست کی باگ ڈور سنبھالے ہوئے تھیں۔
اپوزیشن جماعتوں نے انتخابات پر سخت تنقید کی ہے کیونکہ الیکشن کمیشن نے لاکھوں ووٹرز کو انتخابی فہرستوں سے خارج کر دیا تھا۔
دو دیگر ریاستوں میں حکومتیں الٹ گئیں جبکہ اپریل میں ہونے والے انتخابات میں ایک اور ریاست میں مودی کی جماعت نے اپنی حکومت برقرار رکھی۔
انڈیا کے 28 ریاستیں اور آٹھ وفاقی علاقوں میں 1.4 ارب سے زائد آبادی ہے اور انتخابات مختلف ریاستوں و علاقوں میں ہر سال مرحلہ وار ہوتے ہیں۔
انڈین اپوزیشن کو دھچکا
مغربی بنگال کے نتائج سے مودی کی سیاسی طاقت کو مزید بڑھانے اور ان کی تیسری مدت کے درمیانی مرحلے میں ان کی پوزیشن کو مضبوط کرنے کی توقع تھی۔
2024 کے عام انتخابات میں ان کی جماعت کو حکومت بنانے کے لیے علاقائی اتحادیوں پر انحصار کرنا پڑا تھا۔ وہ 2029 میں ریکارڈ چوتھی مدت کے لیے انتخاب لڑنے کی توقع رکھتے ہیں۔
نئی دہلی میں بی جے پی ہیڈکوارٹرز میں اپنے حامیوں سے خطاب کرتے ہوئے مودی نے کہا کہ نتائج اس ریاست میں پارٹی کے بڑھتے ہوئے اثر و رسوخ کی نشاندہی کرتے ہیں، جہاں اسے تاریخی طور پر مشکلات کا سامنا رہا تھا۔
مودی نے پرجوش ہجوم سے کہا ’بنگال کی تقدیر میں ایک نیا باب شامل ہو گیا۔‘
انڈیا کی اپوزیشن بی جے پی کی ملک گیر بالادستی کو چیلنج کرنے میں مسلسل اور متحد ہو کر جدوجہد کرنے میں ناکام رہی ہے۔
ممتا بینرجی نے خود کو بی جے پی کے خلاف علاقائی جماعتوں کو یکجا کرنے کی ایک اہم قومی رہنما کے طور پر پیش کیا تھا۔
اس لیے ان کی شکست اپوزیشن اتحاد میں ان کے مؤثر کردار کو کمزور کر سکتی ہے جو پہلے ہی علاقائی طاقت کی کشمکش کا شکار ہے۔
فلمی اداکار سے سیاست دان بننے والے کی بڑی کامیابی
جنوبی ریاست تمل ناڈو میں معروف فلمی سٹار جوزف وجے نے، جنہوں نے صرف دو سال قبل تملگا ویٹری کژگم پارٹی قائم کی تھی، حکمراں ڈی ایم کے جماعت کو شکست دے دی۔
انڈیا کی ترقی یافتہ ترین ریاستوں میں شمار ہونے والی تمل ناڈو کا فلمی ستاروں کو اعلیٰ عہدوں تک لانے کی ایک طویل تاریخ ہے۔
کیرالہ میں، جو ایک اور جنوبی ریاست ہے، انڈین نیشنل کانگریس کی قیادت میں اپوزیشن نے حکمراں کمیونسٹ حکومت کو شکست دے کر اس کے آخری مضبوط گڑھوں میں سے ایک میں بائیں بازو کی حکومت کا خاتمہ کردیا۔
مودی کی جماعت نے شمال مشرقی ریاست آسام میں بھی مسلسل تیسری مدت کے لیے اقتدار برقرار رکھا۔
