بلوچ راجی جُنز ءُ سرنڈر
نبشتانک: هسابجار
دی بلوچستان پوسٹ
بلوچ راجی جُنز کہ بندات بوت – چہ زنده باد ءُ مرده باداں پد ، وهدے کہ جنگ پزور بواں بوت – تہ بازیں انچیں مردم هم گوں کپاں بوت انت کہ آهانی گور ءَ نہ وتی هاسیں لیکہ ے هست ءُ ناں آ پہ راجی آجوئی ءِ نیت ءَ ادا سر ات انت –
اے وڑ پمشکہ بوت کہ جهدکاراں چہ اسل کار ءَ ابید بازیں دگہ جیڑه هم دست ءَ پتاتگ ات انت
– بیت کنت کہ آ وهدی همے جیڑهانی دز جنگ ءِ وهد هم نہ ات –
آ جیڑه چاگردی جیڑه ات انت همیشانی دست ءَ پتاهگ ءَ بازیں تاوانے هم جنز ءَ رس ات – میتگ میتگانی تر ءُ گرداں بازیں سنگتے پاشک ءُ واشک بوت ءُ زوت شهید کنگ بوت انت –
دومی تاوان اے بوت کہ ہر وڑیں مردم گوں کپان بوت انت – چیزے پہ شوک ءُ چیزے پہ لاچاری ءُ چیزے پہ پنا ءِ هاتر ءَ ، اے سہیں ٹولیانی تہ ءَ یکے هم کار ءِ نہ ات – هو اداروکی بہ گندئے کار ءَ اتکگ ات انت – بلے اشانی هما دمانانی کاراں چہ دایمی ئیں تاوان گیشتر بوت انت –
ادا هم چیزے نزوری جنزیگ ات – همے گون کپتگیں مردم کجام وڑا کہ گون کپتگ اتاں اشانی جاگہانی دارگ ءِ هچ وڑیں چار ءُ بچار کنگ نہ بوتگ ات – جنز ءِ ہر وڑیں سُر ءُ پُراں هر جاگہ هوار ات انت –
کجام هم کارے کہ یکے وهد ءَ پیسر ءُ دومی بے وڑ کنگ بہ بیت تہ پرائی ءَ گیشیں تاوان المی بیت – بازیں وسریں رش ءُ کشانی سوب ءَ آ تاونے کہ جُنز ءَ رستگ آ مروچی مئے دیما انت –
همے رش ءُ کشان پد وهدے کہ دژمن چہ کوه ءَ ابید میتگ ءُ هلکان مانریتک ءُ پدا جاگہ ئےِ کُت – ءُ وتگریں سرنڈر مهیمے کہ بندات کُت – تہ کل همے گوں کپتگیں مهلوک ات – کہ جاهے سرمچارانی نام ءُ جاهے پارٹی ورکرانی نام ءَ سرنڈر بوان بوت انت – راستے کہ اے سرنڈر مہیم ءَ هچ چشیں لیکہی سنگت یا مهلوکے هوار نہ ات ءُ نہ انت هم ، بلے تاوان کلیں جُنز ءَ رست – جاگہ ، مردم ، راه ءُ رند ، کارانی در ، وڑ ءُ پیم هچی پشت نہ کپت – کل شے پاشک بوت انت – ءُ بوان انت هم –
ہرچی بوت وَ بوت بلے نوں باید همے سرنڈری آنی گر ءُ دار کنگ بہ بیت پرچہ کہ اے زی هم جنز ءِ مردم نہ بوتگ انت مرچی هم نہ انت ءُ باندا هم بوت نہ کن انت –
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
