ھُونانی ملپداں جزمّاں بھار کیت – زِرگْوات بلوچ

ھُونانی ملپداں جزمّاں بھار کیت

زِرگْوات بلوچ

دی بلوچستان پوسٹ

پہ تھاریں شپ ءِ بامینگ ءَ اُمیت ءُ اُوستانی جلاں روکیں مُساپِر ایردستیں زِندمان ءَ گوں آجوئی ءِ زیبائیں بْرمشاں رجگ لوٹ اِیت ، چیاکہ ھر ساھدار ءِ زِند بید ء آجوئی ءِ  مہنائیں شال ءِ مانپوشگ ءَ تھار دیم ءُ مرگ آماچیں آکبت ءِ ارجان اِنت ۔

اے کہریں گُلامی ءِ آس ھما روچ ءَ دمتُوس بیت کہ آجوئی   ءِ نود شنزیں کُلوہ گوں آتارگ ءِ زبادیں وشبوھاں شِنگ اِیت ۔ اے درگت ءَ بلوچی زُبان ءِ کلانیں شائِر واجہ ناکو مُراد ساھر جاھے گْوش اِیت

پہ گیابیں کوچگانی دائِمی سرسبزی ءَ !
سیرکگّیں وڈّاں چہ بیا نیلّیں زِرے پیدا کنیں

 ھما زِر کہ دُژمِن ءَ زیراپ کنت ءُ ھُشکاوگیں دشت  ، گیاب ءُ کوچگاں سبزین اِیت ، اے زِر ھُونانی زِر اِنت کہ  تئی ڈیھ ءَ پہ بانوری گوناپیت ءُ آسگْوار اِیں آکبت ءَ رُژناہ کنت ۔

بَہ کَول ءِ شھزانتیں واجہ سبا کہ مارا ھُونانی جوہ تاچینگی اِنت ۔ جیاکہ راجدپتر ھچ کسّ ءَزِندگ ءُ نامدار نہ کنت ، بلکیں پہ وتی  زِندگ کنگ ءَ جُھد ءُ کُوشست ھرکسی جِند ءَ گوں ھمگرنچ اِنت ۔

اے گپ ءِ مستریں منّانک ، منّ ءُ مول ھمیش اِنت کہ راجدپتر راجاں گوں وتی  داتگیں دیم ھُونی ءُ کُربانیاں ٹھینتگ اَنت ، پمیشکا مرچی پہ آیاں راجدپترے منتگ ءُ گیدی ناز کنت ۔

ھمے داب ءَ مرچی بلوچ راج ھم پہ وتی  ھستانک ءِ ساٹگ ءَ راجدپتر ءِ تاکدیم آں ھُوناں گوں نویسگ ءَ اِنت کہ منی سدپ گْوار ءُ تِلائیں زِندمانی ،  اُمیتانی سُھر چکّیں باندات تھار دیمی ءِ بدل ءَ رُژناہ بِہ بیت ۔

گُڑا من جزمّاں اے ھُونانی ملپداں آجوئی ءِ بھار سبز اِیت ءُ
شادِھانی رُولہ بُج اِیت ۔ مورمانٹ ءُ کلپیں ھاکمانی تند بستگیں واھش ءُ ارمان کدی پیلو نہ بنت کہ ما پہ زُوراک زُورانسری وتی  ھاکمی ءَ برجم دار اِیں نیکہ برٹش ءِ چِنڈالیں  پاکستان مست ءُ نوَلّ بیت۔

بلے ! پہ بلوچ راج ءَ شرتگیں وھد ءِ سما دار بُوَگ ھژدری اِنت ، چیاکہ پاکستان ھر نیمگ ءَ پہ بلوچ ءِ گاروٹی ءَ سِٹّ ءُ کپ کنگ ءَ اِنت داں من سوبین بِہ باں ءُ بلوچ ءَ پہ دائِمی چرے سرڈگار ءِ سر ءَ ھلاس بکن آں۔

پمیشکا اے بابت ءَ روچ پہ روچ بلوچ لیڈر شپ ءِ کُوپگاں راجی بار گْران تِر بُوھاں اِنت کہ آ پہ سِدک وتی  ڈیھ ءِ رکّینگ ءُ آجوئی ءِ ھاتر ءَ چنچو تپاکی ءُ یکمشتی ءِ لوٹوک اَنت۔

اے راستی یے! ” براس ” ھما لیکہ ءِ رِد ءَ ٹھینگ بیت کہ  ما راجی جُنز ءَ گوں تپاکی ءُ یکمشتی ءَ دیم ءَ بِہ بریں ۔
بلے! مئے تانسریں آجوئی ءِ سِلاہ بندیں گل پرچا ” براس ” ءِ  سنگر ءَ گِندگ نہ بنت ۔۔۔۔۔۔۔۔۔؟؟
اے کُجام سَوَب اِنت کہ مارا یکجاھی ءَ نیل اِیت ۔۔۔۔۔؟؟
مندوستی ءُ واجہی ءِ زھرگ اِنت  یا آشوبی رھبندانی پیلو کنگ ءِ ھاٹیگ مئے بالاد ءَ ساڑی نہ اِنت ۔۔۔۔۔۔۔۔۔؟؟
یا اے مئے نابودی ءِ مستریں منّانک اِنت ۔۔۔۔۔۔۔؟؟

چیاکہ سِنچ ، زانت ءُ پہم ، بودِشت ءُ لائکی ، آشوبی پگر ءُ لیکہ اے کُلیں چیزّاں پہ وت شات نہ کنت کہ آ راجی نپ ءُ سیتّانی دیم ءَ اڑاند ءُ ڈنگر بِہ بنت ۔
گُڑا اے ھبر راست بیت کہ بلوچ ءِ لیڈر شپ دنیگت وتی  بالاد ءِ سمبئینگ ءَ دزگٹّ اِنت ۔۔۔۔۔۔ یا نہ ۔۔۔۔۔۔۔۔؟؟

دومی دیم  ءَ سیاسی گلانی نیمگ ءَ کائے گُڑا ترا بلوچ نیشنل فرنٹ ” بلوچ راجی سنگر ” ھم ھمے داب ءَ گِندگ ءَ کیت کہ بی ایس او آزاد ءُ بلوچ نیشنل موومنٹ ءَ ابید دِگہ کس گِندگ نہ بیت پرچا۔۔۔۔۔۔۔۔ ؟؟

اے کُلیں جُستانی پسّو پہ بلوچ لیڈر شپ ءَ مہتل  ءُ نیم بُندگ اَنت ،
نہ زاناں کد ۔۔۔۔۔۔۔۔۔۔۔۔ ؟ پسّو کیت کہ پہ راجی زِندمان ءِ پھازگ ءَ کُل بلوچ ءِ رھشُون تپاکی ءُ یکمشتی ءِ سنگر ءَ نندوک اَنت۔
ودارِیگ پہ ھما روچاں۔۔۔۔۔۔۔۔۔۔۔
چیاکہ بلوچ ءِ کُنگریں پُسّگ ماتیں وتن ءِ ھر دمک ءُ در ، دشت ءُ کوچّگ ، کوہ گیاباناں پہ راج ءِ پاسپانی ءَ ساڑی اَنت ۔ ھرروچ یکّے ءِ شیھدی ءُ یکّے ءِ بیگْواھی ءِ ھال کیت ، چرے ھبر ءَ پدّر اِنت کہ بلوچ پُسّگاں دُژمِن بے تاھیر کُتگ
بلے! مارا نگیگیں وھد ءِ ھمراھی ءَ مْیان اُستمانی تاکتانی ھیال ءُ دلگوش ،
دومی اے ھم چارگی اِنت کہ مئے راجی جُنز ءَ دُگنیا کُجام نگاہ ءَ چارگ ءَ اِنت ۔
اے کُل تپاکی ءِ رھچار اَنت۔۔۔۔۔۔۔۔۔
بَہ کَول ءِ بلوچی زُبان ءِ نامداریں ءُ وتن دیوانگیں شائِر نمیرانیں واجہ گُلام ھُسین شوھاز وتی لچّہ ئِے تہ ءَ تپاکی ءِ بابت ءَ ھیالاں چو درشان اِیت

بیلاں دل  ءَ کہر مَہ بِت
وت ماں وت ءَ زھر مَہ بِت

ھم مکتب ءُ ھم گنگل اِت
مُرگ ءِ، وت ءُ وت بانزُل اِت

دستاں اگاں چمّاں جَن اِت
وتی دیدگاں کور کن اِت

ھچ کس شُمے دست ءَ نہ گیپت
شُمے واھگ ءِ پُلّ مِر اِیت

آزاتی ءِ شون اِنت تِپاک
سوب ءَ گُلیں گون اِنت تِپاک