آہ جنرل اسلم بلوچ
مُھتاج بلوچ
دی بلوچستان پوسٹ
نوں شمئے کوپگاں اِنت وتن ھمبلاں ۔
ھما اِنت من جیڑگ ءَ آں کہ پہ جنرل ءُ آئی ءِ مزاریں سنگتانی نام ءَ چے نبشتہ بہ کن آں ءُ آیانی راجی جُھد ءُ جپاھانی بابت ءَ چے درشان بہ کن آں ؟
بلے ھمُک رند ءَ کہ ند چِست کُتگ گوش ئے دانکاں دروہ اِت ءُ دستاں دْرھگ ئے بنا کُتگ ءُ اَرساں چو شرتگ ءَ شَل کُتگ ۔
ءُ انگت من ءَ باور نہ کنت کہ جنرل نمیران ءُ ابدمان بوتگ !!
بلکیں تھنا من نہ آں ، ھزاراں راج دوست ءُ گموار انگت باور نہ کنت ۔
پرچا کہ جنرل ءِ وڑیں انسانے ءِ سِدگ چہ مَرگ ءَ کمتر نہ اِنت بلے من پھر بند آں کہ جنرل پہ ڈیھ ءُ راج ءِ آجوئی ءِ راہ ءَ نمیران بوتگ ءُ مارا ھم بوگی اِنت ۔
ھما راہ کہ جنرل ءَ گوں نیک نیتی ءَ بُنگیج کُتگ اَت ، آ راہ آجوئی ءُ یک مُشت ءُ یکجائی ءُ گوں سرڈگار ءَ وپا کنگ اَت کہ نوں مئے کوپگاں اِنت ءُ الم مارا آئی داتگیں پنت ءُ سوجانی پد ءَ جُنزگی اِنت ءُ یزیدی لشکر پروش دیگی اِنت ءُ وت واجھائی گِرگی اِنت ۔
پہ راج ءِ آجوئی ءِ ھاتر ءَ جنرل ءَ وتئی تنگوئیں بچ ءُ ساہ ءِ ٹکُر ریھان جان ءِ ندر کنگ ءَ ھچ چک ءُ پد نہ بوت ءُ وت ھم پہ بلوچ راج ءَ ندر بوت، آئی ءِ ساپ دلی ءِ مستریں چیدگ اِنت ۔
اے گپ ءَ مارا ھیران بوگی نہ اِنت ، اگاں ما بلوچ ءِ راجدپتر ءَ چمشانکے بہ دئیں گڑا مارا ھزاراں جنرل اسلم گِندگ ءَ کیت کہ آیاں ھم پہ بلوچ راج ءُ ڈیھ ءِ آجوئی ءِ ھاتر ءَ وتئی سر ندر کُتگ اَنت ءُ انگت ھزاراں اسلم ھست کہ آ پہ سرانی ندر کنگ ءَ ساڑی اَنت ۔
من جیڑگ ءَ اِت آں کہ جنرل ءِ روگ ءَ چہ پد باریں آئی کھول ءِ تہ ءَ چے کمی کیت ءُ آ اے گرانیں بار ءَ چتو اوپار کن اَنت ؟
بلے وھدے کہ راجی لُمہ یاسمین ءِ کلوہ پہ راج ءَ آتک ءُ منی چم ءِ کپت اَنت گڑا دل ءَ گرکے جت ءُ جزبگانی دو داتکوئیں درچک ءَ شاہ ءُ شاھڑ جت ءُ من ھمے مار اِت کہ واکی ھستی چہ چماں اندر بنت بلے دلانی تہ ءَ اندر نہ بنت،
پرچا کہ جنرل پہ بلوچ راج ءُ پہ وتئی کھول ءَ یک ھستی اَت ءُ یک بے دروریں استادے اَت کہ آئی داتگیں پنت ءُ سوجاں آئی ءِ کھول ءُ بلوچ راج اَنچوش مُھکم کتگ ءُ اندر ءَ جاگہ داتگ کہ ھچ وڑیں زوراک استاد ءَ چہ بلوچ راج ءَ سِست نہ کنت ۔
من سدکاں جنرل ءَ دگہ ھزاراں استاد تیار کُتگ ءُ الم آ شریں رنگے ءَ راج ءَ داں آپ سرے ءَ سر کن اَنت ۔
بیا اِت نوں ما ءُ شما جنرل ءِ نیکیں واھگانی سرجمی ءِ واستہ ھور بئیں ءُ ھور جُنز اِیں ءُ کول ءُ مُسام کن اِیں اے آجوئی ءِ جُنز ءَ پہ نیک دلی داں منزل ءَ سر کن اِیں ۔
ڈیھ ءِ کُلیں شھیداں سُھریں دروت ۔
نوں شمئے کوپگاں اِنت وتن ھمبلاں
نوں شمئے کوپگاں اِنت وتن ھمبلاں
دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
