بلوچستان آ ایٹمی جُلہو
نوشت: کامران بلوچ
دی بلوچستان پوسٹ – براہوئی کالم
28 مئی نا دے دُن تو چاغی نا مخلوق اکن ہڑدے نا دے تیانبار ئس. ہمو ڈَول اوفک تینا مالداری، تینا زمہ داری و تینا ایلو کاریم تے ایسری تننگ ئسر. زالبولک اُراتیٹ تینا کُننگ، بسنگ و ایلو وخت تیری آ کاریم تیٹ گٹ ئسر ولے دا چاغی نا مخلوق ءِ ایلو تیوہ غا بلوچستان آنبار سما اَلو کہ اینو نا دے اوفتا زند اٹ بروکا کہی سال آتے اسکان اثر شاغوک مرو. 28 مئی نا دے ہراتم پاکستانی اسٹبلشمنٹ تینا طاغت ءِ جہاں ءِ نشان تننگ کن ایٹمی تراک اس کرے گڑا چاغی تون اوار تیوہ غا بلوچستان سُرا ولے او وختا ہم بلوچ مخلوق ءِ داتراک نا سوب آ بش مروکا ویل آتا بھاز درک اَلو.
پاکستان نا پارہ غان تینا دژمن ہندوستان و جہان نا ایلو ملک آتے تینا طاغت ءِ نشان تننگ کن ایٹمی تراک ءِ دا وختا بیست سال آن زیات مننگ ءِ ولے دا تراک نا سوب آن دے پہ دے آن بلوچستان نا ڈغار آ دانا اثر آک زیات مننگ ءُ.
ایٹمی تراک نا سوب بلوچستان اٹ دا گدریکو سال آتیٹ پِر کم مریسہ ہننگ ءِ و کیسنر نا بیماری تون اوار ایلو بیماریک زیات مریسہ ءُ، دا گڑاک اینو پاش وڑ اٹ خننگ اٹ بننگ ءُ ولے دافتیان بیدس گدریکو سال آتیٹ چاغی و بلوچستان نا ایلو مخلوق دا تراک آتا سوب آن کہی ویل آتا گواچی مریسہ ہنانے ہرافتیٹ بندغ آتا کہنگ، بیماری و معاشی ویل آک اوار ءُ.
اگہ کس دا پائے کہ پاکستانی اسٹیبلشمنٹ دا ایٹمی تراک ءِ پین جاگہ اس یعنی پنجاب یا سندھ اٹ کروس گڑا او رَد ءِ انتیکن ایٹمی تراک تینٹ اسہ رَد ءأ عمل ئسے. ایٹمی تراک نا سوب آن جاپان نا شار آتا دروشم اٹ خننگوکا تباہی ءِ خنیسہ تیوہ غا جہان ءِ دا بندغی نا دژمن آ بمب آن پاک مروئی ئس ولے غیر فطری آ ریاست پاکستان نا پارہ غان دا بمب ئنا تجربہ تیوہ غا جہان اکن اینو اسکان ہم اسہ بھلو سوج ئسے.
پاکستان نا ڈَول آ ملک ہرا مذہبی شدت پسندی نا ودشت کروک ءُ اہم ءُ کڑدار ئسے، اندا ملک کشمیر، ہندوستان، اوغانستان و ایلو بھاز آ ملک آتیٹ مروکا مذہبی دہشت گردی تا کمکار مسونے و دا بابت بھاز آ شاہدیک دا وخت اسکان مونا بسونو. اسانہ بن لادن آن ہلیس، اختر منصور و حقانی نیٹ ورک نا کارندہ غاک اندا ملک اٹ خلنگرہ ہرافتے پاکستان تینا ہند تسوسُس و اوفتے کمک کریکہ، اینو دا ہیت اٹ ہچو شک اس اَف کہ پاکستان اینو ہم مذہبی شدت پسند آتا کمکار ءِ ولے دا تیوہ غا گڑا تا ساڑی مننگ تون پاکستان اسہ ایٹمی طاغت ئسے، داڑے تیوہ غا جہان کن سوج مریک انت پاکستان نا ایٹمی سلاہک دا مذہبی شدت پسند آتا دوٹی بننگ کپسہ؟ و دا سلاء تا مذہبی شدت پسند آتا دوٹی بننگ نا مطلب پاش ڈول اٹ تیوہ غا جہان نا تباہی ءِ.
پاکستان نا پارہ غان بلوچستان آ کوزہ 1948 آ مس و انداڑتون بلوچستان آ زُلم و بے دادی تا بناء مس. پاکستان تینا کوزہ گیریت ءِ توننگ کن ہر وڑ ئنا بے دادی تے بلوچ مخلوق آ کرے. بلوچ مخلوق ءِ پاہو تننگ، بلوچ مخلوق نا حکومت آتے ایسر کننگ، خلنگ، سیاسی پارٹی تا باسک آتے بے گواہ کننگ و اوفتا جشوک آ جُون تے چغل تننگ نا بے دادیک مریسہ کرینو ولے پاکستان نا بلوچستان اٹ ایٹمی تراک دا ہیت نا شایدی ءِ اوفک بلوچ ءِ مخلوق ءِ ہچبر خواتنو بلکن اوفتے بیرہ دا ڈغار تون غرض مسونے. راسکوہ اٹ مروکا ایٹمی تراک بلوچستان و بلوچ مخلوق آ مروکا ہمو بے دادی تا بشخ ئسے کہ پاکستان نا اسٹیبلشمنٹ کہ دا عمل شعوری وڑ اٹ کرے کہ بلوچ مخلوق نسخان کنے، بلوچستان اٹ دا ایٹمی تراک پاکستان نا پارہ غان اسہ ایٹمی جلہو اس پاننگ مریک کہ او تینک اسہ خطرہ اس محسوس کروکا قوم دادے ترغفے دنکہ تدوکا وخت آتیٹ مُلک آک تینا دژمن مُلک آتیا ایٹمی جلہو کرینو.
اینو بلوچ آزاتی نا تحریک نا سوب آن تیوی آ جہان دا بے دادی تا بابت معلومداری دے پہ دے آن زیات مننگ ءِ. دا رِد اٹ خاص وڑ اٹ پیشن نا مخلوق ءِ معلومدار کننگ نا خواست مسونے و بلوچ تحریک تون تفوک آک پارٹیک دا بابت تینا کوشست آتے برجاء تخانو ولے ہرا بابت نن مالو نا نوشت آتیٹ ہیت کریسن دائسکان حالیت ہمون ءِ، بلوچ تحریک تون تعلقدار آ پارٹی تا مزاج و کاریم نا ڈَول ہمون ءِ. تدوکان سال آنبار دا سال ہم بلوچ پارٹی اسہ مشترکہ ءُ موقف اس دا اہم آ دے تا بابت مُونا ہتنگ کتنو، مننگ کیک کس اس شعوری وڑ اٹ دا دے تے متنازع کریسہ بلوچ طاغت ءِ پین زیات بشخ بانٹ کننگ خوائک ولے زمہ داریک ننا راہشون تیا بریک سلیک کہ اوفک دا رِد اٹ تینا کڑدار ءِ مُونا ہتیر.
دژمن ریاست نا بے دادیک برجاء مسونو و برجاء مرور ولے بلوچ قومی تحریک دائسکان سوگوی نا خواستگار ءِ. اگہ نن داسہ ہم دا خواست آتے پُہہ متون تو 28 مئی 1998ء نا وڑو پین بے دادی تے خننگ کن تیار مرین و اونا سوب آن تینا مخلوق، تینا قوم نا نسخان ءِ ارفن.
