بلوچستان کے ضلع دُکی میں افغان مہاجرین کے خلاف جاری آپریشن کے دوران ایک افسوسناک واقعہ پیش آیا ہے، جہاں گرفتاری کے خوف سے چھپنے والا افغان مزدور کانکن زہریلی گیس کا شکار ہو کر جانبحق ہوگیا۔
تفصیلات کے مطابق افغان شہری روح اللہ ولد محمد کریم توخئی، ساکن افغانستان نے حکام کی کارروائی کے دوران گرفتاری سے بچنے کے لیے ایک کوئلہ کان کے ہالج میں پناہ لی۔
تاہم کان میں زہریلی گیس کی موجودگی کے باعث دم گھٹنے سے اس کی موقع پر ہی موت واقع ہوگئی۔
واقعے کے بعد مقامی مزدوروں نے لاش کو کان سے نکال کر قریبی اسپتال منتقل کیا جہاں موت کی تصدیق کی گئی۔
مقامی ذرائع کے مطابق دُکی میں افغان مہاجرین کے خلاف آپریشن کے دوران کوئلہ کانوں میں کام کرنے والے افغان مزدوروں کی پکڑ دھکڑ کا سلسلہ جاری ہے جس سے مہاجرین میں شدید خوف و ہراس پایا جاتا ہے۔
واقعے کے بعد انسانی حقوق کے کارکنوں اور مقامی مزدور یونینز نے افسوس کا اظہار کرتے ہوئے مطالبہ کیا ہے کہ کانوں میں کام کرنے والے مزدوروں کے تحفظ کو یقینی بنایا جائے اور آپریشن کے دوران انسانی جانوں کو لاحق خطرات کا فوری نوٹس لیا جائے۔
