ترجمان حکومت بلوچستان نے بلوچستان نیشنل پارٹی کی جانب سے لانگ مارچ کے اعلان کے ردِعمل میں کہا ہے کہ بی این پی کا لانگ مارچ نہیں ہونا چاہیے، سیکورٹی تحفظات کی وجہ سے حکومت بلوچستان کو اس حوالے سے بڑی تشویش ہے۔
انہوں نے ایک پریس ریلیز میں تحفظات کا اظہار کرتے ہوئے اس بات پر زور دیا کہ عوام کے تحفظ اور امن و امان کا قیام صوبائی حکومت کی ذمہ داری ہے۔
انہوں نے کہا کہ پرامن مظاہرے ایک بنیادی حق ہیں، لیکن اس بات کو یقینی بنانا بہت ضروری ہے کہ ایسی سرگرمیاں شہریوں کے تحفظ اور سلامتی کو خطرے میں نہ ڈالیں۔
انہوں نے کہا کہ سیکیورٹی خدشات کے پیش نظر ایسی سرگرمیوں پر پہلے ہی سے پابندی عائد ہے۔
انہوں نے بی این پی پر زور دیا کہ وہ لانگ مارچ ملتوی کرے۔
دریں اثناء دارالحکومت کوئٹہ میں فلسطین کے حق میں مظاہرے پر بی این پی کے سردار اختر جان مینگل نے کہا کہ فلسطین کے حق میں مظاہروں کی اجازت ہے جبکہ بی این پی کیجانب سے مظاہروں پر کارکنان پر ایف آئی آر درج کی جاتی ہے۔
