بلوچستان کے صنعتی شہر حب چوکی اور پنجگور میں فائرنگ اور دیگر نوعیت کے واقعات میں بچہ سمیت چار افراد ہلاک ہوئے ہیں۔
اطلاعات کے مطابق گذشتہ روز حب چوکی کے علاقے پیرکس روڈ شیرانی فارم ہاؤس کے قریب فائرنگ کے واقعہ میں انیس سالہ محمدحسن ولد عبدالقادر نامی شخص ہلاک ہوا ہے جبکہ حب چوکی کے علاقے امیر آباد میں ایک گھر سے ایک بچے کی لاش برآمد ہوئی۔
نعشوں کو حب اسپتال منتقل کردیا گیا اور ضروری کارروائی کے بعد نعشیں ورثاء کے حوالے کردی گئی۔
مزید برآں وندر رانا بھٹ کے قریب گذشتہ روز سیلابی ریلے میں بہہ کر ایک شخص جاں بحق ہوگیا، متوفی کی نعش نکال کر اسپتالمنتقل کردیا گیا۔
ایدھی ذرائع کے مطابق سیلابی ریلے میں ڈوب کر جاں بحق ہونے والے شخص کی شناخت نہ ہوسکی ہے۔
ادھر پنجگور سے اطلاعات ہیں گذشتہ شب پنجگور کے قریب کے علاقے وش آپ سریکوران کے مقام پر فرزاد ولد سہراب سکنہ واشکحال پنجگور اپنے گھر کے صحن میں بیٹھا ہوا تھا کہ مسلح افراد نے اسے نشانہ بنا کر ہلاک کردیا۔
تاہم واقعے کے محرکات تاحال معلوم نہیں ہوسکے ہیں۔
