یکشنمبہ نا دے 1:30 بجہ غا شیوان ادبی کاروان بلوچستان نا پارہ غان ہائی اسکول عیسیٰ چاہ ٹی اسہ سیمینار ئس اڈ تننگا ہرانا صدارت ءِ شیوان ادبی کاروان بلوچستان نا مرکزی چیئرمین حفیظ مینگل کرے، مہمانِ خاص ڈپٹی کمشنر نوشکی عبدالرزاق ساسولی، اعزازی مہمان تحصیلدار احمد یار سیاپاد و ڈسٹرکٹ ایجوکیشن آفیسر جمیل احمد مینگل ئسک ئسر۔ مہمان تے بلوچی حال احوال آن گڈ مجلس نا باقاعدہ بناء مس، مجلس اِرا بشخ اٹ تالان ئس۔
اولیکو بشخ اٹ پبلک لائبریری ڈاک عیسیٰ چاہ نا باقاعدہ بنائی دود ءِ ڈپٹی کمشنر نوشکی عبدالرزاق ساسولی کرے۔ اندن دانش مینگل شیوان ادبی کاروان بلوچستان نا مرکزی کابینہ غان سوغند ہلک۔
اوکان گڈ مولانا ضیاء جان نا اولیکو کتاب (درءعرب)، عمران فریق نا کتاب (شاعری نا اولیکو کتاب)، عرض جان ظہیر نا کتاب (پلوناگرنگ)، ڈاکٹر لیاقت سنی نا کتاب ( چکار)، عمران فریق نا کتاب (اونا اولی گلاب کنتونے) نا مون پاشی کننگا۔
مجلس ٹی علاقہ نا پیہن ریشیک میر غلام شام مینگل، حاجی میر محمد شاہ مینگل، میر قدرت اللہ مینگل، میر مراد خان مینگل، میرعاقل خان مینگل، میر مہراللہ خان مینگل، ڈاکٹر علی اکبر مینگل، میر نصرت اللہ مینگل و پین کہی بندغاک ساڑی ئسر۔
مجلس آن نصرالدین بلوچ، حق نواز شاہ، عبدالستار، ابوحزیفہ، ہیڈ ماسٹر ہائی سکول عیسیٰ چاہ بشیر احمد بادینی، ڈی ای او جمیل احمد مینگل، ڈپٹی کمشنر نوشکی عبدالرزاق ساسولی، مرکزی چیئرمین خواجہ حفیظ مینگل تران کریر۔
تینا تینا تران آتیٹی اوفک شیوان ادبی کاروان بلوچستان نا مرکزی کابینہ ءِ مبارکبادی تسر و لائبریری نا بناء کننگ آ اُمیت نا درشانی کریر کہ لائبریری تا چاگڑد نا شعوری ردوم اٹ گچین و کڑد مریک، زیات آن زیات علاقہ تیٹ لائبریرک آبات مریر و ننا زَنک اوفتیان فائدہ ارفے۔
مجلس نا ارٹمیکو بشخ اٹ محفل مشاعرہ مس ہرانا مہمان ءِ خاص سخاوت ادبی کاروان نا سنگت سلام صائم ئس، اعزازی مہمان ابراھیم ہنین و قاسم ناز بلوچ ئسک ئسر و مشاعرہ ٹی مستونگ، کوئٹہ و ایلو علاقہ تیان تعلقدار شاعر آک بشخ ہلکر۔
