یازدہ ساچان ءِ بزیں ساھِگ ریھان جان ءِ ارواہ
اکیل مراد
دی بلوچستان پوسٹ
یازدہ ساچان ءِ لھمیں گوات کَشگ ءَ اَت، سھب ءِ سمیناں وتی دم بال ءَ کتگ اَت ،
ھَنچو وش اَت مردمانی دپ ءَ اَت کہ نوزدہ سد ءُ چِل ءُ ھپت ءَ یازدہ ساچان ءَ بلوچ گلزمین چہ دری انگریزانی پنجگاں چُٹ ایتگ.
اے سھب ءِ لھمیں سمین ھما بابو اھمد یار ھان ءِ وشھیں بواں تالان کنان اَت، آئی ءِ رُستگیں پُل ءَ اے وھد ءَ ھپتاد ءُ سَے سال سرجم اَت.
اے وشبھو ھنچش شَوک ءُ ڈولڈار اَت کہ آئی ءِ زیبائی ءَ مُرگ ھم بانزلانی ناچ ءَ اِت اَنت.
کپوتانی پُر زیمریں کوکواں ڈن ءُ ڈاک سر ءَ زُرتگ اِت اَنت، ساچان ءِ رنگ چہ درستیں سمینانی نوداں ڈولڈار تِر اَت. آئی ءِ بانور تبیں لَمباں وت ءَ ھنچش زمین ءَ ایر داتگ اَت.
گوشگ ءَ آئی ءِ چیر ءَ یک شاھی دیوانے ءِ نیاد بیتگ ءُ اَنی ھمیش اِنت ھلاس بیتگ. گوشگ ءَ ھمے دیوان ءَ پیر ءُ آجزیں ءُ شاکاروکیں کماش ھمے دمان ءَ کہ وتی کمرزانی اِش بوتکگ ءُ شتگ اَنت.
ھمے دیوان ءَ گوشگ ءَ اَنی چِلیمی ءِ زالانی چِلم ءِ ٹاھکیں تواراں وت ءَ ایرموش کتگ اَت کہ ھما وشی ءُ زیبائی ءِ توار ءَ گِران اِت اَنت.
ھَنچُش سما بُوَگ ءَ اَت کہ اَنی ناکو سبزل سامگی الھانانی سَوت بند بیتگ ، ھَنچشیں رنگے ءَ جنگ ءَ اَت کہ گوشگ ءَ اَنی مرید ءِ تمبورگانی ساز ایرموش اَت کجام وشی!
ھنچش وش اَت کہ گوشگ ءَ اَنی ھدامرزیگیں پیروک ءِ موشوکانی کانچی ءِ ھُکہ ءَ وتی دپ بند کتگ اَت دو تَلویں کِسگ ءَ شتگ اَت.
ھَنچشیں سما بُوَگ ءَ اَت کہ میتگ ءِ دراھیں بُلک ھمے نیادی دیوان ءَ نپادانی پژم ءُ گداں تْرک جنگ ءَ اَنت چشیں وشی ساچان ءِ بام ءُ سمین ءَ گون اِت اَنت.
کہ کاڑی ادلس نوک سمبھیتگ ءُ پیداک اِت اَنت، آیانی شیرکامیں لُنٹ چہ پَن ءُ مُزواک ءَ تِرپگ ءَ اِت اَنت ،
سالونکیں چَوٹ ءُ کوش ھم ھمے دیوان ءَ گون اِت اَنت کہ ھرکس ھمے نداراگانی چارگ ءَ دور دوریں جاھاں تچان ءُ پیداک اِت اَنت.
ھرکس ءَ ھمے واھگ داشتگ اَت اے لمب ایر آھورتگیں دیوان ءِ لمبانی چیر ءَ ما ھم بہ نندیں ءُ ھما ندارگاں ھیل بہ گریں، آ نوزدہ سد ءُ چِل ءُ ھپت یازدہ ساچان ءَ ھان آف کلات میر اھمد یار ھان ءَ دیستگ اَنت.
دراں ڈیھی مردماں اے دیوان ءِ ساھِگ ءِ پُلگ ءَ وتی پنجگانی شاھاری کرتگ اِت اَنت، ھرکسی واھگ اَت اے سارت ءُ پُر لمبیں ساھِگ ءَ من وتی گِن ءِ دم ءَ بالا بہ کن آں.
بَز لمبیں ساھِگ گوں وش نودیں زیمراں پراہ ءُ شاھِیگان اَت، آئی سر سوگاتیں مرد کمر بند ءُ ڈیھی ساھِگ ءِ رکینگ ءَ درپہ دری ءَ کوہ ءُ ڈکاں کپتگ اِت اَنت.
ھمے پنجگانی گُڈگ ءَ آیانی تیر کمان مدام بالا اَت کہ ھمے جھد ءِ دپ ءَ سر گنوگ اِت اَنت.
چُش مہ بیت کہ ھمے ساھِگ ءَ دری کاڑے بانوری ءِ ادلساں بہ گندیت ءُ آئی ءِ وش نودی ءِ ساچست ءَ وتی ارواھے تاھِری بہ کنت.
ماں ھمے دیوان ءِ ساھِگ ءِ سمبینگ ءَ گِر ءُ چِل اِت اَنت اناگہ چاگردی تاک جاھاں چہ ھال ءِ شِنگ اِیت کہ بلوچ گلزمین ءِ پھازوکیں گل ءِ جار شِنگ اِت کہ نوک رُستگیں ورناہ ریھان اسلم پہ ڈیھ ءَ ندریگ بیتگ.
آئی ءَ وتی سینگ ءَ “بارود “شورو بستگ ءُ دشمن ءِ ھما پندل بندیں دستانی کارودارنی سر ءَ وت ءَ پہ ڈیھ ءَ ندریگ کرتگ.
اے ھما ساھِگ ءِ بزیں بوبتی نازینک اِت اَنت کہ بَلُک ھاتون ءَ وتی نازینکانی تب مٹ کت ءُ پھری ءُ درشانی نازینک بندات کُت اَنت.
پہ ڈیھ ءَ سر سلامیں ریھان ءَ شتگ ءُ مات پیداگی ءِ بچاں ریھان کن اَنت ،ھمنگلیں ورنا تئی راہ ءَ رو اَنت ایرگیج مجیدی ءُ درویشی بیتگ اَنت، پُرشتگ اَنت دست دشمن ءِ دپ ما ھاکاں سک بیتگ اَنت.
اے ھما گوستگیں سال ءِ بزیں ساچان ءِ پُر لمبیں ساھِگ اَت کہ مروچی ھم ھما ساھِگ ءِ یاتگیری ءَ ریھان ءِ سر بباھیں سر ءَ سال سرجم بیت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
