آھوگ تو اے وڑ مہ کُتیں۔۔۔
بالاچ قادر
دی بلوچستان پوسٹ
گُل ترا یات بیت ھما وھدی کہ توءُ دگہ سنگتے مئے ھلکءَ اتکگ ات ئے۔۔۔ منا منی سنگتےءَ ھال دات کہ آھوگ گلءِ گندگءَ روئیں ۔۔۔ ما ترا دچار کپتیں۔۔۔تو وتی شعرے ونتءُ پدا منا شعرے وانگءَ ءَپرمات۔۔۔۔ اگاں شریءَ یات نہ اِنت گڑا یات بکن کہ شمارا سیاہیں کوکاکولا پیپسی یے گون اَت ۔من کہ شعر وَنت تو منی دست چُک اِت اَنت ءُ مزنیں بوتلءِ کوکاکولا منی نیمگا شہار دات۔۔۔۔۔۔۔۔ من ترا کتابانی تہءَونتگ اَت،من پیسرا چہ زانتگ اَت کہ آھوگ گل نامیں شاعرے است کہ وتی زمینءِ درداں چہ سرریچیں شعر نوشتہ کنت بلئے اے روچی منا باور ھوں بوگءَ نہ اَت کہ منءُآھوگ گُل ھور نشتگیں۔۔۔۔ پدا من ترا ندیست۔۔۔۔ بلئے مدام ترا وَنتگ اَت۔۔۔گوشداشتگ اَت۔۔۔۔ !
آھوگ گُل تو وت کُشی کُت۔۔۔!
اے وَھبرے نہ اِنت۔۔۔۔ تو وت گشتگ اَت کہ “چگل بداتیں سلاہ ماں جنگءَ گڑا بگشتیں”۔
تو وَسلاہ چگل دات یار۔۔۔ ترا انگتءَ جنگ کنگی اَت۔۔۔۔ نبشتہ کنگی اَت۔۔۔۔کسہ آرگی اَت۔۔۔۔ زِندگ بوگی اَت۔
منا وَ باور بوگءَ نہ اِنت کہ مُرتگ ئے بگندئے چہ مردُماں کمے دلپروش بوگءَ پد تو کموروچءَ دگہ نیمگے شُتگ ئے پدا وشّان بوگءَ رندواتر کن ئے۔۔۔۔ بلئے گُل تو گِلگ دار پرچہ بوتگ ئے یار۔۔۔۔ تو وَ دنیائی دوداں شرتر سرپد ئے۔۔۔ توزانئے کہ ادا پہک دامنیں مردُمانی پُچُک شودگءُ گواتءَ دئیگ بنت۔۔۔ تو وَ زان ئے کہ ادا جنگجاہءَ تیر دُژمنءَ چہ گیش وتیگانی سنگراں چہ کاینت۔۔۔ تو وَ زان ئے ادا مہِر، زیبائی، مردم شُناسی ءِ کرنءَجَتگ۔۔۔۔ تو کہ وت زان ئے گڑا گِلگ کجام ھبر ئے یار۔۔۔۔تو بہ نشتین ئے تماشہ بچاراِتیں۔۔۔۔کسہ گوش داشتیں ءُ پدا شعر نبشتہ کُتیں!
گُل۔۔۔ باور کن من تئی تیر سُپتگیں اکس کہ دیستگ اَت من گُشت بگندئے تو سنگرےءَ مڑانءَ تیر وارتگ اگاں زَمینءِ مھلبیں دامُنءَ شعر گُشانءَ مُرتگ ئے بلئے پدا ھال رست کہ تو وت کُشی کُتگ۔۔۔۔ ھما دمانءَ یات اتک کہ تو منی دَست چُک اتگ اِت اَنت،من لوٹ اِت کہ بیاہاں تئی دستاں بہ چُکّاں۔۔۔۔۔ تئی شعرے گوشبداراں۔۔۔۔ گوں تو دیوانے بکناں بلئے یار گُل اے ڈیپارٹمنٹءَ ھر روچ چَکاس اَنت منی ھمے ھپتگ ءَ پیپر بندات اَنت پمیشکہ من اَتک نہ کُت۔۔۔۔۔!
آھوگ گُل۔۔۔۔۔۔ تو جاڈو جلب شُشتگءُ یل داتگ یار۔
“من نہاں جاڈو کہ دستءَ وتی چمءَ بہ جناں
قولءِسربُرّی منی تاسُپیں چُکءَ پہ نہ اِنت”
من وشاں تو جاڈو گیشتر بُگشتیں۔۔۔رُزواہ کتیں یلداتیں۔۔۔۔ ادا بچار ھرکس جاڈو ءِ وڑیں سِنگ دلیں انسان اَنت کہ تاسپیں بچانی سراں بُرّان اَنت پہ قئولانی پدءَ۔۔۔۔!
گُل۔۔۔۔۔ توکہ ھردیں یات کائے من ھمے شعرءَ واناںءُ جاڈُوءِ وت گڑیں قئولاں ڈوباراں۔۔۔۔ !
گُل۔۔۔۔ بلئے تو سلاہ چگل مداتیں۔۔۔ترا اے وڑ نہ براھیت ۔۔۔۔۔ مڑان بوتین ئے۔۔۔۔ جنان بوتین ئے بلئے اےوڈ مہ کُتیں۔۔۔۔!!
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
